Daniyeli 12:10 - IBAYIBOLO 2024

¹⁰ Abantu abinji bakwiza pakuswefyiwa, nukusukiwa sona baswepite, loli abantu ababibi bakwiza pakubanga babibi. Atalipo nayumoyumo umuntu umubibi yuyo akwiza pakwivwisya, loli abantu abamahala bene bo babo bakwiza pakwivwisyanga.

Daniyeli 12:10 Iomraidhean Croise

Masalimo 107:43

Wesi yuyo ali na mahala achebaye na zinizi, sona inong'onayepo nizya lughano ulukulu nkani ulwa Mwene.

Masalimo 51:7

Unswefye ni chisilo, po nkwiza pakuswepa naloli, sona unyosyanje, po nkwiza pakuswepa ngati we kabefu.

Ivyili 1:5

Nanti umuntu uwamahala aghivwa, onjelezyepo ubumanyi bwache, sona abantu abakwivwisya baghaghilepo amahala.

Yesaya 1:18

Po u Mwene akuti, “Zagha tunenezannye. Napapo imbibi zyinyu zingaba chee ngati libanda, zikwiza pakuba swee ngati we kabefu. Napapo zingaba nchesamu loli zikwiza pakuswepa ngati busapa.

Ezekiyeli 36:25

Nkwiza pakubanyafila amizi amiza, po mukwiza pakuswepa, nkwiza pakubaswefya ubunyazu bosi ubwa vifwani vyinyu vyosi.

Ezekiyeli 47:11

Loli ubuzilo ubwa makanta mulubazu ulwa nyanja mutakwiza pakuba na mizi amiza, mukwiza pakuba mwambeya.

Daniyeli 11:33

“Abalongozi abamahala, bakwiza pakugabana amahala na bantu abanji, loli pakabalilo akapimpa bakwiza pakughoghiwa kubwite sona nukochiwa numoto. Abantu banaba bakwiza pakufyuliwa ukatundu nukusendiwa pakuba bazya.

Daniyeli 11:35

Abantu bamo abamahala bakwiza pakwipunula umwakuti baswefiwanje, pakuti ukuswefiwa kukubapela ukuti batakabe ni chilema nachimochimo mupaka pakabalilo akabumalilo, pakuti kakwiza pakukwana akabalilo kako u Chala akasala.

Daniyeli 12:3

Abantu babo bali na mahala bakwiza pakulama ngati yo mwanya. Bope abantu babo bakubalongozezya abantu abinji ku zila ingolosu, bakwiza pakulamagha ngati zyo ntondwa bwila na bwila.

Hoseya 14:9

Nkimba muntu wenu uwa mahala? Ivwisye ivintu vyosi vinivi. Nkimba muntu wenu yuyo akuvyaghannya ivintu vinivi, avimanye ivintu vinivi. Pakuti izila izya Mwene zigholokite, sona abagholosu bo babo bakwendamo, loli abantu abasambuke bakwipunulamo.

Zekaliya 13:9

Ichigaba ichabutatu nkwiza pakuchisumbila mumoto. Nkwiza pakubaswefya ngati we siliva, sona nukubayela ngati we golide. Bakwiza pakulyiputa itabwa lyane, nkwiza pakubamula po nkwiza pakunena ukuti, ‘Bantu bane.’ Abene bakwiza pakwamula ukuti, ‘U Mwene we Chala witu.’ ”

Malaki 3:3

Akwiza pakwikala pasi ngati wakusungunula nu wakuswefya u siliva, akwiza pakubaswefya aba Levi pakuba ngati we golide nu siliva. Po bakwiza pakuba bantu babo bakubika ivyabupi mubugholosu kwa Mwene.

Maliko 4:11

U Yesu akamula akati, “U Chala abavumbulila vivyo vifisiwe ivya Bumwene bwache. Loli abantu babo bali kuzi bakwivwa vyosi muvyili,

Luka 24:25

U Yesu akababuzya akati, “Mwe bapunganu mwee! Choni chicho mwe bapalapala nkani pakusubila ivintu vyosi vivyo abalaghuzi bakalaghula!

Yohani 18:37

Po u Pilati akamulalusya akati, “Nkimba we Mwene?” U Yesu akamula akati, “Momumo mo wanenela ukuti ane ne Mwene. Nkapapiwa nukwiza muchisu ichapasi ukuti imbusimikizye ubwanaloli. Umuntu wesi yuyo ali pa bwanaloli, akwivwila amazyu ghane.”

Yohani 7:17

Umuntu wesi yuyo akulonda pakubomba vivyo u Chala akulonda, akwiza pakumanya nanti vivyo nkumanyisya vifumite kwa Chala pamo nkunena nu bulaghili ubwane nu bwane.

Yohani 8:47

Abana aba Chala bakwivwa zizyo u Chala akunena. Loli amwe mute mwe bana aba Chala, po cho chifukwa mutakwivwisya.”

1 Aba Kolinti 6:11

Umu momumo bamo mumwinyu mukabela, loli mukaswefiwa nukupaghuliwa, sona mwaneniwa ukuti mute ninongwa nayimoyimo pamaso pa Chala mwitabwa ilya Mwene u Yesu Kilisitu, sona nukwendela mu Muzimu uwa Chala witu.

2 Aba Kolinti 7:1

Mwee bamanyani bane abaghaniwa, pakuti twaba na malayizyo ghosi ghanagha, zagha twisuke twebene ku vintu vyosi vivyo vikunyazya umubili pamo amoyo ghitu, nukwipela twebene pakuba bantu abazelu, sona nukuba bantu abakumunyila u Chala.

Titi 2:14

Akiyipa mwene pachifukwa icha sweswe ukuti atusatule ku bubibi bwitu bosi nukuti tubanje bantu bache abazelu, babo balweke pakubomba imbombo inyiza.

Aba Hebeli 12:10

Abatata bitu aba muchisu ichapasi bakatufunda pakabalilo akapimpa bulo ukuyana namumo bakinong'onelagha ukuti chiza, loli u Chala akutufunda ukuti tukabepo chimo ichiza, umwakuti tungagabana nawe ubuzelu bwache.

1 Pitala 1:22

Pakuti ilelo mwiswefya mwebene pakwivwila ubwanaloli, umwakuti mukubaghana abitiki abamwinyu. Po mughananaye mwebene nu moyo winyu ghosi.

1 Pitala 1:7

Injelo zinizi zyizite, umwakuti zisimikizye nanti ulwitiko lwinyu lwenecho. Ngati we golide yuyo angananganika, akuswefyiwa numoto, umwakuyana bulo, ulwitiko lwinyu lulo lwapamwanya ukuchila ugolide, lubaghiye luswefyiwe. Po mukwiza pakupokela amapalo nu buchindamu nu muchizi, pisiku lilyo u Yesu Kilisitu akwiza pakuvumbuliwa.

1 Yohani 5:20

Tuzimenye ukuti u Mwana uwa Chala iza, nukutupa amahala aghakivwisizye, umwakuti tumumanye yuyo wanaloli. Aswe tukwikala mukumamatilana poka nu Chala wanaloli, sona nu Mwana wache u Yesu Kilisitu. U Yesu Kilisitu we Chala wanaloli, we bumi ubwa bwila na bwila.

Ubuvumbuli 16:11

Bakamughuna u Chala uwakumwanya pachifukwa icha bubavu ni vilonda vyabo. Loli batakapinduka pamo ukuzileka imbombo zyabo imbibi zizyo bakabombagha.

Ubuvumbuli 19:14

Abasilikali aba kumwanya bakamukonka yuyo akakwela pa falasi inswepu, bo bavwalite amenda amaswepu, sona amatonte.

Ubuvumbuli 19:8

Yuyo akusendwa apeghiwe amenda amaswepu, sona ghagho ghasoniwe akiza ukuti avwalaye.” (Amenda amaswepu ghakwimilila imbombo inyiza izya bantu abazelu aba Chala.)

Ubuvumbuli 22:11

Umuntu wesi yuyo akubomba ububibi, endelele pakubomba ububibi bwache. Umuntu wesi yuyo munyazu, endelele pakuba munyazu. Umuntu wesi yuyo mugholosu, endelele pakuba mugholosu, sona umuntu wesi yuyo muzelu, endelele pakuba muzelu.”

Ubuvumbuli 3:18

Polelo nkukubuzya ukuti ughule kukwane ugolide yuyo asyaniwe numoto, ukuti ubanje we mukabi. Ughule sona amenda amaswepu, uvwale ukuti ufise inkule yako nkozyasoni. Ughule umulembo, upake mumaso ghako, umwakuti ungennya.

1 Samuweli 24:13

Uchimenye ichili ichakale ichakuti, “U muntu umubibi zyope imbombo zyache mbibi.” Po ane ntakwiza pakukubombela nachimochimo ichintu ichibibi, awe.