Amosi 9:13 - IBAYIBOLO 2024

¹³ U Mwene akuti, “Mumasiku ghagho ghakwiza uwakwinula akwiza pakumuchila yuyo akulima, wepe uwakubyala akwiza pakumuchila yuyo akukanyankila amampesya. Mumaghamba mosi mukwiza pakutonya uvinyo umupya, po uvinyo akwiza pakwenda mutughamba tosi.

Amosi 9:13 Iomraidhean Croise

Ubwandilo 49:11

Mwikwi lyache ilya mampesya ilyiza, momumo apinyite umwana uwa mpunda. Muvinyo uwa mampesya, momumo akuchapa amenda ghache. Akuchapa ivyakuvyala vyache mwa vinyo, yuyo ayanite ni banda.

Masalimo 97:5

Amaghamba ghakusunguluka ngati mpula pamaso pa Mwene, pamaso pa Mwene uwa ichisu chosi ichapasi.

Yesaya 16:10

Ulusekelo nukuhoboka vyasendiwa, ukufuma mumaghunda gha vikomwa, atalipo nayumo yuyo akwimba, pamo akukolomoka mumaghunda agha mampesya, sona atalipo nayumo yuyo akukama uvinyo, apakukanyilapo uvinyo, pakuti namazya ichongo icha bakukama uvinyo.

Yesaya 55:13

Mubuzilo ubwa mivwa mukwiza pakumela amakwi agha payini, mubuzilo ubwa ntumbusya mukwiza pakumela amakwi aghamazwanga. Ichi chikwiza pakuba chimanyilo icha Mwene, icha bwila na bwila, chicho chitakwiza pakunanganika.”

Ezekiyeli 28:26

Bakwiza pakwikala mulamula umwakufwasa nukuzenga inyumba zyabo nukubyala amampesya, bo nkubafunda abapalamani babo, babo bakabayivyanga. Po bakwiza pakumanya ukuti ane ne Mwene u Chala wabo.’ ”

Ezekiyeli 36:35

Bakwiza pakunena ukuti, “Ichi cho chisu chicho chikaba chisami ilelo chaba ngati mughunda uwa Edeni, utwaya utukulu nkani tuto tukaba visami, sona tuto abantu batakwikalamo, tuto tukananganika, ilelo twaba malinga sona abantu bakwikalamo.”

Yoweli 2:24

Apakukomelapo inyinulo pizulaye ni ngano, sona isonta izyakusungilamo uvinyo umupya na mafuta zifulukaye.

Yoweli 3:18

“Pisiku linilyo amaghamba ghakwiza pakutonya uvinyo umunoni umupya, tope utughamba tukwiza pakwenda ulukama. Isoko zyosi izya mu Yuda zikwiza pakwizula na mizi. Imbwibwi zikwiza pakwenda ukufuma mu Nyumba iya Mwene mupaka nukufika mwikombe ilya Akasiya.

Yoweli 3:20

Mu Yuda mukwiza pakwikalamo abantu bwila na bwila, sona inkulilo zyosi izya bantu zikwiza pakwikala mu Yelusalemu.

Aba Levi 26:5

Inyinulo yinyu yikwiza pakwendelela mupaka pakabalilo akakuyabila ivikomwa, sona mukwiza pakuyabagha ivikomwa mupaka pakabalilo akakubyalila. Mukwiza pakulya ivibama nukwikuta, sona mukwiza pakwikala muchisu chinyu umwakufwasa.”

Amosi 9:5

U Mwene, u Mwene Uwamaka Ghosi, yuyo achipalamasya ichisu ichapasi chikusunguluka, sona abantu babo bakwikalamo bakulila. Ichisu chosi chikwizula ngati lusoko ulwa Nayilo, sona chikupwa ngati lusoko ulwa mu Ijiputi.

Yohani 4:35

Amwe mukunena ukuti, ‘Kwasyalako bulo amezi folo ukuti akabalilo akakwinulila kakwane.’ Loli nkubabuzya ukuti ennya mumaghunda; ivibyalwa vyela, sona akabalilo akakwinulila kafikiye.

Abalongi 5:5

Amaghamba ghakaneng'ena pamaso pa Mwene uwa Sinayi, pamaso pa Mwene u Chala uwa ba Izilayeli.