Abalongi 21:1 - IBAYIBOLO 2024

¹ Aba Izilayeli bakalapa kwa Mwene bo bali pa Mizipa bakati, “Atalipo nayumo umuntu pakasi papitu yuyo akwiza pakumwitikizya umu Benjamini pakumusenda umwana wache umulindu ukuti abanje muchi wache.”

Abalongi 21:1 Iomraidhean Croise

Umulumbilili 5:2

Utakachimbililaye pakunena, utakafingaye mwalwemwalwe pamaso pa Chala. U Chala ali kumwanya, awe uli pachisu ichapasi, po utakanenaye amazyu aminji.

Yelemiya 4:2

nanti mukulapa nu bwanaloli na mubugholosu, naloli nu Mwene umumi inko zikwiza pakusayiwa na yuyo, sona mumwache mukwiza pakuba ubuchindamu.”

Yelemiya 40:6

Po u Yelemiya akabuka kwa Gedaliya umwana uwa Ahikamu ku Mizipa nukwikala nawe pakasi pabantu babo bakasyalikila muchisu chilachila.

Maliko 6:23

Akamulayizya nkani pakulapa ukuti, “Nkulapa ukuti nkwiza pakukupa chosi chicho ukulaba, napapo tungagabana ubumwene bwane pakasi na pakasi!”

Imbombo 23:12

Bo kwacha, aba Yuda bakabatika nizya kumughogha u Pabuli. Bakalapa kwa Chala ukuti batakwiza pakulya pamo ukung'wela kamo mupaka papo bamughogha u Pabuli.

Aba Loma 10:2

Nkubasimikizizya ukuti bipiye nkani pavintu ivya Chala, loli ukwiyipa kwabo kute kwa mahala.

Abalongi 20:1

Aba Izilayeli bosi aba mu Dani mupaka ku Belisheba, sona naba mu Giliyadi bakabungana poka pamaso pa Mwene mu Mizipa.

Abalongi 20:10

Tukwiza pakubasenda abantu 10 pabantu 100 ukufuma mu inko zyosi izya Izilayeli, na bantu 100 pabantu 1,000, sona na bantu 1,000 pabantu 10,000 ukuti babanyamulile ivyakulya abasilikali. Po bo abasilikali bafika mukaya akakulu nkani aka Gibeya mu Benjamini, bakwiza pakubafunda abantu aba mulamula, pakubatanizya pachintu ichamusamu chicho bakachibomba mu Izilayeli.”

Abalongi 20:48

Aba Izilayeli bakanyokela pakulwa ubwite naba Benjamini babo bakasyalako nukubaghogha abantu bosi mukaya kala, ukonjelezyapo ivitekwa, poka ni vintu vyosi bakavyagha mulamula. Bakatocha utwaya tosi utukulu, tuto tukaba muchisu chilachila.

Abalongi 20:8

Abantu bosi bakimilila poka nukuti, “Atalipo nayumoyumo umuntu pakasi papitu uwakunyokela ku chisakasa chache pamo uwakubwela kunyumba.

Abalongi 21:18

Loli pope bulo tutangabapa abana bitu ukuti babanje bachi babo, pachifukwa ichakuti tukalapa kwa Mwene ukuti, ‘Aghuniwanje umuntu wesi yuyo akumwitikizya umu Benjamini pakumusenda umwana wache umulindu ukuti abanje muchi wache.’

Abalongi 21:22

Nanti abawise pamo abayemba babo bakwilumbusya naswe, tukwiza pakubabuzya ukuti, ‘Mwee twalamba, mutwitikizye ukuti tubavwe, pachifukwa ichakuti tutakabasendela abachi pakabalilo aka bwite kala. Amwe mute ninongwa nayimoyimo, pakuti mutakabitikizya pakubasenda abana binyu abalindu ukuti babanje bachi babo.’ ”

Abalongi 21:5

Aba Izilayeli bakalalusya bakati, “Nkimba luko loni pakasi panko izya ba Izilayeli, lulo lukanyoka ku lukomano ulwa Mwene?” Pakuti abantu bakalapa ukuti umuntu wesi yuyo anyoka kulukomano ulwa Mwene mu Mizipa, naloli aghoghiwanje.

Abalongi 21:7

Nkimba tungabalondela bulibuli abachi abantu babo bapona, pakuti twalapa kwa Mwene ukuti tutakwiza pakubitikizya aba Benjamini ukuti babasende abana bitu abalindu pakuba bachi babo?”

1 Samuweli 14:24

Aba Izilayeli bakayimba nkani pisiku lilalila, pachifukwa ichakuti u Sabuli akalapa ichilapo pamaso pabantu bala akati, “Aghuniwanje umuntu wesi yuyo akulya ichakulya chimo bo kuchili pakwila, sona bo intabatanizizye abalwani bane.” Po patakabapo nayumoyumo yuyo akalabukapo ichakulya pisiku lyosi lilalila.