Abalongi 1:27 - IBAYIBOLO 2024

²⁷ Loli aba Manase batakabachimbizya abantu aba mu Beti Shani pamo aba mu Tanaki pamo aba mu Doli pamo aba mu Ibuleyamu pamo aba mu Megido poka nutwaya utupalamani, po aba Kenani bakendelela pakwikala mulamula.

Abalongi 1:27 Iomraidhean Croise

1 Abamwene 9:21

kokuti abaluko lwabo bo babo bakasyala muchisu chila. Aba Izilayeli bakapotwa pakubazimizya po u Solomoni akababombezya abantu banaba imbombo izyakufyenga bulo ngati mumo zibeyele nilelo bulo.

2 Abamwene 23:29

Bo u mwene u Yosiya akulaghila, u Falabo u Neko uwamu Ijiputi akabuka kulusoko ulwa Yufuleti pakumwavwa u mwene uwamu Asiliya. U mwene u Yosiya akabuka pakulwa nawe ubwite. Loli u Falabo Neko akamughoghela u Yosiya ku Megido.

2 Abamwene 9:27

Bo u Ahaziya u mwene uwamu Yuda azyennya zizyo zikabombiwa, akachimbilila ku Beti Hanani. Loli u Yehu akamuchimbizya bo akukolomoka ukuti, “Wepe mumughoghe.” Po bakamuvulazya bo ali mungolo yache bo akubuka ku Guli, papipi nakaya akakulu nkani aka Ibuleyamu. Loli u Ahaziya akachimbilila kukaya akakulu nkani aka Megido nukufwila kulakula.

Ukufuma 23:32

Mutakafingaye ulufingo nalumolumo na bantu banaba pamo na bachala babo.

Yelemiya 48:10

“Chighune ku muntu yuyo mukata pakubomba imbombo iya Mwene! Chighune ku muntu yuyo akukanizya u panga wache pakukupula ibanda!”

Ukukumbusya Amalamulo 7:2

sona nanti u Mwene u Chala winyu ababika munyobe zyinyu sona mwabapota, po mubazimizyanje bosi. Mutakafingane nabo ulufingo, sona mutakabapelelaye ichisa.

Yoshwa 21:25

Abaluko uhafu ulwa Manase bakabapa akaya akakulu aka Tanaki naka Gati Limoni poka nu buzilo ubwakudimilako ivitekwa. Utwaya utukulu tunutu tukabapo tubili.

Abalongi 1:1

Bo u Yoshwa afwa aba Izilayeli bakamulalusya u Mwene bakati, “Nkimba luko loni lulo lukwiza pakuba lwakwanda pakulwa ubwite naba Kenani?”

Abalongi 1:21

Loli aba Benjamini bakapotwa pakubachimbizya aba Yebusi, babo bakikalagha mukaya akakulu nkani aka Yelusalemu. Aba Yebusi bachili bakwikala mulamula poka naba Benjamini.

Abalongi 1:26

Po umuntu yula akabuka pakwikala muchisu icha ba Hiti, kuko akazengako akaya akakulu nkani, nukukita ukuti Luzi, lilyo lyo litabwa lyache mupaka nilelo bulo.

Abalongi 1:28

Bo aba Izilayeli baba na maka nkani ukubachila aba Kenani, bakababombezya aba Kenani imbombo iya buzya, loli pope bulo batakabachimbizyamo bosi.

Abalongi 5:19

“Abamwene bakiza nukulwa ubwite. Abamwene aba ba Kenani bakalwa ubwite pa Tanaki mulubazu ulwa lusoko ulwa Megido. Loli batakasendapo nayumoyumo usiliva, sona batakafyulapo nachimochimo ichintu.

1 Samuweli 15:9

Loli u Sabuli na basilikali bache bakamuleka mumi u Agagi sona batakazighogha ing'ozi ni ng'ombe ni ngwata inyine nkani sona na bana abang'ozi. Batakachighogha ichintu chosi chicho chikaba chiza. Batakalondagha pakuvinangannya ivintu vinivi loli bakavinangannya ivintu vyosi vivyo vikaba vibibi sona vitakaba ni mbombo.

1 Samuweli 31:10

Bakavibika ivilwilo ivya Sabuli munyumba iyakumwiputilamo u Ashitoleti, sona bakaghukomela umuvimba wache kulubumba ulwa lupaso ulwa kaya akakulu nkani aka Beti Shani.