2 Samuweli 17:11 - IBAYIBOLO 2024

¹¹ “Po ifundo yiyo ningakubuzya yo iyi: Aba Izilayeli bosi aba mu Dani naba mu Belisheba, babo binji nkani ngati musesenga uwa mulubazu ulwa nyanja, babungane poka kuno, sona awe ubalongolelaye pakubuka kubwite.

2 Samuweli 17:11 Iomraidhean Croise

Ubwandilo 13:16

Nkwiza pakukupa abaluko abinji nkani umwakuti atalipo nayumoyumo yuyo angababelenga. Nanti umuntu angabelenga ulufumbi ulwa muchisu ichapasi, kokuti angababelenga abaluko lwako.

Ubwandilo 21:14

Pandabindabi nkani u Abulahamu akasenda ichakulya ni nyambi iyikwela iya mizi nukumupa u Hagala. Akamubaghalizya ivyakulya pavipunko nukumubuzya ukuti abukaye poka numwana wache. U Hagala akanyamuka, akendakendagha bulo munkolongo iya Belisheba.

Ubwandilo 22:17

Naloliloli nkwiza pakukusaya nkani, sona nkwiza pakubapela abaluko lwako pakuba binji nkani ngati zyo ntondwa, sona ngati musesenga uwa mulubazu ulwa nyanja. Abaluko lwako bakwiza pakubapota abalwani babo bosi.

2 Samuweli 12:28

Losi ulu ubabungannye abasilikali abanji bosi babo bakasyalikila. Wize kuno nukuzenga ivisakasa umwakukazyungulila akaya kala nukukafyula. Lumo ningakafyula nukukita itabwa lyane.”

2 Samuweli 24:2

Po u mwene akamubuzya u Yowabu na basongo aba basilikali babo bakaba nawe akati, “Buka pakasi pa inko zyosi izya Izilayeli ukwandila ko kuchisu icha Dani mupaka ku Belisheba pakubabelenga abantu babo bangabomba imbombo iya kulwa ubwite, umwakuti imanye ubwinji bwabo.”

2 Samuweli 3:10

Nkwiza pakubafyula abamunyumba iya Sabuli ubumwene nukumubika u Devedi pakuba we mwene uwa ba Izilayeli, naba luko ulwa Yuda, ukwandila ko kuchisu icha Dani mupaka ku Belisheba.”

1 Abamwene 20:10

Po u Beni Hadadi akamutumila sona amazyu u Ahabu aghakuti, “Abachala banfunde nkani nanti ane poka na bantu bane abinji tutakwiza pakukanangannya akaya akakulu nkani aka Samaliya, umwakuti patakwiza ukusyalapo ulufumbi ulwakuti umuntu wekaweka angalutapa munyobe yache.”

1 Abamwene 4:20

Abantu aba muchisu icha Yuda nicha Izilayeli bakaba binji nkani ngati musesenga uwa mulubazu ulwa nyanja. Bakaba bantu abakuhoboka nkani pachifukwa ichakuti bakaba ni vyakulya, sona ni vyakung'wela ivyinji nkani.

Masalimo 9:16

U Mwene ivumbuye mwene pachifukwa icha bwanaloli bwache, sona ababibi balemiwe muchipingo icha mbombo zyabo.

Yoshwa 11:4

Abamwene banaba bakiza poka na basilikali babo, babo bakaba ni falasi, sona ni ngolo inyinji nkani ngati mumo ghubeleye umusesenga uwa mulubazu lwanyanja.

Abalongi 20:1

Aba Izilayeli bosi aba mu Dani mupaka ku Belisheba, sona naba mu Giliyadi bakabungana poka pamaso pa Mwene mu Mizipa.

1 Samuweli 13:5

Aba Filisiti bakabungana poka ukuti balwe ubwite naba Izilayeli. Bakaba ni ngolo izya bwite 30,000, na bendezya ingolo 6,000, sona na basilikali abinji nkani ngati musesenga uwa mulubazu ulwa nyanja. Bakazenga ivisakasa vyabo mu Mikimashi kubufumilo bwizuba ubwa Beti Aveni.

1 Samuweli 3:20

Po aba Izilayeli bosi ukwandila muchisu icha Dani mupaka muchisu icha Belisheba bakazyaghannya ukuti u Samuweli akaba mulaghuzi umusubiliwa uwa Mwene.