1 Timoti 3:3 - IBAYIBOLO 2024

³ Atakabe we ching'wela, pamo umuntu uwa lombwa, loli abanje mololo. Atakabe wavyongo, sona atakazighanaye indalama.

Ulufingo Ulupya

³ Atakabe we ching'wela, pamo umuntu uwa lombwa, loli abanje mololo. Atakabe wavyongo, sona atakazighanaye indalama.

1 Timoti 3:3 Iomraidhean Croise

Ivyili 1:19

Ubu bo bumalilo ubwa bantu bosi babo bakubwagha ubukabi pachifukwa icha bwite, ubukabi bulabula bukubaghogha abenecho.

Ivyili 15:27

Umupafu akubitizizya abamunyumba yache intamyo, loli yuyo aghabengite amabeko akuba nubumi.

Umulumbilili 7:8

Ubumalilo ubwa chintu chimo bwizapo ukuchila ubwandilo bwache, ubufisalyoyo bwizapo ukuchila amituvyo.

Yesaya 28:1

Chighune ku bumwene ubwakwikwezya na baching'wela aba mu Izilayeli, sona naku bwezya ubwa kufoka ubwa mpumpu iya bumwene bwache, bubo buli kwikombe ilya muvundo ilya akakulu nkani kala, ukwituvya ukwa babo bakolizwe nu vinyo!

Yesaya 28:7

sona na bantu banaba bope bakutantalila, pachifukwa icha vinyo. Abaputi na balaghuzi bakutantalila pachifukwa icha vinyo, bakutantalila bo bakwennya ivisetuka, bakupotwa pakulonga inongwa zizyo abantu bakubizila nazyo.

Yelemiya 6:13

“Pachifukwa ichakuti ukwandila ku bana mupaka ku basongo bosi banaba bakunyonywa ukukabila ichuma muzila izya buzimbuli. Abalaghuzi na baputi bulo bosi bazimbuli.

Yelemiya 8:10

Polelo nkwiza pakubalemeka abachi babo abanavuli abanji sona amaghunda ghabo ku bantu abanji. Pachifukwa ichakuti ukwandila ku bana mupaka ku basongo bosi banaba bakunyonywa ukukabila ichuma muzila izya buzimbuli. Abalaghuzi na baputi bulo bosi bazimbuli.

Ezekiyeli 44:21

Atakabepo nayumoyumo umuputi uwakung'wela uvinyo, bo akwinjila mulubinjilo ulwamukasi.

Aba Levi 10:9

“Awe na bana bako mutakang'welaye uvinyo, pamo ubwalwa, bo mukwinjila mu Chisakasa icha Mwene lumo mungafwa. Ulu lubanje lulaghilo ulwa bwila na bwila mupaka inkulilo zyinyu zyosi izya muntazi.

Mika 2:11

Nanti umuntu umumyasi sona umuzimbuli akwiza nukunena ukuti, ‘Nkwiza pakubalaghulila ukuti: Mukwiza pakuba nu vinyo umwinji, sona ni vyakungw'ela vivyo umuntu angakolwa navyo,’ umuntu yunuyu angaba mulaghuzi winyu!

Mika 3:11

Abalongozi bache bakulonga pachifukwa icha mabeko, abaputi bache bakumanyisya pachifukwa icha malipilo, sona abalaghuzi bakulaghula pachifukwa icha ndalama. Loli pope bulo beghamiye kwa Mwene nukuti, “Nkimba u Mwene ate pakasi papitu? Chitalipo ichiwaya chicho chingatuwila.”

Mika 3:5

U Mwene akuti, “Abalaghuzi babo bakubasovya abantu bane, nanti yumo akubapa ichakulya, kokuti bakulumbilila ‘umutende.’ Nanti atakubomba bunubu, kokuti bakwiyannya pakulwa nawe ubwite.

Malaki 1:10

“Nalondagha nkani ukuti ngali weka pakasi papinyu ighaliye inyiyi izya Nyumba iya Chala, umwakuti mutakapembe umoto ghugho ghute ni mbombo pachighemo chane! Ane ntahobokite namwe. Ane ne Mwene Uwamaka Ghosi nanena sona ntakwiza pakuvipokela ivyakwiyipa vyinyu vivyo vili munyobe zyinyu.

Matayi 21:13

Akababuzya ukuti, “Amasimbo ghakuti, ‘Inyumba yane yikwiza pakwitiziwa nyumba iyakwiputilamo.’ Loli amwe mukuyipela pakuba nyumba iyakuvwamilamo amavyondongo!”

Imbombo 20:33

Intakanyonywapo indalama izya muntu pamo amenda agha muntu awe.

Aba Loma 16:18

Pakuti abantu banaba batakumubombela u Mwene witu u Kilisitu, loli bakuvibombela ivinyonywa vyabo. Sona na mazyu ghabo manoni, sona mazimbuli bakubazimbula abantu babo batamenye nachimochimo.

Aba Efeso 5:18

Sona mutakakolwanje nu vinyo pakuti ukukolwa kukupela ukunanganika. Loli mwizulaye nu Muzimu Umuzelu.

1 Aba Tesalonika 5:14

Bakamu bitu, tukubalaba ukuti mubasokaye abantu abakata. Abantu babo bali nubogha mubakazyanje. Mubakazyanje nukubavwa babo badedebazu, sona mubanje mwe bafisalyoyo nu muntu wesi.

1 Timoti 3:8

Umwakuyana bulo, bope abavwilizi muchipanga babanje ni nkalo inyiza, sona abasubiliwa. Batakang'welaye nkani uvinyo, pamo pakuba baghana ndalama.

2 Timoti 3:2

Abantu bakwiza pakuba bakwiyighana bene, na baghana ndalama, na bakwitutumula, na bamituvyo, na bantuko, na basita kwivwila abapapi babo, na basita kupalizya, sona na basita ukumwiputa u Chala.

Titi 1:11

Ubaghiye ubakanizyanje pakunenanena, pachifukwa ichakuti bakuvulungannya imitu iya bantu munyumba zyosi pakubamanyisya vivyo vitabaghiye pakumanyisiwa. Pakubomba bunubu yikuba ngati yo zila iyakukabilamo indalama.

Titi 1:7

Pakuti usongo uwa chipanga we wakwenelezya imbombo iya Chala, abanje muntu umusita chilema nachimochimo. Atakabanje muntu uwakwitutumula nu wakukalala mwalwemwalwe pamo uching'wela. Atakabanje muntu uwalombwa, pamo umughana ndalama.

Titi 2:3

Umwakuyana bulo, bope na bakolo abachasongo, ubamanyisye ukuti babanje ni nkalo iyakuyana na bakolo babo bali nubumi ubuzelu. Batakabanje bantu abiyebo, pamo abazya aba vinyo, loli bamanyisyanje chicho chiza,

Titi 3:2

Ubabuzye ukuti batakamuyebaye nayumo umuntu, loli babanje bantu abamutende, abamanyani aba bantu bosi, sona babanje bololo ku bantu bosi.

Aba Hebeli 13:5

Amoyo ghinyu ghatakabanje ghakughana indalama, mwikutaye na vivyo muli navyo. U Chala akati, “Ntakwiza pakubaleka. Ntakwiza pakubataghapo nalumo.”

Yakobo 4:1

Nkimba ubulwe nukudalinkana vivyo vili mumwinyu vikufuma kwiyi? Nkimba vitakufuma ku vinyonywa vyinyu ivibibi, vivyo vikulwana mumwinyu?

1 Pitala 5:2

ukuti: Mudimaye umudimo uwa ng'ozi zizyo u Chala akubapa. Mughusungilile umwakusita kufyengiwa, ukuyana namumo u Chala akulondela ukuti mubombelaye. Mutakabombaye imbombo yinyu nu moyo uwakunyonywa indalama, loli mubombaye nu moyo uwakunyonywa pakubomba.

2 Pitala 2:3

Pachifukwa icha kunyonywa ubukabi abene bakwiza pakubapela amwe pakuba mwe zila iyakukabilamo pakubombezya amazyu aghabuzimbuli. Loli ubulongi bwabo buyaniziwe kale, sona ukuzimila kwabo kukubalindilila.

Yuda 1:11

Ichighune chabawile pakuti bakonka izila iya Kayini. Pachifukwa icha ndalama, bakananga ukuyana namumo akanangila u Balamu. Bakamusambukila u Chala ukuyana namumo u Kola akamusambukilila, po bakwiza pakunangika ngati weyuyo.

Ubuvumbuli 1:9

Ane ne Yohani umukamu winyu, nkugabana namwe amayimba nu bumwene, sona nu bufisalyoyo mwa Yesu. Nkabikiwa pa kasungo aka Patimo pachifukwa ichakuti nkalumbilila amazyu agha Chala, sona nu bwanaloli bubo u Yesu akabuvumbula.

1 Samuweli 8:3

Loli abana banaba batakasendelako inkalo inyiza iya wise, umwakuti bakabombelagha bulo zyo ndalama. Bakanda pakupokela amabeko nukulonga inongwa umwakunyongannya ubwanaloli.