1 Samuweli 7:3 - IBAYIBOLO 2024

³ U Samuweli akababuzya aba Izilayeli bosi akati, “Nanti mukulonda pakunyokela kwa Mwene nu moyo winyu ghosi, mubefye abachala abayeni, ni vifwani ivya Ashitoleti. Mumubombelaye u Mwene nu moyo winyu ghosi, po akwiza pakubapoka munyobe izya ba Filisiti.”

1 Samuweli 7:3 Iomraidhean Croise

Ubwandilo 35:2

Po u Yakobo akababuzya abamunyumba yache, sona na bosi babo bakaba nawe akati, “Tagha utwachala utuyeni tuto muli nato pakasi papinyu. Mwiswefye mwebene, sona muvwalaye amenda aghanji amiza.

1 Abamwene 11:33

Nkwiza pakubomba bunubu pachifukwa ichakuti bankana nukumwiputa u Ashitoleti uchala umukolo uwa ba Sidoni nu Kemoshi uchala uwa ba Mowabu, sona nu Moleki uchala uwa ba Amoni. Abantu banaba batakabomba vivyo nkabalamula, pamo ukubomba ivintu ivigholosu pamaso papane, pamo ukuzikonka indaghilo na malamulo ghane ukuyana namumo uwise uwa Solomoni u Devedi akabombelagha.

1 Abamwene 8:48

Nanti abantu bako bapinduka nu moyo wabo ghosi nu muzimu wabo ghosi muchisu icha balwani, babo babalemite pakuba bazya, sona nanti bakwiputa bo bakwennya kuchisu chicho ukabapa abanyenya babo, nakaya akakulu kako wakasala, sona ni Nyumba yiyo nakuzengela,

2 Abamwene 17:39

Loli mumwiputaye u Mwene, u Chala winyu, pakuti weyuyo akwiza pakubapoka munyobe izya balwani binyu bosi.”

2 Abamwene 23:15

U Yosiya akachimongolannya sona ichighemo icha Beteli nu buzilo ubwapamwanya ubwakwiputilamo bubo u Yelobowamu umwana uwa Nebati akazenga, pakubapela aba Izilayeli ukuti bope banangaye. Akafwantannya amabwe nukughasya pakuba lufumbi, sona akocha ichifwani icha chala u Ashela.

1 Imbili 22:19

Losi ulu mumubombelaye u Mwene u Chala winyu nu moyo winyu ghosi, sona nu muzimu winyu ghosi. Andako pakumuzengela u Mwene u Chala winyu ubuzilo ubupaghuliwa, umwakuti mwize ni Bokosi ilya Lufingo ilya Mwene, poka ni vibombelo vyosi ivipaghuliwa ivya Chala mu Nyumba iya Mwene.”

1 Imbili 28:9

“Wee mwana wane Solomoni, umwivwilaye nukumubombela u Chala uwa ghuso nu moyo wako ghosi pakuti u Mwene azimenye inyinong'ono izya muntu na kabombele kache. Nanti ukumulondelezya, ukwiza pakumwagha, loli nanti ukumusula, wepe akwiza pakukukana bwila na bwila.

2 Imbili 19:3

Loli bulimo bumo ubwiza mumwako, pakuti wefyamo ivifwani ivya Ashela muchisu sona ukubomba zizyo u Chala akulonda.”

2 Imbili 20:33

Loli atakabunangannya ubuzilo ubwapamwanya ubwakwiputilapo, umwakuti abantu bakamwiputa na moyo ghabo ghosi u Chala uwa banyenya babo.

2 Imbili 30:19

yuyo akumulondelezya nu moyo wache u Mwene, u Chala uwa banyenya bache, napapo atakipaghula mwene ukuyana ni nyiho izyakwiswefesezya.”

Ivyili 16:1

Umuntu angabatika ivintu mumoyo wache, loli ukwamula ukwenecho kukufuma kwa Mwene.

Yesaya 55:7

Mubaleke ababomba mbibi, baleke inkalo zyabo imbibi, sona bope abantu ababibi bazileke inyinong'ono zyabo inyonganu. Baleke banyokele kwa Mwene, ukuti abapelele ichisa, sona nakwa Chala witu, pakuti akwiza pakubahobokela.

Yelemiya 24:7

Nkwiza pakubapa u moyo uwakuzimanya ukuti ne Mwene. Bakwiza pakuba bantu bane, nane nkwiza pakuba ne Chala wabo, pakuti bakwiza pakunyokela kukwane nu moyo wabo ghosi.

Yelemiya 36:3

Pamo bo aba Yuda bivwa nizya ntamyo zizyo nkwinong'ona pakubawisizya umwakuti umuntu wesi anyokeko ku zila zyache imbibi, po ane nkwiza pakubahobokela ku bubibi bwabo bosi sona na kumbibi zyabo.”

Yelemiya 4:1

U Mwene akuti, “Mwee ba Izilayeli, nanti mukulonda pakunyokela kukwane, nyokela. Mwefyepo ivifwani ivinyazu vyosi pamaso papane, sona mutakusobelapo nalumo,

Ezekiyeli 14:6

“Polelo ubabuzye aba Izilayeli ukuti, ‘U Mwene Uwamaka Ghosi akuti: Pinduka! Vileghuke ivifwani vyinyu nukubuleka ubunyazu bosi!

Ezekiyeli 18:31

Efyamo ukunanga kosi kuko mwabomba, nukusenda umoyo umupya nu muzimu umupya. Mwee ba Izilayeli, nkimba choni chicho mu kufwa?

Hoseya 14:1

Mwee ba Izilayeli, nyokela kwa Mwene u Chala winyu. Imbibi zyinyu zyabawisya!

Matayi 15:8

‘Abantu banaba bakunchindika nu mulomo wene, loli amoyo ghabo ghali kubutali nkani nane.

Matayi 4:10

Panapa u Yesu akamwamula akati, “Epapo Satana! Amasimbo ghakuti, ‘Umwiputaye u Mwene u Chala wako, sona umubombelaye yuyo mwene.’ ”

Matayi 6:24

“Atalipo uwambombo yuyo angababombela imbombo abamwene babili pakabalilo koka. Pakuti angamughana weka nukumubenga uyunji, pamo angamwivwila weka nukumusula uyunji. Utangabombela vyosi vibili akabalilo koka, u Chala ni ndalama.

Luka 4:8

Panapa u Yesu akamwamula akati, “Amasimbo ghakuti, ‘Umwiputaye u Mwene u Chala wako, sona umubombelaye yuyo mwene!’ ”

Yohani 4:24

U Chala we muzimu, po bosi babo bakumwiputa, bamwiputaye na maka agha Muzimu Umuzelu na mubwanaloli.”

Ukukumbusya Amalamulo 10:20

Mumunyilaye u Mwene u Chala winyu nukumwiputa yuyo mwene. Mubanje mwe basubiliwa kukwache. Mulapilaye mwitabwa lyache lyene.

Ukukumbusya Amalamulo 13:4

Mumukonke nukumunyila u Mwene u Chala winyu. Mughakonke amalamulo ghache nukumwivwila. Mumubombele yuyo mwene, sona mumukakatile.

Ukukumbusya Amalamulo 4:29

Loli nanti mukumulondelezya u Mwene u Chala winyu, bo muli kulakula, sona nanti mukumulondelezya na moyo ghinyu ghosi nu muzimu winyu ghosi, mukwiza pakumwagha.

Ukukumbusya Amalamulo 6:13

Mumuchindikaye u Mwene u Chala winyu, mumubombelaye yuyo mwene. Bo mukulapa ichilapo mulapilaye mwitabwa lyache lyene.

Yoshwa 13:31

sona ni chigaba chimo icha Giliyadi nicha Ashitaloti nicha Edileyi nu twaya utukulu utwa bumwene ubwa Ogi mu Bashani. Ubuzilo bosi bunubu akabagabila ichigaba chimo icha bamunyumba iya Makili umwana uwa Manase pakuba mpyana yabo ukuyana ni nyumba zyabo.

Yoshwa 24:14

“Polelo mumunyile u Mwene nukumubombela mubwanaloli bwinyu bosi. Mwefyemo abachala abanji babo abanyenya binyu bakabiputagha mulubazu lwalusoko ulwa Yufuleti na mu Ijiputi, po mumubombelaye u Mwene.

Yoshwa 24:23

U Yoshwa akanena sona akati, “Losi ulu efya abachala abayeni babo bali pakasi papinyu, po mumupanje u Mwene u Chala uwa Izilayeli amoyo ghinyu ghosi.”

Abalongi 10:16

Po bakabefya abachala abayeni bala pakasi papabo nukumubombela u Mwene. U Mwene akaba ni chitima naba Izilayeli pachifukwa icha mayimba ghabo.

Abalongi 10:6

Aba Izilayeli bakamunangila sona u Mwene, pakamuchindika u Baala nu Ashitoleti na bachala aba ba Siliya na bachala aba ba Sidoni na bachala aba ba Mowabu na bachala aba ba Amoni sona na bachala aba ba Filisiti. Aba Izilayeli bakamukana u Mwene nukuleka pakumubombela.

Abalongi 2:11

Po aba Izilayeli bakamunangila nkani u Mwene nukumwiputa u Baala.

Abalongi 2:13

pachifukwa ichakuti bakamukana u Mwene nukwanda pakumubombela u Baala nu Ashitoleti.

1 Samuweli 31:10

Bakavibika ivilwilo ivya Sabuli munyumba iyakumwiputilamo u Ashitoleti, sona bakaghukomela umuvimba wache kulubumba ulwa lupaso ulwa kaya akakulu nkani aka Beti Shani.