NEHEMIA 8:10 - IBIBILIA INDAKATIFU MU LUTIRICHI LWITAKHO NENDE LWISUKHA

¹⁰ Nalwo lwa Ezira yavavoolela, “Ruli hanu mutsi havundu ha mwenyi. Mwenyekhanga muve numuliitsanga vivana nu mung'wa idivai inuulu; khandi muheekhu vandu vavula shia valia; shichila nalio litukhu litakatifu khu Mwami Nyasaye, uli Nyasaye weru. Muvuli khuvelela khu mu mwoyo, shichila vuyaanzi vu Mwami Nyasaye, navwo vuchilanga numunyola tsingulu.”

NEHEMIA 8:10 Iomraidhean Croise

TSINGANU 17:22

Mwoyo kusangalanga kuli khuli lunyasi lulahi, navutswa mwoyo kwavelela kung'ahitsanga mmbili.

MWILWATSI 9:7

Mutsililile khukhola ka mwenyanga! Mukhole numulia shiukhulia shienyu numwikhoya, khandi mung'wi idivai yenyu numusangala; shichila Nyasaye wamala khulola ndi ka mukholanga ni malahi khuye.

TSABURI 149:2

Munyi Vaisraeli, musangale shichila Muloonji wenyu; vandu va Sayoni, mwikhoye shichila mwami wenyu!

ISAYA 61:10

Niitsa khwikhoyela mu Mwami Nyasaye, niitsa khuva nu vuyaanzi shichila Nyasaye wanje; shichila neye wafwala inguvu yu vuhonyinyi, wafwala ikaanzu yi likhola liu vulunji, khuli musatsa wu mwene mwiiha ali ni shivoho shia mawua, khuli mwiiha yisiahanga ni inguvu yeye yu mulukha ku khuhilana.

VAKORINZO 8:2

Vasuuvili vali mu makanisa kenako vachelitswa vululu muno khuvirila mu vutiinyu vwa kavirilamu; navutswa vuyaanzi vwavo vwali vunyishi muno khali nivava nu mwoyo mulala ku khuhaana, khali niiva vali mu vumanani.

MWILWATSI 3:13

Khutsi voosi khutukha khulii nu khung'wa, khandi khwikhoyele shia khunyolanga khurulana khu muhinzilu kwa khukholanga nu khuchemulila; shichila ni shihanwa shia Nyasaye.

MWILWATSI 2:24

Shindu shivulakhuho shilahi shiu mundu anyala khukhola, khuvira khulia nu khung'wa; khandi khumenya limenya lilahi khurulana khu muhinzilu kwekwe kwa akholanga. Khali ndio, nalola ndi koosi karulanga khu Nyasaye;

MWILWATSI 11:2

Musanje na vandi via muli navio, shichila shiumumanyikhu niiva vutamanu vunyala khumukwila mu shivala shinu tawe.

VAFILIPI 3:4

Nikava nindio, ni kilikali nakharele lisuuvilitsa lianje mu vindu khuli vienevo. Niiva mundu akanakananga anyala khuvikha lisuuvilitsa lielie mu milukha chilondokhananga nu mmbili, inzi ndi ni vivune vinyishi vichilanga ninganakana ndio.

LUKA 11:41

Navutswa muhaane vindu vili mu vikombe vienyu nende mu tsibakuli tsienyu khu vamanani, ma vindu viosi khu munyi vive vinihu.

LWIMBO LULAHI LWENE 5:1

Yivi mwana wi shikhana weru, mwiiha wanje, mali khwinjila mu mulimi kwanje; mbunjelitsanga manemane kaanje halala ni vindu vihuunyanga mwayu mulahi. Nyanyanga inzu yu vushi nende vushi vwene; ning'wa idivai yanje nende maveele.

MWILWATSI 5:18

Khali ndio, mali khulola shindu shilala khuva shilahi. Nu vulahi mundu khulia nu khuva nu vuyaanzi khurulana khu muhinzilu kwa akholanga ni tsingulu nacheemulila mu shivala shinu, khumatukhu mati ka ashili mwoyo, ka Nyasaye yamuha amenye; shichila nako ka yamuviritsila.

YOELI 2:23

“Munyi vandu va Sayoni, musangale, mwikhoyele mu Mwami Nyasaye, uli Nyasaye wenyu; shichila neye wamuha imbula yu khuraanga, wamuha imbula inyishi muno, imbula yu mumatukhu ku khuraaka nende yi shiuvwi, khuli yakholanga khale.

LIKHUNULILWA 11:10

Vandu voosi khulilova valiitsa khuva nu vuyaanzi shichila vandu vavili venavo vamali khukhutsa. Valiitsa khwikhoya nu khuheelelana vihanwa vene khuvene, shichila vaprofeti vavili venavo vachila vandu voosi khulilova nivanyakhana.

SAMWELI 25:8

Reeva varumishi vovo makhuva kenako, navo valiitsa khukhuvoolela ni katoto. Khwitsi khulitukhu liu khwikhoya. Daudi akhureevanga nuyaanza ukhwinjilitsi vulahi muno. Nuyaanza ukhuhe khutsi varumishi vovo nende mulina wowo wa wayaanza Daudi shia shindu shiosi shiulolanga unyala khuvaha.

NEHEMIA 8:11

Khu, vandu vu lwivulu lwa Levi vahonjelitsa vandu voosi vahonjele, nivavoola, “Honjeli, shichila yili nalio litukhu litakatifu. Muvuli khuvelela mu mwoyo.”

NEHEMIA 8:12

Vandu voosi vasimukha nivatsia khulia nu khung'wa, khandi khutsia khuhaakhu vandi shitonye shia valia, khutsia khwikhoya; shichila vahulila makhuva ka vavoolelwa.

ZAKARIA 14:21

Shia inyungu yosi mu Yerusalemi nende Yuda, iliitsa khuva indakatifu khu Mwami Nyasaye wi Mikaanda Chiliihe. Vandu voosi valiitsa khwitsa khusaala, valiitsa khuva vavoholole khurumishila khali indala khu tsinyungu tsienetso khulu khuteshelamu misango chiavo. Khulitukhu lienelo, shiukhuliitsa khuvaho na vakholi vu vukhala mu Litempeli liu Mwami Nyasaye tawe.

1 VAMI 8:66

Solomoni yaseevula vandu khurulaho khulitukhu lia munane. Voosi vitsominya Mwami Solomoni, nivatsia ingo. Vali ni likhoya linyishi muno, khandi nivasangala shichila vindu viosi vilahi, viu Mwami Nyasaye yali nakholele murumishi wewe Daudi nende Vaisraeli.

1 TSINYINGA 16:27

Vukhumi nende vunyali vimuvotokhananga, tsingulu nende vuyaanzi via yitsula mu Litempeli lielie.

TSABURI 89:17

Nivi ukhuheetsanga tsingulu tsiu khuchenyinya tsiu khukuura; khandi uchilanga khuheelwa luyali shichila wakhuyaanza.

ISAYA 49:5

Khali nishili khwivulwa, Mwami Nyasaye yandovola; yakhola khuva murumishi wewe khukalushitsa vandu vuluhia lwa Yakobo khuye, nu khulera khuye mwene Vaisraeli, shichila khali inzi mwene naheelwa luyali imbeli wu Mwami Nyasaye; khandi neye umbetsanga tsingulu.