Mateo 2:12 - Libuka Lya Kuyela

¹² Niho Nyambi abashiwulwile mu mulo ngayi hinga baboka kuli Helonda, pe babokele ku litunga lyabo na nzila yashenge.

Kulimama Kwakupya

¹² Niho Nyambi abashiwulwile mu mulo ngayi hinga baboka kuli Helonda, pe babokele ku litunga lyabo na nzila yashenge.

Mateo 2:12 Iomraidhean Croise

Shitatiko 31:24

Mu mulo ku wushiku wuyo, Nyambi wezile kuli Lambani Kaalemiya na kwamba kukwendi ngayi, “Keya, hinga wambila Yakobo mazu amabi.”

Kututika 1:17

Ngoboni bamboshwa bengile bakakutina Nyambi pe kaliha bombatalile mwene waku Engepita, balehele bana babalume ngayi bayoye.

Ndanyele 2:19

Niho uya wushiku bya kukomokesha byamonekele kuli Ndanyele mu shimonekesho, pe wayemezele Nyambi wa muyilu.

Mateo 1:20

Ngoboni oho ekalile na bihanganiko bya noho, lingeloyi lya Mwene lyalimonekeshele kukwendi mu mulo, pe wambile ngayi, “Obe Yoshefwa mwana Ndavita, hinga utina kuyeka mukazobe Maliya. Ndaba eshe shinamwimitishi sha kufuma ku Moyo wa Kuyela.

Mateo 2:13

Balume bangana oho bayile, lingeloyi lya Mwene lyalimonekeshele kuli Yoshefwa mu mulo ngayi, “Pinduka ushimbe mwana na mandiyendi, pe tininenu ku Engepita. Mukekaleko kuyo hantu nakamitongweze, ndaba Helonda ukushinga mwana ngayi amuzihe.”

Mateo 2:19

Ngoboni oho afwile Helonda, lingeloyi lya Mwene lyalimonekeshele kuli Yoshefwa mu mulo mu Engepita,

Mateo 2:22

Ngoboni oho Yoshefwa ayuvwile ngayi Akelashi unashwana tatiyendi Helonda kwinga mwene wa mu Yundeya, watinine kuyako. Oho Nyambi amushiwulwile mu mulo, wayile ku litunga lya Ngalileya,

Mateo 27:19

Oho Pilato ekalile ha shipona shendi sha kuyatila, mukazendi watumine lizu kukwendi ngayi, “Hinga utenda shamina ku muntu owo wakwoloka nayanda shikuma mu mulo lelo ndaba yendi.”

Luka 2:26

Moyo wa Kuyela walubulwile kukwendi ngayi kukafwa wufwako hantu namono Kilishitu wa Mwene.

Milimo 10:22

Bambile ngayi, “Koniliyashi mukulwane wa banzita niya unatutumu. Wenga muntu wakwoloka, kami mukakuyuvwila Nyambi bowa, wampupo yayiwahe mu litunga lya Bayunda nimwamo. Lingeloyi lya kuyela lyamutongweza ngayi akwihane, uye ku litala lyendi, ngayi ayuvwe ebye ukamba.”

Milimo 4:19

Ngoboni Pita na Yowano baba kumbwile ngayi, “Liyatenu enu bamwine ndi shanafwanini ku meho a Nyambi kuyuvwa byenu kupitakana Nyambi.

Milimo 5:29

Niho Pita na bantumwana bamina bakumbwile ngayi, “Tuku fwanina kwombatala Nyambi kupitakana bantu.

1 Kolinte 3:19

Ndaba ngana za kaye kano zenga zowa kuli Nyambi. Ndaba kwatikitiwa ngayi, “Nyambi uka kwata ba kukeya mu ku shoshoka kwabo.”

Bahebelu 11:7

Na kukulupila, Nowa oho Nyambi amushiwulwile ha byuma bikeza kumbili biya abula ku mona, wombatalile, pe watendele wato muya bapulukilile niye wengile mukakukona kwoloka ndaba ya kukulupila.

Bahebelu 8:5

Eye milimo ba kutenda yenga tuhu shifwanikizo na mumvulu wa byuma bya muyilu. Niho Nyambi abelele Moshesha oho atatikile kutenda ntanda ya kulemeshela ngayi, “Tenda byuma nimwabyo ngonehe shiya nakufundizizile ha lipili.”