Efêsusemiunut 1:18 - Labrador Inuttitut Heritage Bible

¹⁸ Illisimanipsigut ijeᴋartitauᴋovluse ᴋaumarsarsimajunik, nelojungnairᴋovluse ᴋaiᴋojaumajut nerriugijaksanginik, kingormgutijaksaniglo ânanaudlartunik akluiniliksôjunik ivjornaitune,

Efêsusemiunut 1:18 Iomraidhean Croise

Hiobe 42:5

Tussarᴋauvagit siutimnut, ijimalo takkogivâtit mânna.

Imgerut 119:18

Ijîkka uitâtikik takkoᴋovlunga malligaksauᴋojavît tattamnartullininginik.

Jesaiase 11:2

Tâmnalo Nâlekab anerningata tupvigijomârpâ: anernerub sillatunartub illisimanartublo, anernerub issumagiktitsijub pitsartutitsijublo, anernerub illitarsititsijub sivoratitsijublo Nâlekamik.

Jesaiase 29:10

Nâlekab anerneᴋ sinningnartoᴋ kovingmago illipsingnut, ijiselo (tagva:) nallautaijut mattulugit niaᴋoselo (tagva:) takkotitjuteᴋartut ulliklugit.

Jesaiase 29:18

Taipsomane tussângitut aglait oᴋausingit tussaromârpait, tautungitullo ijingit târmit tâᴋtomillo tautugomârput.

Jesaiase 32:3

Takkojullo ijingit takpẽtitaujungnairomârput, tussartullo siutingit hammatsiaromârput.

Jesaiase 42:7

Uititserᴋovlutit tautungitut ijinginik, annititserᴋovlutillo parngnanairsortaujunik parngnanairsimavingmit, târmiuniglo iglomit parngnanairsimajomit.

Jesaiase 6:10

Inuit tâpkoa õmatingit mangaitikit siutingillo tussilartikit, ijingillo takpẽtikit, ijimingnut takkurᴋonnagit, siutimingnut tussarᴋonnagit, õmatimingnullo tukkiserᴋonnagit, sâgiarᴋonnagillo inûlijaurᴋonnagillo.

Mattêuse 13:15

Inuit ukkua ômatingit mangaidlarmata, siutimingnullo tussânerludlarput sikungilarmiglo; ijimingnut takoᴋonagit, siutimingnullo tussarᴋonagit sâgiarᴋonagillo ikajortauvlutik uvamnut.

Markuse 10:17

Anilaungmallo apᴋosinermut, inuit illangata ingiarsijub sêrᴋortorvigilugo aperivâ: Ajungitotit ajoᴋertuijoᴋ, sumik piniartuksauvîk, inôtsemik nâksaungitomik kingormgujerᴋovlungâ?

Lukase 24:45

Tagva nalojungnaitipait, aglangnik tukkisilerᴋovlugit.

Apostelit Piniarningit 16:14

Arnarlo Gûdemik opigosuktok, Lîdiamik atilik, niuverte aupaluktanik (annorânik), Tiatîramiut iglugasaksoanginit pijok, nâletsiarpok; tâpsoma ômatâ Nâlekab angmarpâ, Paulusib oᴋausingit kamagitsiarlugit.

Apostelit Piniarningit 26:18

Ijingit uititaulerᴋovlugit, taᴋtomit sâgiarᴋovlugit ᴋaumajomut, Sâtanasiblo pitsartuninganit Gûdemut; ajorninginit isumangnarungnaitomik kingormgutijaksamiglo pititauᴋovlugit, ivjornaititaujut ilagivlugit, okpernermut uvamut uvamnut.

Rômiunut 11:29

Gûdib tunergutine ᴋaiᴋojininelo ᴋaᴋialerutigingilait.

Rômiunut 2:4

Ubvalo akluininga pitsiarnermik ᴋenuersârnermiglo kamangitsertornermiglo nachogiviûk? ᴋaujimangilatît, Gûdib pitsiarningata tassiormatit ᴋaᴋialernermût?

II Korintemiunut 4:4

Silaᴋsûb tamattoma Gûdingata okpingitut taipkoa issumangît takpêtilauᴋpait, oᴋautsit tussarnertut Kristûsemik, Gûdib adsingata pinnarnarninganik, ᴋaumaningat ᴋaumaᴋonago taipkonunga.

II Korintemiunut 4:6

Gûdele, ᴋaumajomik nuerᴋojijoᴋ tâᴋtomit, ômatiptingne ᴋaumarsaivoᴋ, uvaptigut nellonarungnaititauᴋovlugo illitarsineᴋ Gûdib pinnarnarninganik Jêsusib Kristûsib sângane.

Galâtsiamiunut 5:5

Uvagulle Anernerme utaᴋivogut idluarsititauniarnermik okpernermut nerriugijaksaᴋarluta.

Efêsusemiunut 1:11

Tâpsomûna uvaguttauᴋ kingormgujijuksautitauvogut, sivorngagut anerimajogut issumasimaninganut, tamaitaᴋsoarnik piniartub pijomajame issumasimaninga maliklugo;

Efêsusemiunut 1:7

Tâpsomane piulijauviksaᴋarapta aunganut, tamadja ajornernit issumagijaujungnainermik, saimarsaumik akluiningagut;

Efêsusemiunut 2:12

Ilipse taipsomane Kristuseᴋangitose takorngartauvluselo Israêlib illagêngninganut, takorngartaungmivluse Testamentinut angerutilingnut: nerriugijaksaᴋarase Gûdeᴋaraselo silaᴋsoarmêlauᴋtose;

Efêsusemiunut 3:16

Tâpsomunga tunitsivioᴋovluse pitsartunermik ânanauningata amigangidlarninga maliklugo, sangijôtitauvluse Anerninganut ilupsigut,

Efêsusemiunut 3:8

Uvanga ivjornaitunit tamainit mingnerpângojunga, saimarsaumik tamattominga tunitsiviovunga, nalojunut oᴋâlaᴋovlunga Kristusib akluininganik inornartomik;

Efêsusemiunut 4:1

Tagva mâna kaiblarpapse, uvanga ᴋelaksugaujunga Nâlegaᴋ pivlugo, ᴋaiᴋojaumanise malitsiarlugo arvertarᴋovluse, taimak ᴋaiᴋojaugapse,

Efêsusemiunut 4:4

Time atauseᴋ, anerneᴋ atauseᴋ, sorlotauᴋ ᴋaiᴋojaumagapse nerriugijaksaᴋarluse atautsemik ᴋaiᴋojaumanipsingnut.

Efêsusemiunut 5:8

Mattoma sivorngane târmiolaurapse, mânale ᴋaumaniovose Nâlekame.

Filippimiunut 3:14

Torârviksaᴋ torârvigidlarasuartara, pivianartoᴋsoaᴋ pijomavlugo, tamattomunga Gûde ᴋilangmit ᴋaiᴋojingmat Kristuse Jêsuseme.

Kolossamiunut 1:12

Atâtalo ᴋujagiviklugo, pijungnartilaungmatigut ivsornaitut kingormgujeᴋatigivlugit ᴋaumajome;

Kolossamiunut 1:23

Okpernerme tunganilivluse sôngolerupse sorairase, aulataililuselo oᴋautsit tussarnertut nerriugijauᴋojangine, tussaumajase, oᴋautigijaujut pingortisimajunut tamainut ᴋilaub atânêtunut; tamakkonunga uvanga Pauluse kivgaliarimajunga.

Kolossamiunut 1:27

Gûdib nelonaijaivigijomangmagit nelonartub tamattoma inornadlarninganik nelojune, tâgva Kristûsemik ilupsingnêtomik, ânanâvaksônermik nerriugutiksaujomik.

Kolossamiunut 1:5

Nerriugijaksak pivlugo, ᴋomergutaumajok ilipsingnut piksauvlune ᴋilangme, sivorngagut tussalauktase oᴋautsitigut tussarnertutigut mikseᴋârtutigut.

Kolossamiunut 2:2

Omatingit ᴋaiblartauᴋovlugit ᴋelaksortigêrᴋovlugillo naglingnikut, akluilerᴋovlugillo ilisimajutiksanik tamainik nakimarninangitunik, Gûdemik Atâtamiglo Kristûsemiglo nalonartok illitarilerdlugo.

Kolossamiunut 3:15

Ullapirsaullo Gûdemit pijok ataniotênarle ômatipsingne, tamattomunga ᴋaiᴋojaumagivose atautsemik timeoᴋovluse ᴋujalivigitselo.

I Tessalônikamiunut 2:12

Kigligiutjigaptalo Gûdib nâmagijanganut arvertarᴋovluse, ᴋaiᴋojilauᴋtub ilipsingnik nâlegauvingminullo ânanauvingminullo.

I Tessalônikamiunut 5:8

Uvagulle, uvlub ᴋitorngaringmatigut, silatuniarta; atimavlugik okpernerlo naglingnerlo, sagvingmiutarivlugik, niaᴋôteᴋarlutalo nerriungnermik piulijauniarnermik.

II Tessalônikamiunut 1:11

Tamannalo pivlugo tuksiarutitsainarpapse Gûdiptingnut, pijungnarsititauᴋovluse ᴋaiᴋojauneᴋ tamanna malitsiarungnarlugo, (ilipsingnullo) ajungituliningit tamaita, ᴋuviagijangillo, okpernerublo piniarninga nâmaksititauᴋovlugit pitsartuninganut.

II Tessalônikamiunut 2:16

Nâlegaptale Jêsusib Kristusib (nangmineᴋ), Gûdiptalo Atâtapta, uvaptingnik nagligosuktub, saimarsainerminullo manigornartomik nâksaungitomik, nerriugijaksamiglo ajungitomik tunitjivigilauramitigut,

I Timôteusemut 6:12

Sorsungniarit ajungitomik okpernerub sorsungninganik, inôsek nâksaungitok tiguniaruk, tamattomunga ᴋaiᴋojaumagavit, nalonaigaumiglo ajungitomik nalonailêmavlutit unuktut tussâtilugit kigligiudsijungnartut.

Titusemut 2:13

Nerriugijaksak piloringnartok, Gûdiviksûblo piulijipta Jêsusib Kristûsib sakᴋerniksanga ânanaudlartok utaᴋilugo;

Titusemut 3:7

Uvagut tâpsoma saimarsautânut idluartitaumalertogut, nerriungnermut kingormgujijuksauᴋovluta inôtsemik nâksaungitomik.

Ebrêerinut 10:32

Uvlôlauᴋtulle erᴋaumasigik; taipsomane ᴋaumarsartaumavluse angijomik kappiasuktitaulaurapse, ânianartunik atorluse.

Ebrêerinut 6:4

(Ila) ᴋaumarsartaumalertut, tunergutiniglo ᴋilangmit pijunik ôksimajut, Anernermiglo ajunginermik illangiutititaumajut,

I Pêtrusib 1:3

Nertortaule Gûde Nâlegaptalo Jêsusib Kristusib Atâtanga nâpkiningnersoarminut ernertâripsâlaungmatigut, ômanartomik nerriugijaksaᴋarᴋovluta, Jêsusib Kristusib makininganut toᴋungajunit;

I Pêtrusib 3:9

Ajorneᴋ ajortomut akkiniartaililugo, suagosungnerillônêt suangnermut; ajungitulititsele, ᴋaujimagapse, ᴋairᴋojaumagapse, saimanartolingmik kingormgutijaksaᴋarᴋovluse.

I Pêtrusib 5:10

Gûdible saimanartunik tamainik perᴋutitaliksûb, uvaptingnik ᴋairᴋojijub ânanaunersoarminut issoᴋangitomut Kristuse Jêsusikut, tâpsoma nangmineᴋ âᴋiksorniarpâse nâmaktomik, nakoᴋsitiluselo, pitsartutiluselo tunganilitiluselo, ilipse anikitomik kappiasuktitaujose.