Biblia Todo Logo
Bìoball air-loidhne

- Sanasan -




२ कोरीन्‍थी 6:4 - ल्होमी

4 घन्‍डरङ् झ्‍युङ्‌न अक्, ङीत् को़न्‍ज्‍योक्‍की ॱयोक्‍पु ॱङो़न्‍ने हीम्‍बल थो़ङ्‌गो़त्। गुर् थेक्‍पल, छ्‌यी मी दुक्‍प अयेक्‍प तङल, दुक्‍स्‍यी नोङल, घाबे कप्‍ल,

Faic an caibideil Dèan lethbhreac




२ कोरीन्‍थी 6:4
48 Iomraidhean Croise  

खीत्‍रङ्‌गी हुन्‍दुक् झ्‍यीब गुर्न थीरी देत्‍न ॱनी, हस्‍सो़त् हुनी खीत्‍रङ्‌ल छी थर्व थोप्‍केन् बेत्।


खीत्‍रङ् ङदङ् मत् ढेब देत्‍न ॱनी, खीत्‍रङ्‌ल ॱसीम् दीव युङ्‌गेन् बेत्। हुगो युङ्‌ज्‍येल ङे केच्‍च्‍य घयेत् हीगो ॱस्‍येत्‍न स्‍यक्‍पेन्। जम्‍बुलीङ् हीदु खीत्‍रङ्‌ल दुक्‍प अयेक्‍प नोङ्‌गेन् बेत्। ॱनी हीन्‍न अक्, हुल खीत्‍रङ् ॱलोप्‍स्‍यीक् छ्‌यीजो़त् झ्‍यीन दो़च्‍च्‍यीत्। घन्‍ड हीन् सीन्‍न जम्‍बुलीङ् हीले ङ ज्‍यला थो़न् छर बेत् झ्‍यीब बेत्।


ॱवे इस्राएल्‍की मी घयेस्‍सो, ङे तम् हील नेर्रो झ्‍यी। नासरत्‍की येशु खीत्‍रङ्‌गी ढीक्‍ल को़न्‍ज्‍योक्‍की को़न तङ्‌न युङ खुङ्‌देन् हीन् धङ् मेल्‍ल खोङ्‌गी लक् ज्‍यी़त्‍नी को़न्‍ज्‍योक्‍की ॱस्‍यीक् छ्‌यीम्‍मी़ ले, यम् छेम्‍मे ले धङ् यीक् छ्‌यीम्‍मी़ लेगी ता घयेत् जेप्‍प बेत्। हीगो खीत्‍रङ् घयेक्‍की घुङ्‌दु झ्‍युङ्‌नी, खीत्‍रङ्‌ल हीगो ॱस्‍यो़च्‍च्‍ये यो़क्‍केन् बेत्।


खीत्‍रङ्‌लरङ् ॱस्‍यो़च्‍च्‍ये यो़क्‍केन् बेत्। ङ धङ् ङे छ्‌यीट्‌टो घयेत्‍ल घङ् गो़ब घयेत् ङरङ्‌गी लक्‍प हीगी ले झ्‍यीन सेबेन्।


ॱनी हुल ङे मीङ्‌गी ढीक्‍ल घन्‍दुक्‍मे दुक्‍प नोङ्‌गेन् बेक्‍क हुगो ङे ॱह घोदु ची़क्‍केन् सीन्‍न ॱङान तङ बेत्।


ॱसु हुन्‍दुक् झ्‍यीबे लेमुल देत्‍न ख्रीष्‍ट्‌ल स्‍यप्‍च्‍यी़ ज्‍युक्‍कुक्‍क हुगोल को़न्‍ज्‍योक् थु गुव धङ् मी घयेक्‍की इक् गस्‍सी हीम्‍ब छोर्केन् बेत्।


ख्रीष्‍ट्‌तङ् मत् ढेबल तेम्‍बर्ल थो़न्‍न यो़क्‍केन् अपेल्‍लेस्‍ल ङे छ्‌यक्‍सुम् थेमु यो़दो। ॱनी अरीसतोबुलस्‍की मीजङ् घयेत्‍ल ङे छ्‌यक्‍सुम् थेमु यो़दो।


हज्‍यरङ्‌गी ढङ्‌बु मत् झ्‍यीब दीगी को़न्‍ज्‍योक् ढङ्‌बु यो़प्‍प दी हरुङ् ॱसेदु थोङ्‌गेन् बेत् ॱनो़ब छ्‌यको़र्प्‍प न? हील हज्‍यरङ् घन्‍ड सीक्‍केन्? हज्‍यरङ्‌ल को़न्‍ज्‍योक्‍की खोङ्‌डोक्‍की छ्‌येप्‍प केन ॱनी, खोङ् ढङ्‌ज्‍ये मीप्‍पल डोगेन् बेक्‍क ॱनी? ङे हीगो कोलीमीगी लुसल डीक्‍प सीक्‍को़त्।


ॱनी हुगो डस्‍सी मेम्‍ब, हज्‍यरङ् मी दीक्‍च्‍येन् हीम्‍ब झ्‍यीनी इक्, ख्रीष्‍ट् हज्‍यरङ्‌गी ढीक्‍ल ढोङ बेत्। ॱनी हीगो को़न्‍ज्‍योक्‍की हज्‍यरङ्‌ल घन्‍दुक्‍मे झ्‍यम्‍ब छ्‌यीय जेक्‍कुक्‍क हुगो तो़म्‍बल डोगेन् बेत्।


अपोल्‍लोस् घन्‍ड बेक्‍क? पावल् घन्‍ड बेक्‍क? ङीत् चोव ज्‍यीन्‍दक्‍की ॱनङे ले रीदङ् री झ्‍यीक्‍केर्रङ् हीन्। ङीत् च्‍येन्‍नी क खीत्‍रङ् छ्‌य स्‍योक्‍केल्‍ल झ्‍युङ बेत्। ङीत् हुन्‍दुक् झ्‍यीक्‍केन् को़न्‍ज्‍योक्‍की ॱयोक्‍पुरङ् क हीन्।


ङीत् ॱङी को़न्‍ज्‍योक्‍की एल्‍ला ॱमत् तो़म्‍बे खोङ्‌गी धो़ङ्‌गी ॱङीङ्‌बु गेन् खुर्न ॱस्‍यो़क्‍केल्‍ल को़बे ख्रीष्‍ट्‌की ॱयोक्‍पु हीम्‍ब मी कुरीक्‍की ॱसम्‍ज्‍यीत्।


धम्‍बे थुनी झ्‍युङे ॱसो़न् ङीक्‍की खीत्‍रङ्‌गी घुङ्‌दु तबेन्। हीगो झ्‍यीनी ङीक्‍की सी़ल फेम्‍बे खोज्‍येत् ङीत्‍ल थोप्‍को़ यो़प्‍पे तो़न्‍दोक् हुगो खीत्‍रङ् च्‍यानी ङीक्‍की दी़न अक्, स्‍येन् मत् ओ़ब त मीत् युङ यो़त्।


हुबे रोरङ्‌सो ख्रीष्‍ट्‌की ॱयोक्‍पु हीन् सीगुक्। ॱनी ङ ॱनोबु डस्‍सी झ्‍यीक्‍केन् हीनो। ङ ॱसुम्‍ब हुले ज्‍येबा यो़त्। हुबले ज्‍यीक्‍पागी कले ङे च्‍येप्‍पेन्। हुबले मङा ङ चो़ल्‍ल ॱस्‍योर्च्‍युङ्। हुबले ज्‍यीक्‍पा ङल डेङ्‌ज्‍यक् बेन्‍ज्‍युङ्। लेम्‍म गज्‍येन् ङ ॱस्‍यीयल थुक्‍च्‍युङ्।


कले च्‍यो़प्‍प धङ् दुक्‍स्‍यी गज्‍येन् झ्‍युङ्। लेम्‍म गज्‍येन् ॱङीत्‍मीत्‍ल, तोबल धङ् कोम्‍बल लेज्‍युङ्। सम मत् सेबल लेम्‍म गज्‍येन् दो़त् गो़ ॱस्‍यर्च्‍युङ्। घो़ मीप्‍पल छ्‌याबल लेम्‍म गज्‍येन् लेज्‍युङ्।


ङ हुदु खीत्‍रङ्‌दङ् दल दो़प्‍पे यङ्‌ल ङल गो़बे खोज्‍येत् घयेक्‍की ढीक्‍ल ङे खीत्‍रङ् ॱसुल आक् गेन् ॱमत् के। ङल मीत् स्‍यङ घङ् यो़प्‍प घयेत् मासीडोनीयागी लुङ्‌बनी युङे पी़न्‍ज्‍या घयेक्‍की बीन्‍ज्‍युङ्। ॱनी हुन्‍दुक् झ्‍यीन खीत्‍रङ्‌ल ङे घन्‍डे ढीक्‍ल अक् गेन् ॱमीत् को़ ॱनो़न तोक्‍स्‍यीप् झ्‍यीन देप्‍पेन्। ॱनी हरुङ् तीङ्‌ला आक् हुन्‍दुक् दीरङ् झ्‍यीच्‍च्‍ये ॱनो़ब यो़त्।


हुगो झ्‍यीनी ख्रीष्‍ट्‌की धो़ङ्‌गी ढीक्‍ल ङ ज्‍यीक्‍च्‍ये मीप्‍प युङल, ॱम पप्‍न युङल, दुक्‍स्‍यी नोङल, ड घयेक्‍की दुक्‍प अयेक्‍प तङल, खम्‍द घाबोक्‍म युङल गव झ्‍यीन दो़क्‍को़त्। घन्‍ड हीन् सीन्‍न हीगो डस्‍सी ज्‍यीक्‍च्‍ये मीप्‍पे कप्‍ल ङ ज्‍यीक्‍पोक्‍मल थो़ङ्‌गो़त्।


ङ ठीक्‍नल गन्‍दीय हीम्‍ब खीत्‍रङ्‌गी ॱह घोज्‍ये यो़प्‍पल खीत्‍रङ्‌गी घुङ्‌दु ङे धु च्‍यङ्‌न ले झ्‍यीप्‍पे यङ्‌ल यीक् छ्‌यीम्‍मी़ लेगी ता, यम् छेम्‍मे ले धङ् ॱस्‍यीक् छ्‌यीम्‍मी़ ले घयेत् ङ च्‍यानी को़न्‍ज्‍योक्‍की जेप्‍प बेत्।


को़न्‍ज्‍योक्‍की ढीक्‍ल मी गज्‍येङ्‌गी छोङ् डस्‍सी झ्‍यीन रोरङ्‌सो़ युङ्‌ज्‍यी़ तेन तम् ॱस्‍यो़क्‍केन् बेत्। ॱनी ङीत् हुब डस्‍सी मेम्‍ब, को़न्‍ज्‍योक्‍की को़बे मी झ्‍यीनी, खोङ्‌गी ढुङ्‌दु ङीक्‍की ॱसीम् चङ्‌म खुर्न ख्रीष्‍ट्‌की ॱयोक्‍पु झ्‍यीन ॱस्‍यो़क्‍केन् हीन्।


ङीत् खोङ्‌गी कगो़त् धम्‍स्‍यक् ॱसम्‍बे स्‍यप्‍च्‍यी़ ज्‍युक्‍केल्‍ल ओ़बे मील सो़ज्‍युङ्। हीगी कगो़त् धम्‍स्‍यक् हीगो यीगील ढीब हुगो डस्‍सीगी लुल मेम्‍ब, धम्‍बे थुगी लुल यो़क्‍केन् बेत्। यीगील ढीब हुगी च्‍यानी ॱस्‍यीव युङ्‌गेन् बेत्। ॱनी धम्‍बे थु च्‍यानी छी युङ्‌गेन् बेत्।


हुन्‍दो ॱरीप्‍चो़त् च्‍यीक्‍की ढीक्‍ल नोङे दुक्‍प घयेत् हीगो नन्‍दक्‍की छ्‌यीय मेम्‍बेत्। ॱनी हीगो ङीक्‍की गुर्न युङ्‌न ॱनी, तीङ्‌ला फुगी ढीक्‍ल थोप्‍केङ्‌गी तो़प्‍प दी हुले गज्‍येङ्‌गी ज्‍येबा युङ्‌गेन् बेत्।


केत्‍मीक्‍की ङु छागी ले घयेत्, ॱयोज्‍यी़ ठम्‍ज्‍यी़गी ले धङ् को़न्‍ज्‍योक्‍की ॱसुङ्‌रप् ॱहेन्‍ज्‍योक्‍प ॱस्‍यो़क्‍केङ्‌गी ले घयेत् ङीक्‍की फङ्‌न स्‍यक्‍पेन्। बोर को़न्‍ज्‍योक्‍की ढुङ्‌दु सङ् ङेन् नम् च्‍यो़त् ॱस्‍यीगेन्, मी रीदङ् रीगी ङीक्‍की केच्‍च्‍य दी दीम्‍ब हीम्‍ब ॱह घो छुज्‍येल ङीक्‍की मी घयेत्‍ल केच्‍च्‍येल्‍ल तो़न्‍न ॱस्‍यो़क्‍को़त्।


ख ख ॱसोस्‍सोनी ङीत्‍ल च्‍युर्तु युङ्‌गुक्। ॱनी हीन्‍न अक्, ङीत् नम्‍ल अक् ॱमीत् छ्‌युर यो़त्। गो थोम्‍दु युङ्‌गुक्। ॱनी हीन्‍न अक्, ॱअयु छ्‌यक्‍प मीत् युङ यो़त्।


को़न्‍ज्‍योक्‍की थुल डीक्‍पे ॱसीम्‍दुक् झ्‍युङ हुगी खीत्‍रङ्‌ल घन्‍दुक् झ्‍यीबे डेबु छ्‌याब बेक्‍क हुल तो़। घन्‍दुक्‍मे धेप्‍प छ्‌यीयल झ्‍युङ बेक्‍क। हुगी ङीब हुल खीत्‍रङ्‌गी मेङ्‌गी मेन् सीक्‍केल्‍ल झ्‍युङ बेत्। हुगी ङीबे ढीक्‍ल खीत्‍रङ् ॱयोङ्‌म घयेत् घन्‍दुक्‍मे खोङ्‌डोक् झ्‍युङ बेक्‍क। घन्‍दुक्‍मे ज्‍यीब झ्‍यीक्‍को़प्‍प। ङल घन्‍दुक्‍मे ढेम्‍ब झ्‍यीगो़प्‍प। ङ ङो़ल हुन्‍दुक्‍मे छ्‌योरीगी ज्‍यीक्‍प झ्‍युङ्‌न, हुल म दीरङ् छ्‌येप्‍प को़ज्‍ये ॱनो़ब झ्‍यीक्‍केन् बेत्। हुन्‍दुक् झ्‍यीन हुगी ढीक्‍ल खीत्‍रङ् घन्‍डल अक् धक्‍पर् झ्‍यीन नक्‍चक् मीप्‍पल थो़न्‍दुक्।


ॱनी हरुङ् गुर् थेक्‍प धङ् ङङ्‌रीन् झ्‍यीप्‍पल तो़त्‍वङ् छ्‌यीम्‍मु च्‍येम्‍मे को़न्‍ज्‍योक्‍की ॱस्‍यीक् दी खीत्‍रङ्‌ल ॱङीच्‍च्‍ये यो़प्‍प तोङ् सीन्‍न को़न्‍ज्‍योक्‍ल स्‍युदेन् ज्‍यक्‍को़त्।


खीत्‍रङ्‌ल फेम्‍ब युङे ढीक्‍ल हुन्‍दो ङल यो़प्‍पे दुक्‍प हील ङ गेस दुक्। घन्‍ड हीन् सीन्‍न ख्रीष्‍ट्‌की सी़बु हीम्‍बे छ्‌यो़ छोल फेम्‍ब युङे ढीक्‍ल ख्रीष्‍ट्‌की दुक्‍स्‍यी ॱमत् छङ दी ङे ङरङ्‌गी सी़ल गुर्न छङल सोगो़त्।


पी़न्‍ज्‍यासो, खीत्‍रङ्‌गी छ्‌य स्‍यक्‍प दी डम्‍सी दुक् सीर ॱह घोनी, ङीत्‍ल नोङे दुक्‍ङा धङ् दुक्‍प हील ॱलोप्‍स्‍यीक् ॱङीच्‍च्‍युङ्।


ॱनी पी़न्‍ज्‍यासो, खीत्‍रङ्‌ल हरुङ् ॱलोप्‍स ज्‍यक्‍केन् हीनो। खीत्‍रङ् नङ्‌दु ॱअर्स्‍यीय गीर्च्‍यम् ॱस्‍यो़क्‍केन् घयेत्‍ल लप्‍स्‍य तोङ्‌ज्‍यीत्। ॱङीङ् च्‍युङेत्‍मु च्‍येम्‍म घयेत्‍ल ॱलोप्‍स्‍यीक् टो़च्‍च्‍यीत्। ॱलोप्‍स्‍यीक् मीप्‍पे मी योक् योक्‍म घयेत्‍ल रोरम् झ्‍यीज्‍यीत्। मी कुरीक्‍तङ् ङङ्‌रीन् झ्‍यीज्‍यीत्।


म दी भुमी़ मीजील भीज कीगेङ्‌गी लेमु हुगो युङ्‌गेन् बेत्। भुमु रोरङ्‌सो़ छ्‌य स्‍यक्‍प दील तेम्‍बोक्‍म झ्‍यीन, झ्‍यम्‍ब धङ् धक्‍पर् युङल खेजो़त् झ्‍यीन युङ्‌न ॱनी, छी थर्वल थो़ङ्‌गेन् बेत्।


ङे ॱस्‍येप्‍पे केच्‍च्‍य घयेत् हीगो रङ्‌गी उन यो़प्‍पे पी़न्‍ज्‍या घयेत्‍ल ॱस्‍येत्‍न बीन्‍न ॱनी, रङ् ख्रीष्‍ट् येशुगी स्‍यप्‍च्‍यी़ब गङ्‌ज्‍येन् हीम्‍ब युङ्‌गेन् बेत्। हुनी रङ्‌गी छ्‌य स्‍यक्‍पे लेमी़ केच्‍च्‍ये लम् दीनी धङ् रङ्‌गी चीन युङे दीम्‍बे ॱलोप्‍स दीनी रङ्‌गी ॱसीम्‍ल आक् खङ्‌गी डुप्‍केन् बेत्।


रङ् को़न्‍ज्‍योक्‍की मी हीम्‍ब झ्‍यीनी, हुन्‍दुक् झ्‍यीबे ढङ् घयेत्‍नी भीन दो़च्‍च्‍यीत्। हुनी ढङ्‌बु, को़न्‍ज्‍योक् गुवे छ्‌यलु, छ्‌य तेम्‍बर्, झ्‍यम्‍ब, धु धङ् ॱम ॱयुङ्‌बोक्‍म झ्‍यीच्‍च्‍ये ॱनो़बे ॱसीम् खुर्च्‍यीत्।


हुगो झ्‍यीनी हज्‍यरङ्‌गी चोव ज्‍यीन्‍दक्‍की ढीक्‍की केच्‍च्‍य ॱस्‍येत्‍न टो़प्‍पल ङु छय मत् झ्‍यीज्‍यीत्। खोङ्‌गी ढीक्‍ल चो़ल्‍ल ॱस्‍योर्न यो़क्‍केन् ङे ढीक्‍ल अक् ङु छय मत् झ्‍यीज्‍यीत्। बोर केच्‍च्‍य ॱनेम्‍बी़ ढीक्‍ल नोङे दुक्‍प रङ्‌गी इक् गुर्च्‍यीत्। हुल पीबे ॱस्‍यीक् को़न्‍ज्‍योक्‍की ॱनङ्‌गेन् बेत्।


चोव ज्‍यीन्‍दक्‍की ॱयोक्‍पी़ ठुक्‍प ज्‍यक्‍च्‍ये मीत् युङ्‌गेन् बेत्। कुरीक्‍तङ् जन्‍दीक्‍म झ्‍यीक्‍केन्, ॱलोप्‍स खेसी ज्‍यक् ॱस्‍यीगेन्, ङङ्‌रीन् च्‍येम्‍म धङ्


हुब डस्‍सी मेम्‍ब, रङ्‌ल गदुक् घन्‍ड झ्‍युङ्‌न अक्, ॱसीम् च्‍यङ्‌जो़त् झ्‍यीन दो़च्‍च्‍यीत्। गुर् थेक्‍प झ्‍यीज्‍यीत्। केच्‍च्‍य ॱनेम्‍बु ॱस्‍यो़च्‍च्‍येमे ले दी झ्‍यीन रङ्‌गी गेल्‍ल यो़प्‍पे को़न्‍ज्‍योक्‍की स्‍यप्‍च्‍यी़गी ले दी डुब झ्‍यीज्‍यीत्।


हज्‍यरङ्‌ल छ्‌य स्‍योक्‍ली़ ॱमीदे तो़ङ्‌गेन् घयेत् म दीरङ् तीक् खीरी गज्‍येन् यो़क्‍केन् बेत्। हुगो झ्‍यीनी हज्‍यरङ्‌ल ॱनो़ङ्‌गेङ्‌गी खेद घयेत् धङ् येक्‍योक्‍ल युङ्‌गेङ्‌गी दीक्‍प घयेत् फङ्‌न हज्‍यरङ् डोस्‍से लम् दील ज्‍येबर् थो़न्‍ज्‍ये यो़प्‍पल धु च्‍यङ्‌न ज्‍युदोङ्‌ज्‍यीत्।


खीत्‍रङ्‌गी पी़न्‍ज्‍या ङ युहन्‍ना येशुदङ् मत् ढेब यो़प्‍पल खोङ्‌गी ढीक्‍ल दुक्‍प धङ् खोङ्‌गी ज्‍यागक्‍की मीस्‍सीर् हीम्‍बल धङ् गुर् थेक्‍पल खीत्‍रङ्‌दङ् कीदुक् च्‍यीक्‍प यो़त्। को़न्‍ज्‍योक्‍की केच्‍च्‍य धङ् येशुगी ढीक्‍की केच्‍च्‍य ॱस्‍येप्‍पे ढीक्‍ल ङ छ्‌यु ज्‍यम्‍जो छ्‌यीम्‍मी़ घुङ्‌गी ॱसने पत्‍मोस् झ्‍यीस्‍स च्‍यीक्‍तु च्‍येज्‍युङ्।


ङे केच्‍च्‍यल नेन्‍न खीत्‍रङ्‌गी धु छ्‌यीम्‍मु च्‍यङ्‌न थीरी देत्‍तुक्। हुगो झ्‍यीनी जम्‍लीङ् की़ङ्‌गी मी घयेत्‍ल युङ्‌गेङ्‌गी छो़त्‍लीङ्‌गी दुक्‍प हुगी लक्‍नी खीत्‍रङ् ङे छ्‌योप्‍न स्‍योक्‍केन्।


Lean sinn:

Sanasan


Sanasan