Why. 7:12 - Alkitab bahasa Luang

¹² Honona re riwra: “Amin (Plola)! Uplerlawna-Mempulwatnu mak ama'uli-mawedi mhu'ru-mhelma muh' idma-mrama lia'ara, Omdien la liwangenmu-mtatangenmu, Mutulu-mupetna Mupriri-mukded la'a genmu-tienmu. O' nanpena plollolli me kirkirmu-ralma-riormu ed mak ama'uli-mawedi la'a genmu-tienmu makden la tutullu-lolo'oni. O' ed mak ktorna plolli-mneheni pa nodi liarni. O' ed mak ama'uli-mawedi mhu'ru-mhelma pa nodi liarni. Amin.”

Why. 7:12 Iomraidhean Croise

Nhiara 100:4

Mliola roma kreini nhiar lawanni de, mriarin de miodia nhiar maka ha ra ra'uli-rawedi E'a onnila hya' ed maka Nhi' nana. La'pa mlier la roma krei herni-gaini de mi'uli-miwedia mlilili-mmiamuawua E mak kdella tutullu-lolo'oni.

Nhiara 106:48

Ya'uli-yawedi nden rer lia O'a, de riy Israel Uplerlawanni. Ma'uli-mawedia mhu'ru-mhelma O'a la dodo'ondi pa nodia la tuwu-tuwu pa nodi liarni. Mmiai pia it hononita makdella noh di wawannu takota “Plola (Amin)”. Ya'uli-yawedi la'a Itmatromlawanni, Makdenrer die. Haleluya!

Nhiara 107:22

Riy mak kler la hare honona re mmiai pia miodi nhiurliwtu-wnialodaw la Itmatromlawanni roma kreini totpa mi'uli-miwedia E'a onnila hya' ed maka ha Nhi' nana, ne totpena mpiahniar pa mihepur nohora E hihi'ini-yapyapni la'a miy rerieini.

Nhiara 116:17

Hota agodia nhiurliwtu-wnialodaw la O'a totpena asiumbain pa u'uli-uwedi O'a.

Nhiara 147:7

Mmiai pia twahniar nohora nhiar ya'uli-yawedi la Itmatromlawanni Makdenrer die, de tala tiwla-prai hitara-fiola ta tamuki-tahepur nohora it Uplerlawanni.

Nhiara 41:13

Omtiulan la mai a'u yoma a ralmu e naplele'er la O'a, me Omual a' pua gor O' talan pa tden rewre'wa la geni-tiena id pa nodi liarni.

Nhiara 50:14

Mere la' hya' ed maka Awuahaka de, totpena mi'uli-miwedi A'u, onnila Agal olek la miy wia. Hade emeknekama nhioi-tniani maka miala mai A'u. Me Awuak pa mhioratreria hya' mak ha mikottaru la'a A'u Makden la Tutullu-Lolo'oni, pa hota mhi' nana re.

Nhiara 72:19

Ya'uli-yawedi nden rer lia E nanni mak kden la tutullu-lolo'oni pa nodi liarni. Awuak pa mai noha wawannu di riy honona ramkek nan memna E plolli-mneheni, preheni-mkaini, kalwiedni-paitiotni, hititni-repreparni. Hade emkade naplol toto' memna! (Amin).

Nhiara 89:52

Matroma Makdenreri O'a! Matroma! Arwalmu re honona rapolu-raliella ray miaka ha Mpualir niana. La'pa lol meni-meni to' mana rlernohora pa rapolu-raliella.

Nhiara 95:2

Mmiai pia tala kieha-nhiara ta twatroma-tahneiya, pa ta'uli-tawedi E'a yoma hya' maka Nhi' nan oleka la mai ita.

Yunus 2:9

Mere a' di de hota agal hoihoi-tantiani la' O'a de awuatunu-wuahniar pa ga'uli-uwed re'ru. Ne la'a hya' maka a'g wuettar tiy O'a de hota gala. ORGAHI-ORHA'A, plollolli de O' inhatta ed maka kamori-kalewn rimormiori.”

Mat. 6:13

Yana Muolin doin limmu-mpue'er rormu mai ami, yanpa la'pa hegana-kawnu rta'ag am die, hota amler la do'a-hala ralamni. Mere Muwohor doinia hegana rurni-karatni mai ami. [O' ed mak ktoran reria lodna-hairi me Mumrehi-mumda'ar nohora hititmu-repreparmu pa nodi liarni. Amin (Plola).]

Roma 11:36

Yoma Uplerlawna ed mak kakoki-kayapi hare honona. E' ed mak kodi plolli la hare honona, me Enakoki-nayapi hare honona pa nodia ya'uli-yawedi la E'a. Pede ina-nara ama-hyali, mai pia ta'uli-tawedi tamuki-tahepur la Orgahi-Orha'a Uplerlawna-Mempulwatnu pa nodi liarni. Amin (Plola).

1Kor. 14:16

Itawalliohor owa'ana la'pa hota mi'uli-miwedia Uplerlawna la krei wokni-le'enu, de miala yawala maka riy raplinu, ne riy mak katlina de edonna nna'erit nana yawal de mak kwatiawu Uplerlawna Nhiwni, pede ta'enniana nweta “plola” (amin) la' miy sniumbainmi de, yoma e' ta'enniana nna'erit nana hya' ed mak ha mikotkota.

2Kor. 4:15

Amler la kropna-krieutu honona re de, e rperkun tiy miy. Ne hota riy ra'ititar rer lia rmai pia rat niohora Uplerlawna ralam kalwiedni. Ne hota la' hade totpa rira liawanni mana rsumbain pa ra'uli-rawedia Uplerlawna. La' hade pede ya'uli-yawedi nden rer lia Uplerlawna-Mempulwatnu.

Kolose 2:7

Miga'ar temn olek la E'a, pede hota yeher to' pa mpialiewna totpena pesiaymi la Yesus Kristus la' ga'a me pesiaymi narur lia wniatutu-wniaye'a maka ha rwatut tiarg oleka tiy miy die. Ne ihrami ralamni mana rahepur nohor la pa mi'uli-miwedia Uplerlawna.

Kolose 3:17

La' hya' ed mak miltieri-mitiana onde mhi'a-myapia de, mhi' emeknekama mak kla' nana Itmatromni Yesus Kristus ralamni, pa emolmolan nekama mak klernohor E'a rhi' nana. Me mhi' hare de mi'uli-miwed reria Uplerlawna-Mempulwatnu it Amlawanni de, lola Yesus Kristus.

Why. 1:18

Mak kmormiori pia nodi liarni. Amuati olekwa, mere oh! Dodo'ondi Amuor pia nodi liarni. A'g e ed mak kodi plolli la matmiati ne god plolli la noh mati-rai miolu pa A'umori owa'ana riy mak kmati olekwa re pa emolmolan nekama riy mak ktorna konsi, de nodi plolli pa nharia nhiari totpa riy rlergot la roma nhio'la.

Why. 19:4

Dewade o'ta-mata riy terampworu wehrani wogata re ror wut nieka hamormiori re wogata ruh' idma-rrama lia'ar la Uplerlawna mak kamtatna la liwangen tiutullu pa riwra: “Amin Haleluya! Mai pia ta'uli-tawedi Uplerlawna.”