Ester 3:4 - Alkitab bahasa Luang

⁴ Ne la' lera-ler nekpa riy rakot la pa natlina-natailla tit de mere Mordekhai edonna nha'wa nan etia lira ida. Mordekhai nakot la re niwra: “Ama-hyal miy re, a' di de riy Yahudi id a'u, pede taken niana aghi' nana.” Dewade rla rod lir la Haman, totpena rat muemna hota Haman nawenan pa nhukmua Mordekhai onnila hihi'ini-yapyapni de me edonna?

Ester 3:4 Iomraidhean Croise

Puka Pianullu 39:10

La'a lera-ler to' pa patke' de naga'aga, mere Yusup edon natlin la gaga'anu de pa nanin la onni totpa rrora rdudu-rnei, ne e' mana edon nor wali upni-matromni hawni de nor wutga la kamri ida.

Ester 3:3

Noma o'ta-mata dom mak kar lia ray lodanni-hairni la'a ray kruwun genni de rma pa ratian la'a-mai Mordekhai niwra: “Hya'a nariei pia o' edonna mutlin la' ray titni dena?!”

Ester 3:5

La' hade na'nama Haman e nat niohora de Mordekhai edonna nhu'ru-nhelma onde nwaltiora-nwalteman la, dewade Haman nahankeran rer lia.

Dan. 3:12

Mere, tuna, riy Yahudi maka tuna ha nran oleka totpena rre'ela rodi plolli la mai it nohoni-raini Babel di, de ir er maka edonna kwadana tuna titni. Maka edonna kwadana re de Sadrak, Mesak, me Abednego. Ir er mak edonna khu'ru-khelam la tuna atiehrani de me edonna rlernohora pa rhoi-rtania uplera-upmati dom maka nhi'inde tuna ha nhoi-ntania re.”

Dan. 6:13

Dewade honnona re rla rto'ona Daniel la'a ray. Rakot la ray riwra: “Tun ray, emkamenila horat maka omtiern oleka o' okarmu pa o' e mliarna yana riy rsumbain la pesiayni la'a hya'a-hya' to'a onde la'a rimormior miaka kapesarna maiya noha wawannu? Eneknek to'a me rpolu-rwakla la'a tuna nmeh'a toh?! Ne he' ed maka ktutg kapesaranni de rkamit nana pa rrinia la singa lienni ralamni.” Noma ray nakot la re niwra: “Plola tita la horta-hair de ha nwali olek la deulu-tatra mai Media nora Persia pa hota riy ta'enniana nwayotlia onde edonna natlina-natailla.”

Yunus 1:9

Noma Yunus nwalolla niwra: “A' di de riy Ibrani miaka kola tieru-kawur nehla la ORGAHI-ORHA'A de Uplerlawna makdella Ilyamou-Watyatoha. E' ed mak kakoki-kayap niana gera-tahi' la'pa nohkerna-rai miaran di honona.”