Lóom 1:1 - Nomaande

¹ Yaŋɔ́ Bóol, ɛ ŋa mɛ́ banɔ́ ɔ́ɔ́ŋɛ́na nufule eenu ; ya mɛ́ŋa munyiɔnɔ mu *Yésus *Kilís. *Bandɔ́mɛsɛ́ ŋa mɛ lɔ́tɔ́, yɔ́ mɛ tɔ́ma *ɔɔcɔ u ɛndɔ́ma o okohúlinyi baacɔ yááyɛ́ Ambányɛ yɛ́ Ɛsɔ́ma.

Lóom 1:1 Iomraidhean Croise

Malɛ́kus 1:14

Yésus ŋeé súété a *Kalilé, u húlé húlikinyi baacɔ Ambányɛ yɛ́ Ɛsɔ́ma yɛ́ Bandɔ́mɛsɛ́. Bá ŋaá bá ɛ́cɛ bá maá hátɛna Sáaŋ, bó wuúci háya eé ciíbe cɛ ɛcaná.

Sáaŋ 12:26

Mbɔ́kɔ ɔɔcɔ ŋaá yáamba ɔ mɛ nyiɔnɔ, wá mɛ látáka ; haála ahá ya mɛ́ŋa, hɔ́á tɔ́na muamɛ munyiɔnɔ káá bá. Mbɔ́kɔ ɔɔcɔ ŋaá mɛ́ nyiɔnɔ, ciamɛ Síkíne kéé wuúci lémbíki.

Sáaŋ 15:15

I ti ŋé túné ámɛ banɔ́ lɔ́ŋɔ anyía bɔnyiɔnɔ, anyía munyiɔnɔ ti ŋé ményi bɔkɔ ebú síkíne ci buólí ŋa kɛ́la. Ɛ ŋa mɛ́ banɔ́ lɔ́ŋɔ anyía bíámɛ bikendinyi, anyía ɛ́ ma mɛ́ banɔ́ láakɛna bɛsana bikime abɛ́ ɛ ŋaá mɛ áákɔ́nákɛ́ná ná ciamɛ Síkíne anyía nuénú biíbi menyi.

Sáaŋ 15:20

Ánɔ bɛ́tááka, ɛ́ ŋaá mɛ banɔ́ láana ɛsɛ́ : Munyiɔnɔ ta mumɔtɛ́ tɛ ŋáa hɔ́la ciayɛ́ síkíne ci buólí. Hú yaŋɔ́ bébú mi tekeseke, mbá anyána aná na banɔ́ e ? Mbɔ́kɔ bá ŋá bɔ́ látákɛ́na úúmi ɔtáŋa, bá ká bɔ́ látákɛ́na tɔ́na úúnú.

Buólí 13:9

Aáná Sóol, ooci awɔ́ bɔ́ ŋɔɔ́ lɔ́ŋɔ tɔ́na anyía Bóol, ŋaá bá onyíóyónó ne Efúúménénú yí Elilé, u ŋeé bísíémúkúnyí Elimas,

Buólí 20:24

Mbá, aá yaŋɔ́ ɛ tɛ ŋá mɛ́ lɛca uumi olíhe háyɛ yaandándá yɛ́ bɔkɔ mbɔ́kɔ i ŋé mi wé ; bɔkɔ ebú bú ŋeé mi bíléníne áŋa anyía yámɛ cɔbá ne buúse o onyíóyísínyi búámɛ bɔsɔ́ma háyɛ yɛ́ ŋaá bɛ́amba, mbá i kuenyinyi ɔnyiɔ buólí abɔ́ Otéŋí a Waáŋá Yésus ŋeé mi iínjíé. Búáŋa anyía yémí hulíkínyi baacɔ Ambányɛ yɛ́ Ɛsɔ́ma yɛ́ yaála yí nuubo yɛ́ Bandɔ́mɛsɛ́.

Buólí 21:40

Aáná mutéŋínyi bicénji a muáŋá ŋeé lúmítíne. Bóol ŋá tálɛ́mɛ́na ɛndánáka a bɛbáátɛ́ná bɛ́ hɛkáká a hiáŋá, u ŋá nandɔ́na na ɔɔbɔ́. Baacɔ ŋé lésíkínyi mbuumu, u ŋé túme ɔtáŋa náábɔ́ ne *nuebélé ɔsɛ :

Buólí 22:21

Mbá Otéŋí a Waáŋá ɔsɛ : “Buaka, cɔbá yáaŋa, anyía ɛ ká mɛ́ ɔ tɔ́ma haaca né eebe a bá tɛ ábɔ́ bá *Besuif.” »

Buólí 22:7

Ɛ ŋa mɛ́ kuá ɔ ɔmɛsɛ́, ɛ ŋá lɔ́kɔ́ma okelú áa mɛ bataka ɔ́sɛ : “Sóol, Sóol, anyíatɛ́ o ŋo mí tekese aná e ?”

Buólí 26:1

Mbá Akílíba ŋá laána Bóol ɔsɛ : « Ɔ wáaŋa na makɛ́nda ma ɔbɛ́káláka aámbáya. » Aáná Bóol ŋaá nándɔ́na ɔɔbɔ́, u ŋe túmé ɔbɛ́kála ɔsɛ :

Buólí 26:14

Aáná tu ŋa sɔ́ kuákɔ́na basɔ́ bekime ɔ ɔmɛsɛ́, míɔ lɔ́kɔ́ma okelú a wúmɔtɛ́ á mɛ bataka ne *nuebélé ɔ́sɛ : “Sóol, Sóol ! Anyíatɛ́ o ŋo mí tekese e ? O ŋoó bíyébi etémbí ne etémbí ekúlú ayɛ́ ɔ ŋɔɔ́ waamba ɔyákána háyɛ káwɔ a cɛ́ tɛ ŋa lɔ́kɔ́ma ɔkála ú busue bɔ́ múáyɛ́ mutétényi.”

Buólí 27:23

Yááŋa anyía e buutú bɔ́ hɛ́nánɔ, *elilé yɛ́ bɔsɔ́ma yɛ́ Bandɔ́mɛsɛ́ awɔ́ ɛ ŋaá mɛ bɛ́lɔ́kɔ́mɛ́na, i wuúci nyiɔkɛna, yiíyi yé bíkósíti náámɛ,

Buólí 9:15

Mbá ta híáná, Otéŋí a Waáŋá ŋá laána Ananías ɔsɛ : « Cɔbá, anyía ya mɛ́ŋa ɔlɔtɔ́nɔ́ ɔɔcɔ oócí. Wáŋa muamɛ munyiɔnɔ, u kéé húlikinyi baacɔ a bá tɛ ábɔ́ bá *Besuif nyiámɛ nyiínyi, yó nyiínyi hulikinyi tɔ́na na a báábɔ́ betéŋí na a baacɔ bekime bé *Islayɛ́l áyá.

Lóom 1:16

Yááŋa anyía ɛ tɛ ŋá mɛ lɔ́kɔ́ma aatɔ́ ɔlama ekúlú eyí i ŋe mí hulinyi baacɔ Ambányɛ yɛ́ Ɛsɔ́ma. Ne Yiíyi Bandɔ́mɛsɛ́ ŋó tóŋínyi maayɛ́ makɛ́nda o onohiki baacɔ a bá ŋa bɔ́ háya mɔŋɔlɛ́ né Yésus *Kilís : Eé buúsebuúse né *Besuif, e elime eécí na baacɔ a bá tɛ ábɔ́ bá Besuif.

Lóom 1:5

E elime ci uusú Otéŋí a Waáŋá, Bandɔ́mɛsɛ́ ŋeé mi tóŋínyí yááyɛ́ yaála yí nuubo, yɔ́ mɛ lɔtɔ uuyé ɔɔcɔ u ɛndɔ́ma o okohúlinyi mɔnɔŋɔ me etémbí mekime yááyɛ́ Ambányɛ yɛ́ Ɛsɔ́ma ananyía bé wuúci lumítékíníne, bé wuúci lɔ́kɔ́mákɛ́na. Aáná bé ké bú nyémiki Yésus Kilís.

Lóom 1:9

Yááŋa anyía ɛ ŋaá mɛ bɛ́cɔ́kɔ́lɛ́na Bandɔ́mɛsɛ́ a yáánɔ́ asana ekúlú ekime eyí i ŋe mí wuúci bɛ́cɔ́kɔ́lɛ́na. Bandɔ́mɛsɛ́ áŋa uumi ɔmbasɔ́mbásɔ a asana eéyé. Wuúci ɛ ŋa mɛ́ nyiɔnɔ na ɔtɛ́má okime buólí bú ohulikinyi baacɔ Ambányɛ yɛ́ Ɛsɔ́ma yɛ́ asana yí uuyé Ɔɔ́nɔ́.

Lóom 11:13

Aámbáya, náánɔ́ ɛ ŋa mɛ́ táŋa, banɔ́ abá nu tɛ anɔ́ bá *Besuif. Énu menyí anyía ya mɛ́ŋa ɔtɔ́mánɔ́ náánɔ́, i menyukune anyía búámɛ buólí bɔ́ ɛndɔ́ma áŋa buáŋá ɔ ɔhɔla.

Lóom 15:16

U ŋeé mi télímínyí munyiɔnɔ mu Yésus *Kilís ɛ ɛkatɛ́katɛ́ cɛ baacɔ a bá tɛ ábɔ́ bá *Besuif o o beébe hulinyi yááyɛ́ Ambányɛ yɛ́ Ɛsɔ́ma ɔ ɔkɛla anyía bábɔ́ bɛ́cáŋáka háyɛ *abɛ́sámbá e yí ŋeé wuúci bíléníne. Yiíye eéyé *Efúúménénú yí Elilé ŋé fúúmínyi.

Lóom 15:29

I ŋe mí menyi anyía ekúlú ayɛ́ ɛ ká kaá mɛ háma náánɔ́, tu ká sɔ́ bámɔ́kɔ́na bonyíóyókónú na bɛsaya e bí ŋeé húle né Kilís hú mbiɔ́kɛ.

Lóom 16:18

Yááŋa anyía tɛ́ cáŋa buólí bú Otéŋí a Waáŋá Yésus Kilís bá ŋa bɔ́ nyiɔ ; bá ŋa bɔ́ nyíɔnɔ yáaŋa hú túábɔ́ tɔɔna tɔ́ bɛ́muátá, aáná bé ŋe bú néŋe baacɔ bakɛla hɛkɔma, na bɛmbányɛ bí mehúnyi.

Lóom 16:25

Tu iínjíékíne hú Bandɔ́mɛsɛ́ nuúmi anyía wuúci u ŋaá basɔ́ kíndísi. Aáná Ambányɛ yɛ́ Ɛsɔ́ma yí Yésus *Kilís eyí i ŋe mí húlínyi baacɔ ŋaa kɔ́ɔna bɔkɔ búmɔtɛ́, yiíyi eéyé yɛ́ ŋaá bá indiitie buáyá.

1 Kɔlɛ́ɛntɛ 1:1

Yaŋɔ́ Bóol, *Bandɔ́mɛsɛ́ ŋaá háŋá ɔ mɛ lɔ́ŋɛ́ta anyía yámɛ bá *ɔɔcɔ u ɛndɔ́ma u *Yésus *Kilís. Tua sɔ́ŋa na yaŋɔ́ ne uusú onyíinyí u olumitinine, Sosotɛ́n.

1 Kɔlɛ́ɛntɛ 9:1

Yaŋɔ́ ɛsɛ, ya mɛ́ŋa na makɛ́nda ma ɔkɛlaka bɔkɔ bukime ebú i ŋeé mi léne ɔkɛla e ? Yaŋɔ́ ɛsɛ, ya mɛ́ŋa ɔɔcɔ u ɛndɔ́ma u Yésus, uusú Otéŋí a Waáŋá e ? Yaŋɔ́ ɛsɛ, i ŋe mí wuúci lɛcaka na cáámɛ eése e ? Yaŋɔ́ ɛsɛ, banɔ́ bɛ́muátá nua nɔ́ŋa buólí bɔ́ cáámɛ aabá cá bɛ́muátá né Otéŋí a Waáŋá noómi e ? Mbá anyána aná e ?

2 Kɔlɛ́ɛntɛ 1:1

Yaŋɔ́ Bóol, *Bandɔ́mɛsɛ́ ŋaá mɛ táfá anyía yámɛ bámɔ́kɔ́na *ɔɔcɔ u ɛndɔ́ma u *Yésus *Kilís. Yaŋɔ́, ɛ ŋa mɛ́ banɔ́ ɔ́ɔ́ŋɛ́na nufule eenu, na yaŋɔ́ ne Timoté, uusú onyíinyí u olumitinine. Tu ŋa sɔ́ banɔ́ ɔ́ɔ́ŋɛ́na nufule eenu, na banɔ́ hiɔ́bɔ hí belumitinine hɛ́ Kɔlɛ́ɛntɛ ne eebe bekime a bá bɔ́ŋa e ekéti yí iisí yɛ́ Akayí ekime.

2 Kɔlɛ́ɛntɛ 11:5

I ŋeé mi bíkéti ɛsɛ́, baacɔ eébé ebé nu ŋe nú híite háyɛ balá-baacɔ bá ɛndɔ́ma, bá tɛ ŋá bɔ́ mɛ hɔ́la te butíkítíki.

2 Kɔlɛ́ɛntɛ 11:7

Ɔ́kɔ, ɛ́cɛ anyía ɛ ŋa mɛ́ kɛláka bɔɔbɛ́ ekúlú eyí i ŋeé mi bílóósi yaŋɔ́ bɛ́muátá ɔ ɔmɛsɛ́, míɔ banɔ́ húlikinyi Ambányɛ yɛ́ Ɛsɔ́ma yɛ́ Bandɔ́mɛsɛ́ tɛ́ka na bɛnamá ananyía núánɔ́ bámɔ́kɔ́na ɔ ɔmuaná e ?

2 Kɔlɛ́ɛntɛ 12:11

Ɛ́ maá mɛ táŋáka háyɛ yaála, asana ɔ́mɔtɛ́ banɔ́ nua nɔ́ŋa nu mi éékínyínyi ɔkɛla aáná. Yááŋa anyía banɔ́, núánɔ́ nyɛmana nú ɔlaakɛna baacɔ aányɛ́ ya mɛ́ŋa ; ta ayɛ́ baacɔ a bɔ́mɔtɛ́ ŋa bɔ́ kɔ́ɔna anyía ɛ tɛ ámɛ bá ta bɔkɔ, balá-baacɔ bá ɛndɔ́ma eébé tɛ ŋá bɔ́ mɛ hɔla te butíkítíki.

2 Kɔlɛ́ɛntɛ 2:12

Ɛ ŋa mɛ́ hatɔ́na, míɔ cɔba a bálɛ́ka cɛ Tɔlɔwás o okohúlinyi baacɔ Ambányɛ yɛ́ Ɛsɔ́ma yí *Kilís. Ɛŋakɛlá yá kaá mɛ háma hɔ́á, míɔ lɛca anyía Otéŋí a Waáŋá áŋa ɔ mɛ tábɔ́nákɛ́nánɔ́ ohónyí wú ɔnyiɔkɔ buólí hɔ́á.

2 Kɔlɛ́ɛntɛ 4:5

Yááŋa anyíaʼo, tɛ́ cáŋa yáásɔ́ asana yɛ́ bɛ́muátá tu ŋe sú húlínyi baacɔ ; mbá tu ŋe sú beébe hulinyi hú asana yí Otéŋí a Waáŋá Yésus Kilís. A yáásɔ́ aháŋá, tu ŋa sɔ́ láana baacɔ hú anyía : Tua sɔ́ŋa báánɔ́ bɔnyiɔnɔ anyía tu ŋa sɔ́ látɛ́na Yésus.

Kalasi 1:1

Yaŋɔ́ Bóol ɛ́ ŋa mɛ́ banɔ́ ɔɔ́ŋɛ́na nufule eenu. Ya mɛ́ŋa *ɔɔcɔ u ɛndɔ́ma u *Yésus *Kilís, tɛ́ cáŋa a makɛ́nda ma baacɔ, ta anyía a nyɛkɛla nyɛ́ ɔɔcɔ a wɔmɔtɛ́. Mbá ya mɛ́ŋa ɔɔcɔ u ɛndɔ́ma a makɛ́nda ne me Yésus Kilís na ma ciasɔ́ Síkíne *Bandɔ́mɛsɛ́. Wuúci u ŋeé héenyi Yésus e biwéewé.

Ɛfɛ́ɛsɛ 1:1

Yaŋɔ́ Bóol, *Bandɔ́mɛsɛ́ ŋaá mɛ táfá anyía yámɛ bámɔ́kɔ́na *ɔɔcɔ u ɛndɔ́ma u *Yésus *Kilís. Yaŋɔ́, ɛ ŋa mɛ́ banɔ́ ɔ́ɔ́ŋɛ́na nufule eenu, banɔ́ belumitinine Kilís ebé nú me nú bíínjie e nyimónjóló ne Yésus Kilís [banɔ́ ebé nu ŋe nú líhe a bálɛ́ka cɛ Ɛfɛ́ɛsɛ].

Ɛfɛ́ɛsɛ 1:13

Banɔ́ tɔ́na, ekúlú ayɛ́ nu ŋa nɔ́ lɔ́kɔ́máká taaká cɛ ɔtáŋa, wuúci wáŋa Ambányɛ yɛ́ Ɛsɔ́ma a yɛ́ ŋaá banɔ́ nóhi, nu ŋa nɔ́ hákɛ́ná mɔŋɔlɛ́ né Kilís. Aáná Bandɔ́mɛsɛ́ ŋaá banɔ́ háyá hííyé hibílícínyínyí hɛ́ bɛ́muátá ; híáŋa *Efúúménénú yí Elilé ayɛ́ u ŋaá banɔ́ bɛ́tánɛ́ná o otóŋínyi anyía nua nɔ́ŋa bááyɛ́.

Ɛfɛ́ɛsɛ 4:11

Wuúci u ŋa kɛ́láka anyía baacɔ a bɔ́mɔtɛ́ á bámɔ́kɔ́na baacɔ bá ɛndɔ́ma, a bɔ́mɔtɛ́ *behémúnyi bɛsana bá Bandɔ́mɛsɛ́, a bɔ́mɔtɛ́ behulinyi bɔsɔ́ɔ́kɔ́ Ambányɛ yɛ́ Ɛsɔ́ma, a bɔ́mɔtɛ́ tɔ́na bootonono ta anyía beékúnyi bɛsana.

Filibí 1:1

Yaŋɔ́ Bóol, ɛ ŋa mɛ́ banɔ́ ɔ́ɔ́ŋɛ́na nufule eenu, na yaŋɔ́ ne Timoté ; tua sɔ́ŋa bɔnyiɔnɔ bé Yésus Kilís. Tu ŋa sɔ́ banɔ́ ɔ́ɔ́ŋɛ́na nufule eenu, na banɔ́ belumitinine Yésus Kilís bekime [bé nyimónjóló ne wuúci] ; na báánɔ́ bekendisi belumitinine na báánɔ́ batiákɛ́lɛ, banɔ́ bekime ebé nu ŋe nú líhe e Filibí.

Kolóso 1:1

Ya mɛ́ŋa Bóol, *Bandɔ́mɛsɛ́ ŋaá mɛ táfá anyía yámɛ bámɔ́kɔ́na *ɔɔcɔ u ɛndɔ́ma u *Yésus *Kilís. Yaŋɔ́, ɛ́ ŋa mɛ́ banɔ́ ɔ́ɔ́ŋɛ́na nufule eenu, na yaŋɔ́ ne Timoté uusú onyíinyí u olumitinine.

Kolóso 1:25

Bandɔ́mɛsɛ́ ŋaá mɛ táfá anyía yámɛ bámɔ́kɔ́na munyiɔnɔ mu hiɔ́bɔ hí belumitinine, yó mi íínjie buólí anyía yámɛ banɔ́ ɔɔ́lɔ́kɔ. Buólí eébú áŋa anyía yémi húlíkínyi baacɔ bekime bíáyɛ́ Bɛsana bikime.

1 Tɛsaloníke 2:2

Nu menyukune tɔ́na anyía bá ŋa cáŋa á basɔ́ ɔɔmbɔ́náka a bálɛ́ka ci Filibí; túɔ́ lɔ́kɔ́máka muuyé. Ta híáná, ayɛ́ ba-basɔ́-nuusi ŋa bɔ́ bá beéŋí, Bandɔ́mɛsɛ́ ŋaá basɔ́ iínjíé makɛ́nda ma ɔ banɔ́ húlikinyi yááyɛ́ Ambányɛ yɛ́ Ɛsɔ́ma.

1 Tɛsaloníke 2:8

Tu ŋa sɔ́ banɔ́ lénéké buéŋí, buátɛ́ bɔkɔ tu ŋa sɔ́ lɛca bɔmbányɛ ɔ ɔ banɔ́ húlinyi Ambányɛ yɛ́ Ɛsɔ́ma yɛ́ Bandɔ́mɛsɛ́, túɔ́ bámɔ́kɔ́na hoóhi ne owiínjie úúsú olíhe a yáánɔ́ asana. Ánɔ lɛcá, tu ŋa sɔ́ banɔ́ lénéké buéŋí ɔ ɔhɔla.

1 Tɛsaloníke 2:9

Baláamɛ, tɛ́ka nua núánáŋa ɔ ɔbɛ́táá na muasɔ́ muuyé ne buólí abɔ́ tu ŋá sɔ́ bá tuasɔ́ nyíɔkɔ ne nebutúé na nabuɔ́sɛ́ anyía tu ti yébi ɔɔcɔ ɔmɔtɛ́ aá banɔ́ a asana na bɛnyɛ́ma bɛ́ ɔnyíá e ? Yaátɛ́ ekúlú eéyé tu ŋa sɔ́ banɔ́ húlíkínyi ne uúsú ɔtɛ́má okime Ambányɛ yɛ́ Ɛsɔ́ma e yí ŋeé húle ná Bandɔ́mɛsɛ́.

1 Timoté 1:1

Yaŋɔ́ Bóol, *ɔɔcɔ u ɛndɔ́ma u *Yésus *Kilís e nyitélímínyi na nyɛ́ *Bandɔ́mɛsɛ́, muasɔ́ Munohi, ne nyí Yésus Kilís, maasɔ́ Mɔŋɔlɛ́.

1 Timoté 2:7

Yaátɛ́ asana Bandɔ́mɛsɛ́ ŋeé mi télímínyi ne muhulinyi baacɔ Ɛsɔ́ma na ɔɔcɔ u ɛndɔ́ma, anyía yémi hulíkínyi baacɔ bɛsana eébí. U ŋaá mɛ tɔ́ma o okowéékúnyi baacɔ a bá tɛ ábɔ́ bá *Besuif, anyía bé lumítékíníne taaká cɛ́ bɛsana. Ɛ ŋa mɛ́ kɔɔna taaká, i ti ŋé mi néŋe.

2 Timoté 1:11

Yaŋɔ́, Bandɔ́mɛsɛ́ ŋeé mi télímínyi ne muhulinyi baacɔ Ɛsɔ́ma na ɔɔcɔ u ɛndɔ́ma anyía yémi hulíkínyi baacɔ bɛsana eébí, i beébe biíbi eékúnyíki.

Tite 1:1

Yaŋɔ́ Bóol, munyiɔnɔ mɔ *Bandɔ́mɛsɛ́, ɛ ŋɔ mɛ́ ɔ wɔɔ́ŋɛ́na nufule eenu. Ya mɛ́ŋa *ɔɔcɔ u ɛndɔ́ma u *Yésus *Kilís. Ɛ ŋaá mɛ ɔ́ɔ́lɔ baacɔ abá Bandɔ́mɛsɛ́ ŋɔɔ lɔ́tɔ́kɔ́, anyía bé lumítékíníne mbá bé menyi taaká cɛ́ bɛsana. Bɛsana eébí ŋo tóŋínyi anyána bébú líhéke háyɛ bú ŋe bíléníne Bandɔ́mɛsɛ́,

Ebélé 5:4

Ta ɔɔcɔ tɛ á bá wu obíínjie nuúmi ta ɔbɛ́táfa ɔ ɔnyiɔ buólí bú *mululi nyiínjie a muáŋá ; Bandɔ́mɛsɛ́ bímuócí ú ŋaá táfá ɔɔcɔ ɔ ɔnyiɔ buólí eébú háyɛ ú ŋaá táfá *Aálɔn buáyá.

Ebélé 7:26

Nyɛnamá nyí *mutéŋínyi beluli nyiínjie a muáŋá eényí á nyɛmána na basɔ́. Muáŋa mufúúménénú, mu tɛ kɛ́la bɔɔbɛ́, muúmu tɛ́ka na hɛkɔma. Mu tɛ á bá háyɛ bakɛla maabɛ́, Bandɔ́mɛsɛ́ ŋeé muúmu béétí aáyá a maabána ɔ Ɔmuaná noómi.

Sáak 1:1

Yaŋɔ́ Sáak awɔ́ ɛ ŋa mɛ́ nyíɔnɔ na *Bandɔ́mɛsɛ́ ne Otéŋí a Waáŋá *Yésus *Kilís buólí, ɛ ŋa mɛ́ banɔ́ téŋi, banɔ́ baacɔ bekime bá *tɔnyɛ́nɔ́ túɔ́hátá ne túfendí tú *Islayɛ́l a tɔ́ ŋaá sáásíaka ɔ ɔmɛsɛ́ okime.

1 Bíel 4:17

Yááŋa anyía ekúlú má kaá háma ayɛ́ Bandɔ́mɛsɛ́ yɔ́ cɔba o okélísíki baacɔ, mbá yɔ́ cɔ́ba o otúme a makɔlɔ́kɔ́lɔ́ baacɔ bá ciayɛ́ ciíbe. Kokóokó ! Mbɔ́kɔ náásɔ́, bááyɛ́ baacɔ, nyɛkála á nyɛmána nyí otúmíne, anyána yɛ́ káá bá aná na bɔsɔ́ɔ́kɔ́ a bá tɛ ŋá bɔ́ lɔ́kɔ́mɛ́na Ambányɛ yɛ́ Ɛsɔ́ma yɛ́ Bandɔ́mɛsɛ́ e ?

2 Bíel 1:1

Yaŋɔ́, Símon Bíel, munyiɔnɔ mu *Yésus *Kilís ; yaŋɔ́ tɔ́na uuyé *ɔɔcɔ u ɛndɔ́ma. Yaŋɔ́, ɛ ŋa mɛ́ banɔ́ ɔɔ́ŋɛ́na nufule eenu, banɔ́ eebe abá nu ŋa nɔ́ háya mɔŋɔlɛ́ né Yésus Kilís, bɔkɔ búmɔtɛ́ háyɛ basɔ́. Wuúci wáŋa na ciasɔ́ *Bandɔ́mɛsɛ́ na muasɔ́ Munohi. U ŋaá kɛ́la anyía túásɔ́ háya mɔŋɔlɛ́ nááyá aáná basɔ́ bekime, anyía wáŋa ɔtálɛ́mánánɔ́.

Súute 1:1

Yaŋɔ́ Súute, munyiɔnɔ mu *Yésus *Kilís, mbá ya mɛ́ŋa tɔ́na onyíinyí u Sáak ; yaŋɔ́ ɛ ŋa mɛ́ banɔ́ ɔɔ́ŋɛ́na nufule eenu, banɔ́ eebe abá *Bandɔ́mɛsɛ́ ŋaá lɔ́ŋɔ́kɔ anyía núánɔ́ bámɔ́kɔ́na bááyɛ́ baacɔ. U naŋa waá banɔ́ lénéke, u banɔ́ tétényíki a asana ne Yésus Kilís.

Nyɛnambɔnɛna nyɛ́ bɛsana 1:1

Nufule eenu ŋe bíkéti bɛsana ebí *Yésus *Kilís ŋa námbɔ́nákɛ́na bɔnyiɔnɔ bá *Bandɔ́mɛsɛ́. Bandɔ́mɛsɛ́ u ŋeé wuúci laána anyía wé beébe nambɔ́nákɛ́na bɛsana a bɛ́ á nyɛ́mana o tényí bɛ́kɛ́láka anyía bébú biíbi menyí. Yaátɛ́ asana Yésus Kilís ŋaá tɔ́má yááyɛ́ elilé yɛ́ bɔsɔ́ma ná muayɛ́ munyiɔnɔ Sáaŋ anyía wé keé beébe námbɔ́nákɛ́na bɛsana eébí.

Nyɛnambɔnɛna nyɛ́ bɛsana 22:6

Mbá yɛ́sɛ náámɛ : « Bɛsana bikime eébí abɛ́ ɔ́ mɔɔ́ lɔ́kɔ́máka áŋa bɛ́ ɔhákɛ́na mɔŋɔlɛ́ eé biíbi ; bɛ́áŋa tɔ́na taaká. Otéŋí a Waáŋá Bandɔ́mɛsɛ́ ŋe yiínjie yááyɛ́ Elilé né *behémúnyi bɛsana ɔ ɔnambɔnakɛna baacɔ bɛsana. Wuúci u ŋaá tɔ́ma elilé yɛ́ bɔsɔ́ma o okotóŋínyi bááyɛ́ bɔnyiɔnɔ bɛsana a bɛ́ á nyɛmána ɔbɛ́kɛ́láka hí aámbáya. »

Nyɛnambɔnɛna nyɛ́ bɛsana 22:9

Mbá yɛ́sɛ : « Atɛ kɛlá aáná, ya mɛ́ŋa tɔ́na munyiɔnɔ bɔkɔ búmɔtɛ́ háyɛ na kuɔŋɔ́, na bɔnɔ́ɔnyia *behémúnyi bɛsana, háyɛ baacɔ bekime a bá ŋa bɔ́ látɛ́na bɛsana bí nufule eenu. Bandɔ́mɛsɛ́ bímuócí ɔ́ɔ nyɛmána wu onyemiki ! »