Ƒilipiƒuɔ 3:1 - Katɔti Ɔku Kedee

¹ Ukplodi ni, mina banwa, bɛya na lɛlɔ litaayɔ-mii na Blɔti kemmo. Lɛɛɛdaku-ni si nsɔ mɔɔsia kama teenweni-mii ala ani na líinweni ḿbavi. Na si ina lɛ́bla lɛni muedi ni, ɔdi bina kebunku.

Ƒilipiƒuɔ 3:1 Iomraidhean Croise

Ala Alɛdi 1 15:28

Na uwi ɔni na beti Bunyimi Adaka ɔmmɔ na beeduo Yerusalem ni, ukyuli biala ɔɔva ku lɛdi momoomo na baagyá agyala ku bebuo ese ku kɔkpɛɛ ku enukpɛ agyala ku lɛbentaa ku kɔbuli agyala bamba lidu lɛnɔ.

Ala Alɛdi 1 16:10

Amii bani ƒui mɔɔwia Unwoti ni, lɛlɔ lɛyɔ-mii na bimwi-nwu lɛnyi kedee na bɛkɔliku-nwu katɔ.

Ala Alɛdi 1 29:22

Bekyuli bammɔ bákɛ ebiti geen na bádi na báni na Unwoti lɛkpabi kudɔ mmɔ. Amu na limeyi lɛmmɔ kani lɛlɔ ni, bése Salomo lɛga na bébi-nwu kagabwa. Bádi limeyi ku lɛlɔyɔ na béti nnɔmii béwi Salomo lili béti bátina ka anwu ndubɔdi lɛga na ɔti kenye. Na Sadok lɛnɔ béwi-nwu nnɔmii lili bátina ka anwu ndi bana ɔkpane.

Nehemia 8:10

Na Nehemia ɔ́sɔ ɔ́su ɔnini, “Ɔlɛka biteesie kaduli, na bitánwa adila kaduɛ na bite ɔkpanadi ɔni neeebo ɔdi. Ɔsika ɔmwi limeyi lɛmɛni lɛdi limeyi kedee lite Unwoti. Bitadu kɔnyana, ɔsika Unwoti lɛlɔyɔ lɛdubute-mii lɛlɔkplu!”

Hiob 22:26

Na ebiti ku lɛlɔyɔ lɛdubɔƒɔ-ɔ lɛlɔ kemmo ƒui ka aabla-nwu kabla ɔsu, na eti ƒula anu ƒui asia-nwu lɛlɔ.

Kɔgya 149:2

Israel, lɛlɔ lɛyɔ-mii, amii bani na Unwoti Katɔti údie. Na amii Sion bebi ku bawɔ ni, lɛlɔ lɛyɔ-mii na bina ɔga lɛlɔ.

Kɔgya 32:11

Ebiti ada-mii na lɛlɔ lɛyɔ-mii na Unwoti lɛlɔ, amii bani nsiaku-nwu kama siin na bina kayi ayɔla akɛ ulu ɔbuni lɛlɔ. Bɛva momoomo na bidie lɛnu ku ebiti.

Kɔgya 33:1

Amii bani nsiaku-nwu kama siin bibo lɛlɔyɔ kudu na bɛsu lɛla lɛni na Unwoti ɔ́bla úte-mii. Na amii bani muunú-nwu litemi ni, bimwi-nwu lɛnyi.

Kɔgya 37:4

Ya na ebiti ataada-a na Unwoti lɛlɔ na ɔdubɔbla ƒula kayi ayɔla ute-ɔ.

Kɔgya 42:4

Si muunyimo ala adi bene ni, kayi kaakpulu-mi geen. Muunyimo uwi ɔni na ntaatɔnku ƒula bekyuli lisu na bútaasala teesie ƒula kakpakɔ taatátu lɛnu teemwi-ɔ ku lɛlɔyɔ.

Kɔgya 5:11

Bekyuli bani néti-ɔ bénwini katamikukɔ ni, lɛlɔ lɛdubɔyɔ-ma na beteedie ebiti lɛnu uwi ƒui. Gyumana bekyuli bani ƒui mɔɔyɔ́-ɔ, ɔsika awɔ ɔsu na bana ebiti eedú taawɔlɔ.

Kɔgya 97:1

Unwoti ɔɔdi lɛga! Amii kayawi bekyuli ƒui, lɛlɔ lɛyɔ-mii. Na amii bani nli ntuntɛ kɔlɔ ƒui, lɛlɔ lɛyɔ-mii.

Yesaia 41:16

Na bibo-nya bitéwi aani kalɛ na baaƒɛ́ lɛla lɛdi, na ɔƒɛƒɛɛ uti lɛla biala ɔtɔlɔku. Nsu amii ni, lɛlɔ lɛdubo-mii bɔyɔ na bimwi ami bina Unwoti Israel Katɔti kedee.

Yesaia 61:10

Lɛlɔ lɛɛyɔ́-mi na Unwoti lɛlɔ na ebiti aada mina kɔyu na lɛla lɛni na mina Katɔti ɔ́bla úte-mi ɔsu. Kalɛ na ɔ́ƒɔ-mi ngba use aani kalɛ na baaklibi uleku teesienku kawɛɛkɔ. Na lɛduni lɛni mɔɔtina ka ɔ́bla-mi siin lɛma-mi lili aani ɔkpane lɛduni lɛni na uubi lili.

Yesaia 65:14

Mina kabla bablane badubo lɛnu budie ku kubiti bɔsiku bana kayi kemmo nsu amii bɛdubo kɔnyana buwulo na kayi kakpulu-mii na bɛyila lɛnunsia biala.

Yoel 2:23

Amii bani nkya Sion ƒui lɛlɔ lɛyɔ-mii na ebiti ada-mii na Unwoti bina Katɔti lɛlɔ, ɔsika ɔ́ya na ɔƒɔwi ɔnantu ku ketudi ɔnantu ɔ́na úte-mii kaduɛɛ aani kuuku kalɛ.

Seƒania 3:14

Ukyuli biala na Yerusalem ku Yuda bɛtu lɛnu na bɛva momoomo ku bina kɔyi ƒui na bɛdi limeyi!

Seƒania 3:17

Unwoti Katɔti unye-mii kudɔ uwi ndi uwi. Ubo ɔyikun ka udie-mii. Na kalɛ na ɔɔyɔ́-mii ɔsu ni, ɔdubɔya na bɛkɛ bɔnwuna. Na amii ɔsu ni, uudie nwuna lɛlɔyɔ keyi ku lɛnu bɔtu.”

Sakaria 10:7

Israel ɔdubɔbla aani bekpone bani mbo ogya geen, na lɛlɔ lɛdubo-ma butaayɔ aani bekyuli bani na báni ntɛ. Na si bana bebi lɛnɔ bánu ɔmɛni ni, ebiti adubo-ma bɔda geen na ami, Unwoti, ɔsu.

Mateo 5:12

Ebiti ada-mii na lɛlɔ lɛnɔ lɛyɔ-mii, ɔsika bibo lɛyuƒɔla bonwu na katɔ. Lɛni kani na békpoku Katɔti kenye bediene bani nágyu batɔ-mii.

Luka 1:47

Na lɛlɔ lɛɛyɔ́ mina kɔyu na Katɔti ɔni ndi mina Ɔƒɔne lɛlɔ.

Romaƒuɔ 5:11

Na ɔɔɔdi ɔmɛni lɛti, mmomu lɛlɔ lɛɛyɔ́-bu geen na Katɔti lɛlɔ ɔkɛnku Blɔti Yesu Kristo ɔni lɛlɔ na Katɔti ɔ́sia na ɔ́sɔku abu ku-nwu ntɛ ɔ́klibi ɔsu.

Korintoƒuɔ 2 13:11

Banwa, na kawɔlɔkɔ mɛni ni, binye momoomo na bɛlɛ lili bɛwɔlɔ. Na binu ala ani ƒui na lívele-mii na ɔku ɔmɛni kemmo. Bɛbla unwi na bilieku lɛlɔ ku keyi buɛɛ, na Katɔti ɔni mɔɔyɔ́ bekyuli na ɔɔyá na keyi kaayɔ́ku-ma ni, ɔdubɔsiaku-mii.

Eƒesoƒuɔ 6:10

Na kawɔlɔkɔ ni, bɛya na Katɔti ɔyikun ɔkya-mii ɔkplu.

Lɛkpa Ulu 12:18

Bɛnu ka amii ku bina bebi ku bina kabla bablane banana ku beleku ku Lewiƒuɔ bani nlie bina lɛma ni, bɛ́di akpala ammɔ na Unwoti Katɔti anumi na kesii kani na ɔdubɔtina-mii. Na lɛlɔ litaayɔ-mii na ala ani bɛ́kɛ mmɔ ɔsu.

Lɛkpa Ulu 16:11

Na si bísela ni, biti bina bebi ku bina kabla bablane banana ku beleku ku baƒɔ bani nkya-mii akɔ ku Lewiƒuɔ ku bekpinebi ku bekpinele bani nkya bina lɛma kemmo ƒui bɛda. Na biti kubiti bɛdi limeyi lɛmmɔ na Katɔti anumi.

Ƒilipiƒuɔ 3:3

Abu ndi bekyuli bani mmomu nékulo ago, ɔsika buumwi Katɔti ɔkɛnku nwuna Kɔyu lɛlɔ na bɔɔkɛ́ ebiti ka abu ku Kristo Yesu bɔ́bla unwi ɔsu. Na búteti lɛlɔ bútasia ɔlɔna lɛlɔ ɔdi ala bɔbla lɛlɔ.

Ƒilipiƒuɔ 4:4

Na mɔɔsu-mii nnii bɛya na lɛlɔ litaayɔ-mii na Blɔti kemmo. Na nsɔ mɔɔsia kama nnii bɛya na lɛlɔ litaayɔ-mii.

Ƒilipiƒuɔ 4:8

Na ukplodi ni, banwa, biti bina kasusu bɛsia ala ani ndi etemila geen lɛlɔ ku ala ani mbo ɔbu ku ala ani nse siin ku ala ani nse sɛɛn ku ala ani mɔɔdia bɔnu ku ala ani náƒɔ lɛnyi ku ala ani ndia geen ku ala ani námanku bumwi lɛlɔ.

Tesalonikaƒuɔ 1 4:1

Banwa, mina lɛla likplodi lɛni muuvele-mii ndi ka ni, bilie ngba bɔni mɔɔyɔ́ Katɔti kaƒɔ aani kalɛ na bɔ́tina-mii. Bɛdaku ɔkplu bɔkya bɔdi, nsu bɔɔkya-mii ogya na Blɔti Yesu lɛnyi kemmo bɔnii bɛbla bitulo lɛni.

Tesalonikaƒuɔ 1 5:16

Bɛya na lɛlɔ litaayɔ-mii uwi biala.

Yakobo 1:2

Banwa, lɛlɔ litaayɔ-mii si ala lidu lidu eekpóku-mii.

Petro 1 3:8

Na ɔmɛni kawɔlɔkɔ ni, bina ƒui bɛkɛ kɔyu kemmo kasusu kenwi bɛyɔ lɛlɔ aani banwani kalɛ na bɛnu ɔdi biala kɔnyana, na biboku lɛlɔ kalɔ bite lɛlɔ.

Petro 1 4:13

Mmomu ni, bɛya na lɛlɔ litaayɔ-mii ka amii lɛnɔ biibó abi aani Kristo kalɛ. Ɔsika ebiti adubɔda-mii na lɛlɔ lɛyɔ-mii geen uwi ɔni na wasɔ webo na nwuna bukeye bonwu kemmo.

Petro 2 3:1

Mina banwa bayɔne, ɔmɛni ndi ɔku unyɔdi ɔni na línweni muute-mii. Líti lɛ́sia lɛlɔ ka lɛku inyɔ bɔmɛni kemmo ni, ndubɔsɔ lɛgyila-mii kasusu na kabla-mii nwaa na ala amɛni lɛlɔ.

Samuel 1 2:1

Amu na Hana ɔ́kpali Unwoti na ɔ́su-nwu ɔnini, “Kayi kaayɔ́-mi geen na Unwoti lɛlɔ. Ɔsika Katɔti ɔ́ya na mina lili lɛ́kɔ lɛ́lɛ katɔ ƒui aani ebuo lise. Na mɔɔkun lɛmɛnɛ na mina bekisine ɔsu. Ɔsika ebiti geen aada-mi ka údie-mi mina bekisine enu kemmo.