PHILIPI 1:10 - Lacid Common Language Bible

¹⁰ Houg: lang" she' nanu" gi Khristu doem ju" re" da" bidnyid moo ayung" alhoo, aco' ajhoid khyoo: mo loid lo" lho: - yooboo adab bang: bue" wa zi nghoid.

PHILIPI 1:10 Iomraidhean Croise

APOEM AYANG: 20:5

Abraham nyang: Sara ri nya: nhammoo" nghoid ga: tid lho: Sara nyang: we' dakhyoo" ti" tid ago". Ngoo gi he: khyoo: ri nheigloem: yung" yung" dazei: wigi ngoo gi ci: shoid khyoo: we' ajo, shi"» ga: tid.

YOBA 12:11

Nghoid loug we' nanu" da" yhoo: gi ngham" da" main ri vho: yhang: ti" nanu" nu khyab we' dang: pyoo: ri gyo: nyid nau da:.

YOBA 34:3

Zooshug gi gi zo: yu" ri ngham" angham" se' gyoo: nghoid loug we' Phajhi" dang: ri tam" gyo: rigi hougsu" anghoid.

MIKHA 3:2

Nghoid loug we' nanu" gi ge da" khyoo: ri ngheung" ago"- akhyeung" da" moo" ri vho: nyid boem ago"- nanu" gi nga" byumyu" yiri kangso dei nyid shire nyang: shooyid shid pyam byid: lho: shooyoug: mo shoo" ri we' phyo' shang: yu pyam ago".

MATHE 16:23

Yesu gi lheing: yu" lho: Petru ri «satan: yu we"- nga" jang" mo thu' loo" we' nang gi nga" shid mo thoem: tho: leung joyoo danghoid. Khasu" wim gari-re" da" nheigloem: gi Mangso shoid khyoo abo myid yu"- byu vho: khyo" za: te: myid yu"» ga: tid.

MATHE 26:33

Petru gi «subi" dangain" Aseing ri she: pyam too" khari" nghoid loug we' ngoo gi khanham we' she: pyam khoo wa zi anghoid» ga: tid.

YOHAN 1:47

Nathanela re" nyid zi Yesu myang lang" nya: khyoo: Yesu tid zigi fain" da" nheigloem: abo da" Israela Byu gyeing" dayug hid: moo ju" bye: ga: wigi tid.

YOHAN 3:20

Akhyeing" ashoeb moo" zei mo, gi bidbang ri ngheing" boem yoomo bidbang khyoo ari" nghoid boem wigi nyang: nya: akhyeing" ashoeb da" moozoo" bang thu' loo wa ziri avhoo: nghoid ago" gyoug yoomo - bidbang nam, moo avoem" tain" ri.

ACTS 24:16

Hougsu" nghoid yoomo ngoo gi Mangso shid' khoin" moo we' - byu yi da" shid khoin" moo we' nheigloem: gyeing: gyeing: za: nghoid wa shid re" khanham we' ge bue" yhi' mo yoem: kaid' nyid su nghoid.

Roma 12:2

Nanu" gi mougmyid asam" aved ri acang nyid goo" nanu" gi Mangsoo: ri nyang: tu: nya: da" nheigloem: xoug" bain' sho' thed' pyam' lho: nheigloem: ung: khoug: aseig khyo" kham: yu ge". - Hougsu" koid' lang" gi geda" khyoo: - Mangsoo: vho: da" khyoo: ce: yooboo foin: jang: ajo lo: da" khyoo: ga: da" Mangsoo: vho: da khyoo: gi ci nghoid ga: ziri nanu" yo" se' lo boem wa.

Roma 12:9

Nanu" da" jheddab nheigloem: moo ayid void khyoo: dajhi' we' age boo.Nanu" gi anyhoin: athoung" da" khyoo: ri ngheing" lho: wigi ge' lho' da" khyoo: ri vho: ngei nyid ge'.

Roma 16:17

Mang: nhung" yi we" nanu" shau" jhau" yu da: tid poin" tid khyeing" mungdang: ri nung phug pyam' lho: subi" ri aveing" goo" nhang: da" zi - khyoo vhang: shu" vhang: loo" mo ri zid" nyid ge'. Houg: bang: ri jhang" pyam' ge'.

Roma 2:18

Nang gi Mangsoo: ce: noem zei: wa vho: zi se' nyid su: nghoid. Yuda tarha" khyo" jo ziri khyen yu wa shid' re" jhau" yu bye: su: nghoid.

Roma 7:16

Ngoo gi - ngoonyang: anau koid' da" moo" ri zi nyid da" uri Moshe da" tarha" deingmain" nyid khyoo: ri ngoo yhen: yu.

Roma 7:22

Mangso: da" tarha" ri nga" nheigloem: gi gau yi ngei pyoo: za lhoem: yu bye.

Roma 8:7

Xangsu: gungshoo" nheigloem: za: dabo nyid su: gi - Mangso: gyi nghoid. Houg: te" nheigloem: za dabo nyid su: gi Mangso: mungdang: ri acang su: nghoid. Gyeing" nyang: ayo" cang su: nghoid.

1Korinthians 1:8

Ngoonu" da" Aseing Yesu Khristu doem ju" re" wigi- Tarha" dang: phyed' lo da" bidnyid moo- yooboo foin: cang aboo loo: sho'- nyang: gi nanu" ri lo" thang moo: ju" sho'- geung: teung jo, nhang: wa zi nghoid.

1Korinthians 10:32

Yuda byumyu" yi shid re" we'- Greek byu yi shid re" nghoid loug we'- Mangso phung da" shid re" we'- thoung" thue: leung jang: abui" wa shid re" kangso dei nyid ge'.

1Korinthians 8:13

Hougsu" nghoid yoomo zo: noem khyo" nga" mang: nhung" phoo, ri- nheigloem: leung nhang: wigi- yooboo dakoid nhang: wa nghoid rigi- nga" mang: nhung phoo, aleung loo" wa shid re"- ngoo dapyaid' goin" shoo" azoo: loo: za: nyid wa.

2~KORINTHU 1:12

Ngoonu" da" nheigloem: khoug: moo gyeung" nyang: phau: khuang wa khyoo: dakhaid bo. Hau: zigi he: da" moug: myid tho moo ngoonu" da" kangso' dei nyid khyoo:- je" wigi nanu" yo' tei" xo' zoem" khau: da" khyoo: moo byu da" se' yeug khyoo: moo anghe: khoug: loo: za: Mangso da" jeju" yoem: vhoo" khyo" ngoonu" gi Mangsoo byid: da" deungmain" gyeungshang: da" nheigloem: gye" myed wigi vhoeb khang" khyo" moo" zei: lo" khyoo: nghoid.

2~KORINTHU 2:17

Nyhang" gi byu gootu: myoo" sho' bang: yhang: ti"- Mangso da" mungdang: ri ce: phoug" adab da" phaga" zi yhang: ti"- oung" khyoo: qei khyoo: ngoonu" akoid boem. Nghoid loug we' ngoonu" gi Mangsoo nhang: kaid mo, nghoid wigi Khristu da" deizoo: yi khyo" wigi Mangso da" shidkhoin" moo hau: mungdang: ri deungmain" gyeung: shang: da" nheigloem: yo' kho" kyo" boem zi nghoid.

2~KORINTHU 6:3

Ngoonu" zei: lo da" moozoo" yo' sen: lho"- hang" nghoid loug we' yooboo foin: lho:" juang" yi zi abue" loo" nhang: noug yoomo ngoonu" gi hang" khyoo: moo we' thei, leung jang" abui" nhang: sho' yoem: kaid nyid boem.

2~KORINTHU 8:8

Hidsu" tid zigi amyeung" khyo" tarha" khyo, to" zi anghoid. gootu: byu yi da" pang thoug khyoo: moo jheddab nheig loem: khayhi' gyi: bo ziri"- tid kyo" ziyo' nanu" da" jhed kang: da" nheig loem: e" myed, ri se' yu wa shid re" tid zi nghoid.

GALATI 5:11

Nghoid loug we' mang nhung yi we"- athang: dayham" ca" ein:- ngoo daxo, kho" nyid nghoid rigi ci: yoomo shen" yhen khyoo: ri ngoo shau" zo: nyid shi" wa la". Hougsu" kho" kyo" ga: zi dadeung nghoid rigi Khristu da" pyang" zeing khyoo: ri ngoo kho" kyo" jang" moo ngoo yau: khe jam jau zi shau" loo wa anghod.

Ephesu 4:15

Hau: gung khoo: jheddab da" emyid yo' deingmain" da" dang: ri tid nyid khyo" vhuloem nghoid da" Khristu moo khyoo: khaid khang" moo" moo gyi: sheung: to' loo ca" nyid boem.

Ephesu 5:10

Aseing: vho: ngei nyid zigi ce: noem nghoid nyid ziri yoem: kaid' lho: jhau" kham: yu nyid ge'.

Ephesu 5:27

Hougsu" nyang: gi hau" phung: ri yung" lho' gyeungshang: nhang: ziyo' ca" yo da" khyoo: ci" we' aboo- atug atuang akoin: ajoeb, zi anghoid loo: za: joeb byeung" ce" yoo, aboo loo: sho' nya: shid re" ced" young" kyeung shang: yu da" khyoo: nghoid.

Ephesu 6:24

Khanham we' abei: ashaem: da" jheddab nheigloem: yo' ngoonu" da" Aseing Yesu ri jheddab nyid bang: dangain" mo jhangk moo Mangso da" jeju" gi dajo, jo, baja" o".

PHILIPI 1:16

Houg: bang: gi ngei bu: lu dang: ri goem, loem byid: wa shid re" ngoori khyen: nyheung to" khyoo: ri nyangnu" se' nyid boem yoomo jheddab nheigloem: yo' kho" kyo" nyid boem ago".

PHILIPI 1:6

Hougsu" nghoid yoomo nanu" moohe: da" ge moozoo" ri zei: shed" too" byid: su: Mangsoo gi Khristu Yesu doem gyoo" loo wa bidnyid moo hau: moo" ri joeb byeung" sho' zei: too" goo" wa" ein: ngoo myid loem nyid.

PHILIPI 2:16

Nanu" hougsu" koid nyid boem nghoid rigi ngoo yoem: kaid' lho: voin, vu, khyoo: gi akoem: amyed anghoid loo: yoomo Khristu da" bidnyid moo nanu" yoomo ngoo gi gau yi phau: khuang joyoo nghoid.

1THESALONI 3:13

He: khyoo: khyo" wigi nyang: gi nanu" ri pang" thoug geung: teing loo nhang: wa zi nghoid- yha" da" Aseing: yesu gi nya: d a" gyeungshang: bang: yo' dage" doem, ju" re" da" uri nanu" gi yha" phoo Mangso da" shid' khoin" moo joeb, byeung" lho: gyeungshang: moin: yi" mo, bue" lo boem wa zi nghoid.

1THESALONI 5:21

Dangain" ziri leug kyeung yu" lho: wigi ge da" khyoo: ri lhoem: yu wigi lhei, teung too" ge'.

1THESALONI 5:23

Nyhang" ri ngei pyo: myen, jham" khyoo: byid: nyid da" Mangsoo gi nanu" ri khyoo: khaid gu: khang" moo" moo ced" yung" ced" shang: lho: wigi ngoonu" da" Aseing Yesu Khristu doem ju" re" da" uri nanu" da" venyi nheigloem: yo' gung du: goin" ziri yooboo adab loo: sho' zung" lhug goin, coung" byid: baja".

YOSHU 24:14

Yoshu gi xo' lho: «Akhid Aseing ri ngi: shab wigi nyang: ri deing: deing: main: main: jhug zug tung" dei byid: nyid ge'. Nanu" phoug" phyid" yi Mesopotamia mung" yo' Egutu mung" moo lhung no' da" yu phara" ri yu pyam wigi Aseing ri kyeing" dei byid: ge'.

Pang Shug 2:2

Nang ci koid lid loo bye: da" moozoo" ri ngoo se'- nang khayhi' yoem: kaid lho: moo" zei: nyid zi nang khayhi' yo" kham zeung: nyid ziri ngoo se' nyid. Nang gi akhyeung" da" byu yi yo' lagyoo: anghoid zi lagyoo: nghoid ga: mhoug mo, ri ca: yu" lho: se' lang" gi khyam" sa abyid: lo: ziri ngoo se.