اَفِسُسیَل 2:3 - کتاب مقدس به زبان لکی - گویش مرکزی

³ ایمِه‌یش کُل، زمونی اِنوم یوئنَ اِنوم هُواوهوس جسمو زِنِه‌یمونَ مَهَرد، ئو چیئَلی گه لار ئو فگِرمونَ مِهِستی انجوممونَ ما؛ ئو اِجور کسَلی‌تِر، مِطابق طبیعتمو مَکوم بیمون اَر آیلَل خَضو.

اَفِسُسیَل 2:3 Iomraidhean Croise

مَرقُس 4:19

مِنتائای هول ایی دنیاءَ ئو فنی گه مالِ‌منال وَه اِنسونَ مِ ئو هوس چیئَلی‌تِرَ ماءَ دَرینو ئو کلوم اِ دَرینو خفَه مِهِه ئو بی‌ثمرَ مِهِیتی.

یوحنا 1:13

اونَلی گه نه اژ خوین، نه اژ هِستِن جسم ئو نه اژ هِستِن یِه اِنسو، بلکِم اژ خدا زاندَه بینَ.

یوحنا 8:44

باوَه هُمَه ابلیسَ ئو هُمَه اژ اَوینونَ ئو هاینونَ دُم اَنجوم دائِن چیئَلی گه باوِ مِیلَسی. او اژ اَ اولَ قاتل بی ئو هُیچ وخد نِموسیا اَر رُی حخیخت، اَرِیَگه هُیچ حخیختی اِنوم او نیَ. هر وخد گه دِروءَ موشی، اژ ذات ووژی دِروءَ موشی؛ اَرِیَگه دِروزِنَ ئو باوَه دِروزِنِلَ.

کارَل رسولَل 14:16

وَه‌یاآگه او اِ نسِل قدیم، کُل ملتَل وِل کِردی تاگَه هر کُم بِچِنَ رئی ووژونا،

رومیان 1:24

اِسَه خدایش اونَل اِنوم شَوَتَل دِلو تسِلیم ناپاکی کِردی، تاگَه بی‌عزّتی بِهَنَ لار ووژو.

رومیان 11:30

اَرِیَگه هَراَ جورَ گه هُمَه زمونی نِسوَتَ خدا کورفِربو بینو، مِنتائای اِسگَه وَه خاطر کورفِربونی یهودیَل ریَمَت خداتو گِرتیَ،

رومیان 13:14

بلکِم شصخیت عیسی مسیح خداون اِجور جِنِکی بِهَنِ وَر ئو اَرِه جسم تیارِک نوئینِن تاگَه چیئَلی گه جسمَ مِیتی بارینونَ جا.

رومیان 2:14

اِراسی، وخدی خِرِیهودیَل گه شریعت نِرِن، کارَل شریعت مِطابق طبیعتَ مارِن‌َ جا، اونَل وَه‌یاآگه شریعت نِرِن، اَرِه ووژو شریعتی کِن.

رومیان 5:10

اَرِیَگه اَرّ حِنی گه وَه‌گَرد خدا دشمن بیمو، وَه‌سونگَ مرگ کُریا وَه‌گَرد ووژ دوسیمو داتی، چَنی ویشتِر اِسگَه گه دوسیمو، وَه‌سونگَ ژییاین او، نجادَ مَگِریم.

رومیان 5:9

اِسَه ایمَه گه وَه‌سونگَ خوین او صالح وَه حساو هاتیمونَ، چَنی ویشتِر وَه‌سونگَ او اژ خَضو خدا نجادَ مَگِریم.

رومیان 6:12

اِسَه نِیلِن گنا اِنوم لارَل فانی هُمَه سِلطنت کِ تاگَه فِربون اژ هُواوهوسَل بیَرینونی.

رومیان 7:18

اَرِیَگه مَذانِم گه هُیچ چی خوئی لیز نَگِرتیَس اِنوم مِه، یانی اِنوم جسم مِه. اَرِیَگه مِنَ مِم اَ چیئَه گه دُریسَ اَنجوم دَم، مِنتائای قویَه اَنجوم دائِن نِرمی.

رومیان 9:22

چَه ماو اَرّ خدا وَه‌یاآگه مِیتی خَضو ووژ نِشو دِ ئو قدِرت ووژ بشتاسِنی، حاجَتَل خَضو گه اَرِه نابودی حاضر بوئین، وَه صبِر فِرِه تیَمِل کِ،

اول قرنتیان 4:7

اَرِیَگه کی چیئی‌تِر اِنوم تونَ موئینی؟ چَه دیرین گه نَبَشخیاسَ بینِت؟ اِسَه اَرّ بَشخیاسَ بینِت، اَنی اَرِه‌چَه هُنَ وَه ووژتَ مَنازین گه مَری نَگِرتِتَ؟

دوئِم قُرَنتیان 7:1

اِاِ عزیزَل، اِسگَه گه ایی وَدِه‌لَ دیریم، بورِن ووژمو پاکا کِیم اژ هر ناپاکی جسم ئو روح، ئو وَه ترس اژ خدا، مقدّس‌بیئین برَسِنیمَ کمال.

غَلاطیَل 3:22

مِنتائای نُسَخ مقدّسَ موشی گه کُل چی ها بَن گنااِر، تاگَه اَ چیئَه گه وَدَه هاوِنتوئی اَررُی ایمون اَر عیسی مسیح بیَنَ ایمودارَل مسیح.

اَفِسُسیَل 2:2

ئو زمونی اِنوم اونَل زِنِه‌یتونَ مَهَرد، اَسَه گه مَچیاینونِ تُرّ ریئَل ایی دنیا ئو رِئیس قدِرت هُوا، ابلیس، یانی هَراَ روحی گه اِسگِه‌یشَ اِنوم آیلَل کورفِربونی کارَ مِهِه.

اَفِسُسیَل 4:22

تا طُرُخ زِنِه‌ی قدیم ووژتو، یانی اَ اِنسو قدیمَ گه وَه خاطر هُواوهوس گنا گَنیائی، اِ وَرتو بِکَنینو.

کولُسیَل 1:21

هُمِه‌یش زمونی وَه‌گَرد خدا بیگونَه ئو اِ فگِرتو دشمن بینونی، ئو یَه اِنوم شَرَباریتو دیارَ موئیا.

اول تِسالونیکیَل 4:13

مِنتائای اِاِ بِرال، نِمِمو اژ ایمودارَلی گه مِردِنَ بی‌خَوَر بوئینو، ناخواد هُمِه‌یش اِجور باقی مردِم گه امید نِرِن، بنیشینونَ خُصَه هُاردِن.

اول تِسالونیکیَل 5:6

اِسَه باس اِجور باقی، نِئسیم، بلکِم بِمینیمَ خَوَر ئو وَه سر ووژمونا بوئیم.

اول تیموتائوس 6:9

مِنتائای اونَلی گه هانِ تَما ثرودمن بیئِن، مَکُوئِنِ وسوسَه ئو تِلَه هُواوهوسَلی گه پُیچِن ئو ضِرَد دیرِن ئو باعث نابودی ئو هِلاکت مردِمَ موئن.

تیتوس 3:3

اَرِیَگه ایمِه‌یش ووژمو زمونی نایو، کورفِربو، اَژرئی‌اِرهاتی، بَنَه کُلِ جور شَوَت ئو هُواوهوس بیمو ئو اِ کینَت ئو حَسوئی زِنِه‌یمونَ مَهَرد، مردِم اژ ایمَه بیزار بین ئو ایمِه‌یش اژ یَکتِری بیزار بیمو.

اول پطرس 1:14

اِجور آیلَل فِربوبَر، دیَر نوئن اِجور هُواوهوسَلی گه دورَه نایونی اَسگَه‌تونَ داشد.

دوئِم پطرس 2:14

اونَ چیَمَلی دیرِن پِر اژ زِنها گه اژ گنا کِردِن سیر نِموئن. ایی آیلَل لیَنتَ، گیونَلی گه سُسِن ماوژِنِ تِلَه ئو دلَلون اَرِه طَما آوِردیَسَ عمل!

دوئِم پطرس 2:18

اَرِیَگه وَه قصَه‌لی گه وَه دَنگ کَلِنگ پر اژ قُراتی ئو نَفیَمیَ، اونَلی گه وَه ایی تازَه اژ چِنگ کسَلی گه اژ رئی اِرهاتِنَ حِواینَ، ماوژِنِ تِلَه شَوَتَل نفسونی ووژو.

اول یوحنا 2:16

اَرِیَگه هر چی گه ها نوم دنیااِر، یانی چیئَلی گه جسم ها دُمونا ئو چیئَلی گه چیَمَ موئینی ئو مِیتی ئو قُراتی مالِ‌مَقوم، اژ باوَه نیَ بلکِم اژ دنیاءَ.

اول یوحنا 2:8

وَه ایی حالا، حکمی گه اَرِنتونَ مَنُیسِنِم حکِم تازه‌ی کَ گه حخیخت اَوَه، هم اِنوم او ئو هم اِنوم هُمَه دیارَ، اَرِیَگه تیَریکی دیری مَگُذَری ئو نُیر حخیخی هَراِسگِه‌یشَ بِریقَه مایتی.