اول تیموتائوس 1:9 - کتاب مقدس به زبان لکی - گویش مرکزی

⁹ هَمیش مَذانیمو شریعت نه اَرِه آمَل صالح، بلکِم اَرِه کسَلی کَ گه قانونَ مَنِنِ ژیر پا ئو کسَلی گه کورفِربونِن، اَرِه بی‌دینَل ئو گناکارَل، ئو ناپاکَل ئو کِفِرچیَل؛ اَرِه خوینیَل باوِه‌ئودا؛ اَرِه کسَلی گه آمَ مَکُشِن،

اول تیموتائوس 1:9 Iomraidhean Croise

مَتّی 10:21

بِرا، بِرا ووژ تسِلیم مرگَ مِهِه ئو باوَه اولاد ووژ. آیلَل اَرضد دائوباوَه هیزَمَگِرِن ئو باعث کُشتِن اونِلَ موئن.

رومیان 1:30

بُختِم‌چی، دشمن خدا، گُرساخ، قُرات ئو هوفَلِن. اَرِه اَنجوم دائِن کارَل شر، ریئَل نوو دُریسَ مَهَن. فِربون اژ دا‌باوِه‌ئو نِمیَرِن،

رومیان 4:13

اَرِیَگه وَه‌سونگَ شریعت نوئی گه وَدَه هاوِنتَ ابراهیم ئو نسِل او گه دنیا میَرِنَ میرات، بلکِم وَه‌سونگَ اَ صالح‌بیئینی گه اژ ایمونَ.

رومیان 5:20

اِسگَه، شریعت هات تاگَه کورفِربونی فِرَه‌آ بو؛ مِنتائای جای گه گنا فِرَه‌آ بی، فیضِ بی‌حدِحساو، فِرَه‌تِرا بی.

رومیان 6:14

اَرِیَگه گنا اَر هُمَه حکِمرونی نِمِهِه، اَرِیَگه اِژیر شریعت نیئینو بلکِم هاینونِ ژیر حکِمرونی فیض‌اِر.

غَلاطیَل 3:19

اِسَه مصقود اژ شریعت چیَ؟ شریعت وَه خاطر کورفِربونیَل اضافَه‌آ بی، اویشَ فَخَد تا وخدی گه اَ ’نسِلَ‘ گه وَدَه هاوِنتیَسیَ بی، بای. شریعت وَه‌سونگَ فریشدَه‌ل ئو وَه دس بَسخَه‌کَری نیریا.

غَلاطیَل 5:18

مِنتائای اَرّ وَه روحِ خدا هدائَت بوئینو، دیَر اِژیر شریعت نیئینو.

غَلاطیَل 5:21

حَسوئی؛ مَسی، عِیاشی ئو هُنَ چیئَلی. هَرهُنَ گه وِرِکار هُشتارِم داءَ بینتو، هَنی هُشتارَ میَم گه کسَلی گه هُنَ کارَلی مَهَن پاتِشائی خدا نِمیَرنَ میرات.

غَلاطیَل 5:23

مِلائمت ئو نوا ووژ گِرتِنَ. هُیچ شریعتی اَرضد یوئنَ نیَ.

دوئِم تِسالونیکیَل 2:8

اَسَه اَ بی‌دینَ ظاهرَ ماو، گه خداون عیسی وَه حَفار دَم ووژ نابودَ مِهِیتی ئو وَه بِریقَه ظاهربیئِن هاتِن ووژ ریشی اِرَمارِتی.

اول تیموتائوس 4:7

کارتِ پاچائَل پُیچ ئو کِفِر ناو، بلکِم ووژت اِ دینداری تربیت بِهَه.

اول تیموتائوس 6:20

اِاِ تیموتائوس، اَمونتی گه سپارتیاسَ بینِت، حفظ کَ. اژ چِنَه‌ل مِفت ئو کِفِر ئو بَثَلی گه اَرضد یَکِن ئو وَه خِلَطَ موشِنَ بینو شناخت، دویرا بِگِر.

دوئِم تیموتائوس 2:16

مِنتائای اژ چِنَه مِفت دائِن دویرا بِگِر، اَرِیَگه ویشتِرِ ویشتِر مردِمَ میَری ویرِ بی‌دینی.

دوئِم تیموتائوس 3:2

اَرِیَگه مردِم فَخَد ووژو دوس دیرِن، پیل‌دوسِن، قُرات ئو کِلَچِن، دُشمین‌فِروشِن، کورفِربون اژ دائوباوَه‌لو ئو بولَت ئو ناپاکِن،

تیتوس 1:10

اَرِیَگه فِرَه کسَل هَن گه تور، چِنَه‌مِفت ئو رِنگَرِن، مصخوصاً اونَلی گه اژ دسَه طرفدارَل ختینَه‌ن‌.

تیتوس 1:16

اونَل ادعا مَهَن گه خداءَ مَشتاسِن، مِنتائای وَه کارَلو حاشا مَهَنی. تویک‌تیَل ئو کورفِربونِن ئو اَرِه هر کار خوئی بیلاوِن.

تیتوس 1:6

شیخ کلیسا باس چیئی اِنوم زِنِه‌ی ناوتی گه وَه‌سونگَ اَوا لارَ بوتی اَری ئو میردَه یِه ژَن بو ئو آیلَل باایمونی داشدوئیتی گه اژ هر جور بُختِم خیزی ئو توری دویر بوئن.

تیتوس 3:3

اَرِیَگه ایمِه‌یش ووژمو زمونی نایو، کورفِربو، اَژرئی‌اِرهاتی، بَنَه کُلِ جور شَوَت ئو هُواوهوس بیمو ئو اِ کینَت ئو حَسوئی زِنِه‌یمونَ مَهَرد، مردِم اژ ایمَه بیزار بین ئو ایمِه‌یش اژ یَکتِری بیزار بیمو.

عِبرانیَل 11:31

وَه ایمو بی گه راحابِ خِراو وَه‌گَرد اونَلی گه کورفِربونیو کِردوئی، نکُشِریا، اَرِیَگه وَه گرمی چوئیِ گِرد جاسوسَل.

عِبرانیَل 12:16

تاگَه هُیچ‌کُم اَژینتو اِجور عیسو بی‌عصمت یاگَه نامقدّس ناو، گه حخ اول‌زا بیئِن ووژ فِروتیَ جُمی آش.

اول پطرس 2:7

اِسَه اَرِه هُمَه گه ایمونتو آوِردیَ، یَه عزّتَ. مِنتائای اَرِه اونَلی گه ایمونو ناوِردیَ، «بَردی گه مِمارَل رَدو کِرد بیَ بَرد بِنچین ساخدِمو،»

اول پطرس 3:20

اَرِیَگه اَ روحِلَ قدیم کورفِربونیو کِرد، اَسَه گه خدا اِ زَمو نوح گه کَشتیِهَه دُریسَ موئیا، وَه صبِر چیَمَ‌رئی بی. اِنوم اَ کَشتیَ فَخَد چَن نفر، یانی هشت نفر، وَه‌سونگَ آو نجادو گِرت.

اول پطرس 4:18

ئو «اَرّ آم صالح وَه سخدی نجاد بِگِری، خدانشتاسَل ئو گناکارَل چِه‌ئون اِرَمای؟»

یهودا 1:15

تا اَر کُل داوری بِهِه ئو کُل خدانشتاسَل وَه‌سونگَ کُل کارَل شرَباری‌ای گه اِنوم خدانشتاسیو کِردیَ مَکوم کِ، ئو وَه تقاص کُل قصَه‌ل گَنی گه گناکارَل خدانشتاس اَرضد اوُ وِتیَ، مَکومو کِ.»

مِکاشفَه 21:8

مِنتائای بی‌جورَتَل ئو بی‌ایمونَل ئو تویک‌تیَلَل ئو آم‌کُشَل ئو زِنهاکارَل ئو جادوگرَل ئو بِت‌پِرَسَل ئو کُل دِروزِنَل، دریاچَه گُرگِرتی وَه آگِر ئو گوگرد، ماوَ نَصُیو. یَه مرگ دوئِمَ.»

مِکاشفَه 22:15

سگَل ئو جادوگرَل ئو زِنهاکارَل ئو آم‌کُشَل ئو بِت‌پِرَسَل ئو هر کی گه دِرو دوس دیری ئو اَنجومَ مِیتی، هانَ دِریر.