प्रकाशित वाक्य 1:5 - लाहौली बाइबिल

^5-6 दंङ यीशु मसीहू तरफे केतिंङ मोह्ड़े दाह ए शांति खोकसोतो, अतु बचनो टोईच़ी विशवास लेह तरपोंई दुह ए तोह सिमी थल यह्च़ा श्रींङे इलि दंङ दुह दि संसारो रज्ज़ा तु अधिकारी तोह। दोई हेंदंङ साते दाह लहज़ा दंङ हेंदिंङ बचाएच़ा, दोई एनोह शुहई दोरच़ी हेंदिंङ पापो दोरच़ी बचाएच़ा। दोई हेंदिंङ झांह ठ्रोह मीह बणाके चरच़तो, अतु परमेश्वर दोतु रज्ज़ा तोह दंङ दोई हेंदिंङ एनोह बाह परमेश्वरो थल्जी यहुदी पुरोहित बणाके च़रति। दोबि आदर ए अधिकार हमेशा खोकसा लोहतो। अमीन।

प्रकाशित वाक्य 1:5 Iomraidhean Croise

मत्ती 20:28

छना कि गेह मीहू योह; दिऊ थल्जी अंज़े मशुह कि गिऊ सेवा टहल शुहबी जूंस, पर दिऊ थल्जी अंज़े शुह कि सेवा टहल लोहग, दंङ महसतिङ बचाएच़िमी थल्जी घेंङौ जान रमोग।”

मत्ती 28:18

यीशुज़ि दोतु कछंङ अंज़े कुंई, “स्वर्ग ए धरतीऊ भत्ते अधिकार गिह्बी रांहषी तोह।

यहून्नो 13:1

फसह त्यार बे तुहई, अपेहल यीशु ज़ि ञेंह केहरी, कि गिऊ टेम पिचे अंजा कि दि संसार केट्रा पिता परमेश्वरो कछंङ वापिस अच़ा योग, दंङ एनोह चेला तंङ साते अंऊ संसारारंङ तोईरे, छना ठ्रोह दाह दोई तहच़ते, हमेशा ध्वांए ठ्रोह दाह लहज़ाते,

यहून्नो 13:34

गेह केतंङ इच्च़ा खरकोई हुकुम रन्ड्रातग कि इदिऊ अईदिऊ रंङ साते दाह लांही; ध्वांए छना गेह केतंङ साते लहज़ातग, ध्वांए केहच़ी ला इदिऊ अईदिऊ रंङ साते दाह लांही।

यहून्नो 15:9

छना पिता परमेश्वरे गेरंङ साते दाह लहरी, ध्वांए गेह केतंङ साते दाह लहरिगा, गिऊ दाह रिंङ बणेंक बंङज़ोंई।

यहून्नो 18:37

पिलातुसे दोरंङ साते कुई, “दंङ छि कांह रज्ज़ा शुनाह?” यीशु ज़ि जुबाब रेंई, केई कुट्रातन कि गेह रज्ज़ा शुगाह; गिऊ जन्म लेहपच़मि ए संसारारंङ अपिमी बजह दिह शुह कि गेह सच्चाई ऊ पाहठी सिखाएपोग। सच्चाई ऊ टोहकठे जोज़ा दोरे भत्तेर गिऊ गप्पा रेड्रातोर।

यहून्नो 3:11

गेह करंङ साते हेले कुट्रातग कि ञेंहच़ी छि ञेंहच़ातन, दुह कुट्रातंई, दंङ अंऊ ञेंहच़ी तंङरी दोऊ गवाही रंड्रातंई, दंङ ञेंहच़ी छि कुट्रातन दोऊ टोहकठे केहच़ी विशवास माह लहज़ातंई

यहून्नो 3:16

छना कुचे परमेश्वरे संसारो मीहतंङ साते झांह ठ्रोह दाह लहरी कि दोई एनोह इच्च़ा योह रें च़रति, कि अच़िला दोऊ टोहकठे विशवास लोहतो दुह नाश माह शोह्तो, पर दोच़ी अनंत जीवन खोक्पोर।

यहून्नो 3:32

अंऊ ला दोई खंणी दंङ रेड्री, दोऊ ए गवाही रंड्रा; पर थोड़े अरे मीहरे दोऊ गवाही ग्रहण लहज़ातेर।

प्रेरित 20:28

झांह लेह केरे केनातु ध्यान तंही दंङ दुह झुण्ड़ो ला, अतु पोहाल केतिंङ पवित्र आत्मा ज़ि अंङषी ततो कि केरे परमेश्वरो मीहतु देखभाल लंहि, अपि दोई एनोह शुई रें च़ुमसी शुह।

प्रेरित 26:23

कि मसीह बि दुख उठाएच़ीमी शोतो, दंङ दू ए भत्ते बे तुहई सिए दोतु बिचंङज़ि श्रींङे शुहचे, यहुदी ए ऊईजाति तु बिचंङ दि घोषणा लहज़िमी थल्जी कि दोरे बचेके योर, अंऊ कि छंङी ओ ठ्रोह तोतोर।

रोमियो 3:25

परमेश्वरे यीशु मसीह बि हेंदु पापो थल्जी बलि शुहबिमी थल्जी च़चे च़रति। यीशु मसीह ज़ि एनोह जीवनो बलि दिऊ थल्जी रें च़रति, ताकि दोऊ टोहकठे विशवास लहज़ा हेनर परमेश्वरो कछंङ अपि तरपोंई। दंङ परमेश्वरे दि दिऊ थल्जी लहरी कि दोई तुहई दि सही लहरी, अपेहल दोई पापी तिंङ माफ लहज़िमी थल्जी धीरज़ लहरी। दिरंङ दि ला पता लेहकी यवात कि परमेश्वर सही तोह, अपेहल दोई दुह मीहतिंङ अपनाएच़ा अंऊ यीशु टोहकठे विशवास लहज़ातोर।

रोमियो 8:37

पर दि भत्ते गप्पारिंङ हेनर दोऊ दोरच़ी ए जयवंत ला शुहचे य्वातंई, अच़ि हेंदंङ साते दाह लहज़ा।

1 कुरिन्थियों 6:11

तुहई केहतु बिचंङ रे ध्यांए ठ्रोह श्रींङमातेर, पर केरे प्रभु यीशु मसीहू मिंदंङ साते ए हेंदु परमेश्वरो आत्मा रंङ साते केहतु पाप शुहल्ज़े चरच़तो, दंङ केतिंङ एनोह थल्जी शत्‌ह लहरी दंङ केतिंङ एनोह नज़ारारिंङ धर्मी बणाके चरच़तो।

गलातियों 2:20

गेह ञेंहनि मसीह रंङ साते क्रूसो टोईच़ी सिए इलिगा, एंतेग गेह श्रींङी माह केहश्रिगा। दंङ गेह फुका रिंङ एंतेग श्रींङी तोतोग; दंङ सिर्फ परमेश्वरो योह टोहकठे विशवास रंङ साते श्रींङे तोतोग, अंऊ दोई गेरंङ साते धोंण दाह लहज़ा कि गिऊ थल्जी एनोह जहान रें च़रति।

इफिसियों 2:4

पर परमेश्वर महस दयालु तोह, दू एनोह दू मोह्ड़े दाह ओ वहज़ाज़ि अंऊ दोई हेंदंङ साते दाह लहरी।

इफिसियों 5:2

मसीहू उदाहरणो हिद लहज़ा, ऊईतु थल्जी दाह रंङ साते जीवन श्रींङमा तंई, अच़ि केतंङ साते दाह लहज़ा दंङ केहतु पाप उठाएच़िमी थल्जी एनाबि बलिदान लेह च़रति। दंङ दिरंङ खुश तोहई छना कुचे दू बलिदान दोऊ थल्जी इत्रो ठ्रोह तोह।

कुलुस्सियों 1:18

मसीह कलीसियाओ अगुवाई ध्वांए ठ्रोह लहज़ा, छना इच्च़ा मीहू पुंज़ा दोऊ फुका बि काबू लाह। दुह ए शुरूआत शुह दंङ सिऊ दोतु बिचंङ श्रींङज़ा दोतु बिचंङ जेठे तोह कि भत्ते गप्पारिंङ दुह ए प्रधान शोतो।

1 तीमुथियुस 6:13

परमेश्वरो तुईज़ी अंऊ भत्ते तिंङ ज़िंदगी रंड्रा, दंङ यीशु मसीह अंऊ पुन्तियुस पिलातुस ओ तुईज़ी एनोह पाहठी हेले कुहते, दोकु झुल्लो हाज़िरी रिंङ, गेह केतिंङ दि हुकुम रंड्रातग।

1 तीमुथियुस 6:15

परमेश्वर, अंऊ इच्च़ा ए झांह ठ्रोह रज्ज़ा तोह अंऊ तरीफो जोगे तोह, रज्ज़ा तु रज्ज़ा ए प्रभु तु प्रभु तोह। दोई ए ठीक टेमारिंङ मसीह बि प्रगट लोहतो।

इब्रानियों 10:29

अगर मूसा ओ कानूनो हिसाबे झांह ठ्रोह सज़ा तोहई, दंङ दू मीहू सज़ा महस मोह्ड़े शोतो अंऊ परमेश्वरो योह अपमान लहज़ा। दोई परमेश्वरो योह बि एनोह कोंज़ो पोयंङ नुच़िह चरच़तो छना कुचे दोई दोऊ आदर-सत्कार माह लहरी। दोई मसीहू दू शुहई अपवित्र ञेंहरी अतु दोरच़ी परमेश्वरे दोबि पवित्र बणाएच़िमी वाईदा शुरू लाहते। दोई पवित्र आत्माओ अपमान लहरी अतु दोरच़ी दोई मोह्ड़े दाह खोकच़ातंई।

इब्रानियों 9:14

दंङ सोचेक्तुंई कि मसीहू शुहई हेंदु सेहमा बि दू कमो दोरच़ी अंयों शुद्ध लोहतो अंऊ मौतो हखा शिलज़ातोर, ताकि हेनर श्रींङे परमेश्वरो सेवा लोहनि। छना कुचे अनंत आत्माओ सामर्थो दोरच़ी, मसीह ज़ि हेंदु पापो थल्जी एनाबि बलिदान लेह परमेश्वर बि भेंटो रूपारिंङ रें च़रति।

1 पतरस 1:19

दिऊ वहज़ाज़ि, परमेश्वरे केतिंङ मसीहू अनमोल शुहई दोरच़ी च़ुमने च़रति अंऊ हेंदु पापो थल्जी बलि ऊ रूपा रिंङ सिए इलि। दोऊ मौत हेंदु थल्जी परमेश्वरो इच्च़ा कुरच़ो रूपा रिंङ सिद्ध बलि तोहई, छना कि यहुदी पुरोहिता तु दोरच़ी बलि चढ़ाएच़ा सिद्ध ए छल्ले दाग मेह तोहईरे।

1 यूहन्ना 1:7

अगर हेनर सही तरीका रंङ जीवन श्रींङमोंई, छना परमेश्वर सिद्ध रूपा रिंङ हेले तोह ध्वांए हेनर ला हेलेरिंङ श्रींङमोंई, दंङ इदि-अईदिरंङ साते संगति तहज़ातंई। दंङ परमेश्वरो योह यीशु मसीहू शुहई हेन्दिंङ भत्ते पापो दोरच़ी शुद्ध लहज़ा।

1 यूहन्ना 4:10

हेंदु दाह परमेश्वरो थल्जी सच्चे माह, पर परमेश्वरो दाह हेंदु थल्जी सच्चा तोह। परमेश्वरे हेंदु पाप ऊई तार लहच़िमी थल्जी एनोह योह बलिदान लेह च़रति अतु वहज़ा ज़ि हेंदु पाप माफ शुहचे इलिर।

प्रकाशित वाक्य 11:15

अपेहल सातवें स्वर्गदूते तुरहीरिङ फुह लहरी, दंङ गेह स्वर्गंङ तेज सग रें हाऊष रंड्री रेड्रीगा: “संसारारिङ हेंतेग अरिला माह अच़ि राज लोहतो। सिर्फ हेंदु प्रभु परमेश्वर ए दोऊ अंङषी मसीह, दंङ दोई हमेशा-हमेशा ओ थल्जी राज लोहतो।”

प्रकाशित वाक्य 11:3

“दंङ गेह घेंङौ झुह्ट गवाह तिंङ दिह अधिकार रमोग कि टाट चोक्सा ते इच्च़ा हज़ार झुह्ट राह षुमु निह्ज ध्याड़ा तचेक भविष्यवाणी लंहि।”

प्रकाशित वाक्य 17:14

दोरे कुरच़ो खिलाप लड़ेपोर, पर कुरच़ा दोतिंङ यहरच़े च़रपोतो, छना कुचे दुह प्रभु तु प्रभु ए रज्ज़ा तु रज्ज़ा शुह। कुरच़े एनोह बुलासी दोरे, अंङषी दोरे दंङ विशवासो जोगे साथी तंङ दोतु टोईच़ी द्रक्शे योतो।

प्रकाशित वाक्य 19:11

दंङ गेह स्वर्गा बि अलसी तंङरिगा, दोर्तिंङ गिऊ तुईज़ी छंङसी रहंङ तोह; दंङ दोऊ टोईच़ी इच्च़ा सवार तोह, अंऊ परमेश्वरो विशवासो जोगे ए सच्चा सेवक शुह; दंङ धर्मिक हिसाबे दोई दोऊ बैरीतु फेंसला लहज़ा दंङ दोतु खिलाप लड़ाई लड़ेक्पा।

प्रकाशित वाक्य 19:16

दंङ दोऊ चोगा ए पुष्टू टोईच़ी दि मिन च़ेहसी तोह: “रज्ज़ा तु रज्ज़ा ए प्रभु तु प्रभु।”

प्रकाशित वाक्य 2:13

गेह दि ञेंहच़ातग कि काह दुह शहरारिंङ बंङज़ातन अंऊर शेताने राज लहज़ा। काह गिऊ थल्जी विशवासो जोगे बणेंके बंङज़िन दंङ गिऊ टोईच़ी विशवास लहज़ी ब्याड़ा माह लहरिन। केई दुह मुक्का ला विशवास लहरिन अपेहल दोच़ी अन्तिपासा बि दोर्तिंङ सच़ी च़रतिर अंऊर शेताने राज लहज़ाते। अन्तिपास मीहच़ी गिऊ पाहठी विशवासा रंङ साते कंङातोर।

प्रकाशित वाक्य 3:14

लौदीकिया शहरो कलीसिया ओ स्वर्गदूता बि दि चेऊ: “कि दि खबर दोऊ तरफे तोह अंऊ अमीन तोह। दुह विशवासो जोगे ए परमेश्वरो पाहठी सच्चाई बि प्रगट लहज़ा, दंङ गेह दुह तोतोग अतु दोरच़ी परमेश्वरे भत्ते चीज़ा तु रचना लहरी।”

प्रकाशित वाक्य 7:14

दंङ दोतंङ साते कुड़िगा, “हे मालिका, गेह माह ञेंच़ातग पर केई ए ञेंच़ातन,” दोई गिऊ हखा कुई, “दिरे दुह मीहरे शुरे अंऊ दोच़ी महस दुखो अनुभव लहसी शुह। दोच़ी एनोह खमज़ेर कुरच़ो शुहई रें शुहल्ज़े चरच़ातोर दंङ हेंतेग दोरे छंङसी शुहचे इलोर, दिऊ मतलब दि तोह कि दोतु पाप मिटाके केहषी तोह।”