1 पतरस 2:23 - लाहौली बाइबिल

²³ अपेहल मीहच़ी यीशु अपमान लहरिर, दंङ दोई किरच़े ते दोतु अपमान माह लहरी। दंङ माह ए दोई दोतिंङ दुख रंड्रीमी कोशिश लहरी, बल्कि दोई एनोह मदतो थल्जी परमेश्वरो टोईच़ी भरोसा लहरी। दोई ञेंहच़ाते कि परमेश्वर हमेशा सच्चाई रंङ साते मीहतु न्याय लहज़ा।

1 पतरस 2:23 Iomraidhean Croise

लूको 23:41

दंङ हेनारे ता कानूनो हिसाबे सज़ा खोकच़ातंई, छना कुचे हेंज़ी हेंदु कर्मो फल खोक्चातंई; पर दिह छले मांजी कम लहसी माह।”

लूको 23:46

दंङ यीशु ज़ि मोह्ड़े हाऊष रें कुहतो, “हे बाह गेह घेंङौ आत्मा कांह गुहड़िंङ रंड्रातग,” दंङ दिह कुचे प्राण रें च़रति।

लूको 23:9

दुह यीशु दोरच़ी अंयों शुहदा गप्पारे रुहक्च़ी लेहती, पर दोई दोबि छले जुबाब माह रेंई।

प्रेरित 17:31

छना कुचे दोई इच्च़ा ध्याड़ा ठहरासी ततो, अंऊर दोई दुह मीहू दोरच़ी धर्म रंङ साते संसारो न्याय लोहतो, इच्च़ा मीह तोह अतिंङ दोई दोतिंङ रूठे रंङ न्याय लहज़िमी थल्जी ठहरासी ततो, दंङ दोई दोबि सिमी दोरच़ी यह्च़ा श्रींङमी लहज़ी दि पक्‍का लहरी कि दुह, दुह ए शुह।

प्रेरित 4:29

धह हे प्रभु, दोतु धमकी रेड्रा; दंङ केनोह सेवकातिंङ वरदान रोंऊ कि कांह बचन मोह्ड़े याहबा रंङ साते सुनाएपोर।

प्रेरित 7:59

दोरे स्तिफनुस ओ टोईच़ी रघ द्रले केट्री लेहकी तोईरे, दंङ दुह दिह कुट्रा ते प्रार्थना लहज़ी लेहकी तोहई, “हे प्रभु यीशु, गिऊ आत्माबि ग्रहण लोह।”

प्रेरित 9:1

दिह ए मुक्का रिंङ शाऊल अंऊ हेंतेग तचेक प्रभु यीशु ऊ चेला तिंङ धमकाएच़ी ए दोती सच़िमी साकिम रिंङ तोहई, यहुदी महापुरोहितो कछंङ इलि।

रोमियो 2:5

पर केरे ज़िद्दी तोतोंई दंङ झांह लेह केरे पश्चाताप लहज़िमी रंङ साते इंकार लहज़ातंई, झांह लेह परमेश्वर केतिंङ महस खरे सज़ा रमतो। छना कुचे दुह ध्याड़ा अपि लेहकी तोह, अपेहल परमेश्वरे एनोह रोहष कमबोतो दंङ एनोह सच्चा न्याय प्रगट लोहतो।

इफिसियों 6:9

दि तरीका रंङ अंऊ मालिक तोतोर, दोरे ला एनोह दास रंङ झांह ठ्रोह व्यवहार ए दोतिंङ बेई लहज़ी ए धमकाएच़ी छोड़ेके च़रतेंई, दंङ दोतंङ साते रूठे बरताव लंहि। छना कुचे केहच़ी ञेंच़ातंई, कि दोतु ए केहतु झुल्लो मालिक स्वर्गारिंङ तोह, दंङ दोई अतंङ साते ला भेद-भाव माह लहज़ी।

2 थिस्सलुनीकियों 1:5

दिह भत्ते परमेश्वरो सच्चे फेंसला ओ साफ सबूत तोह, कि केरे परमेश्वरो राज्यो जोगे शुई, अतु थल्जी केहच़ी भत्ते ज़ि दुख उठाएच़ातंई।

2 तीमुथियुस 1:12

दंङ दिऊ थल्जी गेह देर कैदारिंङ दुख उठाएच़ातग छना कुचे गेह मीहतिंङ यीशु मसीहू पाहठी प्रचार लहज़ातग, पर गेह शर्मिन्दा माह शवाहतग। छना कुचे गेह मसीह बि ञेंहच़ातग, अतु टोईच़ी गेह विशवास लहज़ातग, गिह्बी पक्‍का पता तोह कि मसीह दुह ध्याड़ा तचेक अपेहल तचेक दुह वापिस माह अपतो, रूठे खबरो रक्षा लेह तरपोतो अंऊ दोई गिह्बी रांहषी ततो।

2 तीमुथियुस 4:8

दंङ हेंतेग जीतो दुह मुकुट गिऊ थल्जी रुमज़ा, छना कुचे गेह घेंङौ जीवनो दोरच़ी परमेश्वराबि खुश लहतेग। प्रभु अंऊ धर्मिकताओ कम रंङ साते भत्ते मीहतु न्याय लहज़ा दुह, दुह ध्याड़ा गिह्बी दुह मुकुट रमतो अपेहल न्याय लहज़िमी थल्जी दोबारा अपतो पर दुह गिह्बी ए मशत पर दोतिंङ भत्ते दि ईनाम रमतो अंऊ दोऊ यह्च़ा अपिमी थल्जी रुमज़ा तोतोर।

इब्रानियों 12:3

यीशु उदाहरणो पाहठी सोचेक्तुंई, कि दोई दू पापी तु थल्जी अंयों सहन लहरी अंऊ दोरंङ धोंण नफरत लहज़ातेर। दोई दिऊ थल्जी दुख सहन लहरी, ताकि केरे निराश शुहचे हिम्मत छोड़ेके माह केईनि।

1 पतरस 3:9

बुराई बदलारिंङ बुराई था लंहि दंङ माह गाड़ी ऊ बदलारिंङ गाड़ी रांई; पर दिऊ बदलारिंङ आशीष रांई; छना कुचे परमेश्वरे केतिंङ ऊईतिंङ आशीष रंड्रीमी थल्जी बुलाएसी शुई। अगर केहच़ी झांह लहज़ातंई ता परमेश्वर ला केतिंङ आशीष रमतो।

1 पतरस 4:19

झांह लेह, अंऊ मीहरे ध्वांए ठ्रोह दुख सहन लहज़ातोर छना परमेश्वरे जुंज़ा, दोतिंङ परमेश्वरो टोईच़ी विशवास लहज़ी जारी तहच़ि जूंशी तोह। परमेश्वरे हमेशा दू ए लहज़ी अंऊ दू लहज़िमी दोई वाईदा लहसी ततो दिऊ थल्जी अंऊ रूठे तोह दू लहज़ी जारी तंही।

प्रकाशित वाक्य 19:11

दंङ गेह स्वर्गा बि अलसी तंङरिगा, दोर्तिंङ गिऊ तुईज़ी छंङसी रहंङ तोह; दंङ दोऊ टोईच़ी इच्च़ा सवार तोह, अंऊ परमेश्वरो विशवासो जोगे ए सच्चा सेवक शुह; दंङ धर्मिक हिसाबे दोई दोऊ बैरीतु फेंसला लहज़ा दंङ दोतु खिलाप लड़ाई लड़ेक्पा।