Yudas 1:4 - Taaz Weru Witu u Nunuwu'en Tombulu

⁴ Pahpaan mémoikatuzu'mé im wéwéhano sé tou mahwuni-wuni kimariala ni kamu. Ni séra én urémo tinotoz in ukumen. Ni séra é sé tou zéi'kan pandung si Opo Empung wo mahséa' u raraatéan-Na, wo séra toro menou-nou mengiit u lelo léwo' un awak. Ni séra kasii é soo makaulit i si Yesus Kristus si Mahkawasa wo si Mahpiarata én esa uman.

Yudas 1:4 Iomraidhean Croise

Matius 13:25

Taan i sana wengi, im péléng sé tou nimatekel, a méyé si kakoro' ni mengengeroz itii, ang kumeroza an tatanemen tanu ang gandum witu ung kinerozan am watuna ang gandum, a sia mangé.

Yohanes 17:3

Ung kenumo ung katou-touan makaz ing kauré-uré, i sé tou mata'u si Ama', si Ama' é si Opo Empung si esa uman si ulit wo mata'u ni Aku, si Yesus Kristus si méiatumé ni Ama'.

Kisah Rasul-rasul 11:23

I si Barnabas méikaayomola witu, an ilekennala kura si Opo Empung in timambér ung kamang wia ni séra, ni sia én totoz mahpaa-paaz. A séra sésaanala in zéi'kan toro mazéi' i ma'éman wia si Yesus Mahpiara.

Kisah Rasul-rasul 15:24

Ni kai én timalingamola im wéwéhan sé woopira tou im wia ni kai, sé zéi'kan méiatu naima é nimangémo wia ni kamu. Ni séra é nimangunola ni kamu mahzua-zua genang wo nimalinganga karia an tutuzu' néra.

Galatia 2:4

Un tumoro si Titus zéi'kan sinunat é méikakuamé pahpaan im witu ém wéwéhan sé mahkua-kua ma'éman wia si Yesus, taan un ulitna ni séra én towo, ni séra mahtututu' wo si Titus é sunaten. Ni séra é mahwuni-wuni i nimuntepé kimariala ni kai sé uli-ulit ma'émano si Kristus. Ni séra nimangunla an téntu wo séra toro mahilek apa um pahwangunenta i ni kita zéi'mo mahkiit un ukum Torat pahpaan nimaesa karia ni Kristus Yesus. Ni séra é mahtututu' wo kita ikakiit sumaup i mahwangun un ukum Torat. Sa kita ikakiitla, ni kita én tanu pahata-atan un ukum Torat itii.

Galatia 5:13

Katuari-katuari, ni kamu én ulit tinawahmo i maéndo tou zéi'mo pahata-atan. Taan tia' un zéi'mo pahata-atan itii én éndon niou oras i menou-nou mahwangun a singkéla'. Taan tawimo pahsawangala sé tou walina karia u raraatéan.

Efesus 4:14

Karia in téntu ni kita én zéi'mo tanu sé koki' sé mahkii-kiit uman an tutuzu' nimahwali-walinaan né menunuzu' towo. Niitu én tanumokan u sempa' pemolé-moléi u reges. Ni séra mahlululu uman karia an towo néra.

1 Timutius 5:8

Taan sa wéwéhan tou soo miara sé katuarina, lumouspé' kasiimé sé sana awuna in esa, si tou itii én timamburimola wia si Opo Empung wo ung kaléwo'an ni tou itii é lumouspé'mé sé tou zéi'kan ma'éman.

2 Timutius 2:12

Sa kita ezen im wana an zézéha, ni kita é mamerénta karia-Na. Taan sa kita mahkélong ni Sia, ni Sia kangkasii éng kumélong ni kita.

2 Timutius 3:6

Pahpaan im wia ni séra ém wéwéhan sé mahwuni-wuni i mahangé wana am walé né tou walina wo mahenou sé wéwéné zéi'kan enté' sé lakez singkéla' wo kinawasa a lelo néra in esa.

1 Petrus 2:16

Ni kamu én zéi'mo ata a singkéla' taan ni kamu é mémoipiloté im wana a singkéla'. Taan tia' wo pahpaano niitu, ni kamu ém wayaan uman um wangunen i mahwuwuni a singkéla' niou. Niitumo ung katou-touan niou é maéndola ata ni Opo Empung.

1 Petrus 2:8

Ni séra ém pahkasangkil wia ni Sia pahpaan zéi'kan mahtalinga u Nuwu' ni Opo Empung. Téntu un tinotozo ni Opo Empung i mamuali wia ni séra.

1 Petrus 4:18

Im witu um Pinantik Lenas é méipantik in téntii, “Sa sé tou ulit én tawi zéi'kan ipilot im witu un ukuman wana a singkéla' néra, kura u lamamuali wia sé tou zéi'kan pandung si Opo Empung wo mahsingkéla' wia ni Sia?”

2 Petrus 2:10

sé ipahpuu-puuna é sé tou sé mahkiit uman a lelo léwo' un awak néra a mahwangun ni séra in zéi'kan wangun wo mahséro' ung kawasa ni Opo Empung. Sé méster towo itii én totoz wuaya wo wera', makaz ni séra én zéi'mo maindé' i mahséro' sé pahloozen wo pahsigi'en witi kasendukan.

2 Petrus 2:7

Taan si Lot én tinulung-Na pahpaan ni sia é mahwangun an ulit ang kapaaz-Na. Si Lot én totoz in zézéha pahpaan am pemuali-mualin né tou sé zéi'kan mazéi' i mahmuali a léwo' a mahkiit uman a lelo léwo' un awak néra.

2 Petrus 3:7

Taan karia u Nuwu'-Na, u langit wo ung kaayahan in tarékan én zéi'kan linéwo' karia un api. Im witumokan un endo ni Sia in tumotoz am pahwangunen né tou in ulit kaapa zéi'kan, ni Sia é luméwo' sé tou zéi'kan pandung ni Sia wo kasii luma'ung u langit wo ung kaayahan.

1 Yohanes 2:22

Séi wé si towo itii? Zéi'kankuaa ni sia si mahkélong sa si Yesus é Mesias? Si kenumo si kakoro' ni Kristus, si mahkélong si Ama' wo si Oki'-Na.

Yudas 1:15

Ni Sia é métumotoz ulit kaapa zéi'kan am pinahwanguné né tou wo mémukum sé tou léwo' pahpaan a léwo'an pahmualin néra wo péléng a nuwu' zéi'kan wangun an ipahkua né tou mahsingkéla' itii wia si Opo Empung.”

Yudas 1:18

Pahpaan ni séra éng kimuamo wia ni kamu, “Merétéma ung kaakazan ung kaayahan, mondolé sé menénéro', sé menou-nou mahkiit uman a lelo léwo' un awak néra.”

Wahyu 15:4

Séi si zéi'kan maindé' wia ni Ko, o Opo Empung, wo zéi'kan mahsigi' wo mahlooz u ngaran-Mu? Pahpaan ni Ko uman si lenas; pahpaan péléng sé tahsasana wanua é mémongkot i sumigi' ni Ko, Pahpaan méikatuzu'momé ung kaulitan i ni Ko mahtotoz ulit kaapa zéi'kan péléng am pahwangunen né tou.”