Yudas 1:20 - Taaz Weru Witu u Nunuwu'en Tombulu

²⁰ Taan ni kamu katuari-katuari ikararaatéku, pahimekela ung katou-touan niou karia i mahkiit uman um pa'émanen un totoz lenas wo mengaléila karia ung kawasa ni Roh Lenas.

Yudas 1:20 Iomraidhean Croise

Kisah Rasul-rasul 15:9

Ni kita in tou Yahudi wo ni séra in tou zéi'kan Yahudi é masuat uman witu u sinaru ni Opo Empung. Pahpaan ni Sia é nimeresi un até néra mengiité um pa'émanen néra.

Kisah Rasul-rasul 26:18

i mangun am weren néra mawula', wo ni séra zéi'mo menou-nou witu ung karimbengbengan taan menou-nou witu un ayah. Wo menou-nou zéi'mo kinawasa ni tonaas né sétang taan mahkiito um paaz ni Opo Empung. Wo pahpaan um pa'émanen néra wia ni Aku, ni séra é makailek un ampungan wana a singkéla' néra. Wo ni séra kasii é makailek um wéwéténgan im wana an tinotozo in iwéhé ni Opo Empung wia sé tou sé linenas-Na.’

Kisah Rasul-rasul 6:7

U Nuwu' ni Opo Empung éng kalousnamo im pahkawoka'ma, wo sé tou ma'éman wia si Yesus witi Yerusalem éng kalakeznamo. Wo lakez kasii sé walian sé ma'émano wia si Yesus.

Kisah Rasul-rasul 9:31

Kumawusa niitu, péléng sé jamaat witi Yudea, Galilea wo Samaria é mahlé'o-lé'osan. Pahpaan u sasawang ni Roh Lenas, um pa'émanen néra éng kaenté'namo, maindé' wia si Opo Empung wo ni séra kangkasii éng kalakeznamo.

Roma 15:2

Si esa wo si esa im wia ni kita é léwo'zéi' mahtututu' i menéro u mahpaa-paaz ni kasuat tou i mangun ung kawangunanna, wo kaenté'na um pa'émanen néra.

Roma 8:15

Pahpaan si Roh ni Opo Empung si kinailekan niou én zéi'kan nimangun ni kamu nimaéndo ata makaz nimangun ni kamu kinaindé'ampé', taan si Roh ni Opo Empung si kinailekan niou é nimangun ni kamu maéndo oki' ni Opo Empung. Karia ni Roh ni Opo Empung itii ni kita én toro tumawah si Opo Empung, “O Abba, o Ama'ku!”

1 Korintus 1:8

Si Yesus Kristus Mahpiarata kangkasii é sumawang ni kamu wo um pa'émanen niou éng kaenté'na makaz witu un endo kaakazan ung kaayahan, wo im witu un endo itii i ni Sia méyé sumaup, ni kamu én zéi'kan siapa a sinala'.

1 Korintus 10:23

Katuari-katuari, wéwéhan im wia ni kamu sé mahkua, “Péléng am péléng én toro wangunenta.” Niitu én ulit, taan zéi'kan péléng am péléng ém wéwéhan torona. Niitumo zozo' “Péléng am péléng én toro wangunenta”, taan zéi'kan péléng am péléng é mahenté' ung katou-touan né tou.

1 Korintus 14:15

Niitumo, apa um wangunengku? Um wangunengku é si rohku i mengaléi karia u nunuwu'en un akaz uman si Roh Lenas si mata'u, ni aku kasii mengaléi karia u nunuwu'en ung kata'uangku. Ung kapaazku si rohku ing kumantar mahlooz karia u nunuwu'en un akaz uman si Roh Lenas si mata'u, ni aku kasii éng kumantar mahlooz karia u nunuwu'en ung kata'uangku.

1 Korintus 14:26

Katuari-katuari, kura in tarékan? Sa kamu nimaréwok i mahragés, um wangun si esa wo si esa é méndola katoroan tanu ang kenu: wéwéhan sé mahkantar ang kakantaren mahlooz si Opo Empung, wéwéhan sé mahtuzu', wéwéhan sé mahkua ung kalakoan tumoro u méiwunipé' ni Opo Empung, wéwéhan sé mahnuwu' karia u nunuwu'en un akaz uman si Roh Lenas si mata'u wo sé walina é mahkua ung kalakoan u nunuwu'en itii. Taan péléng niana é léwo'zéi' mahenté' um pa'émanen né tou.

Galatia 4:6

Pahpaan ni kamu én oki' ni Opo Empung, niitumo si Opo Empung nimatumé si Roh ni Oki'-Na witu un atéta, si tumawah, “O Abba, o Ama'ku!”

Efesus 4:12

Si Kristus timambér wia ni séra u makawawa i maayang wia sé tou linenas ni Opo Empung, wo séra makawawa i maayang wia si Opo Empung wo toro mahsawa-sawangan i mahenté' um pa'émanen néra in awak ni Kristus,

Efesus 4:16

Sé jamaat én tanu un awak, ni Siamo si nimimek un awak akaz nimatu'tul wangun, wo un esa wo un esa ém pinasondol karia am wuku. Wo un esa wo un esa wéténgna un awak mahpaayang wangun mengiit um paayangenna, péléng un awak é matua'na wo malutu' wo maenté' pahpaan i mahraa-raatéan tanu ni kita in jamaat maenté' pahpaan i mahraa-raatéan.

Efesus 4:29

Tia'mo a nunuwu'en saparuni mahondolé im witu u sumahmu. Taan mahnuwu' umané am wangun i sumawang sé tou walina i ni séra memandung a sasawang, wo sé tou timalingama u méipahnuwu'muma é makailek ung kamang.

Efesus 6:18

Wangunenola niana péléng karia i mengaléi wia si Opo Empung i sumawang ni kamu. Mengaléila karia ung kawasa ni Roh Lenas sekez in endo, tuméga-tégam wo tia' mahkana' i mengaléi. Tuméga-tégam i mengaléi wo tia'mo mazéi' i mahpengaléi sé tou linenas ni Opo Empung.

Kolose 2:7

Um pa'émanen niou é léwo'zéi' in enté' tanu un ahmut ung kai in timeptep witu un tana', menou-nou mahkiit uman ni Sia. Um pa'émanen niou kangkasii é léwo'zéi' ing kaenté'na tanu u mémoituzu' wia ni kamu, wo ni kamu kangkasii én tia' mazéi' i mahkua u makasé.

1 Tesalonika 5:11

Pahpaano niitu, ni kamu si esa wo sé walina é léwo'zéi' mahsésésaala wo maheenté'ala un até, tanu am pahwangunen niou makaz in tarékan.

1 Timutius 1:4

Ikua kasiila wia ni séra in tia'mo mahsirita a sirita zéi'kan ulit wo a sirita tumoro sé nimaopo an zéi'kan siapa akazna. A sirita itii é mahwangun uman am pahéndo-éndoan wo mahsaru uman ung ginenang ni Opo Empung i milot sé tou im witu un ukuman wana a singkéla', ung kinata'uanta mengiité um pa'émanenta wia si Kristus.

2 Timutius 1:5

Kagenangangkula i ni ko én uli-ulit ma'éman wia si Kristus tanu um pa'émanen ing kataré-taré ni nénému Lois wo ni ina'mu Eunike. Wo totoz kata'uangku sa um pa'émanennu én tanu um pa'émanen néra.

Titus 1:1

Um pinantik kenu ém wia ni aku Paulus a mangé, ata ni Opo Empung wo aatu ni Yesus Kristus. Ni aku é méiatu in tumuzu' sé tou pinéléng ni Opo Empung wo um pa'émanen néra é maenté', wo kasii séra toro mata'u tumoro an tutuzu' ulit am pengingilekenta im wana am peraragésanta wia si Opo Empung.

Yakobus 2:22

Ilekenola, um pa'émanen é léwo'zéi' in ipapailekla wana am pahlé'osen. Pahpaan wana am pahlé'osen itii um pa'émanen é malekep.

2 Petrus 1:1

Um pinantik kenu ém pinantikku, Simon Petrus, ata wo aatu ni Yesus Kristus, iwéhé wia sé mahwali-wali karia nai sé ma'émano. Ni kita nima'éman wia si Yesus Kristus pahpaan ni Sia é si Opo Empung wo si nimilot ni kita im witu un ukuman wana a singkéla' wo si zéi'kan mahsanaweka.

1 Yohanes 5:4

pahpaan péléng sé oki' ni Opo Empung éng kumala a léwo' wia ung kaayahan kenu. Ung kenumo ung kimala a léwo'an wia ung kaayahan kenu: Um pa'émanenta wia si Yesus.

Yudas 1:3

Katuari-katuari ikararaatéku, ni aku én totoz mahtututu' i nimantik tumoro ni kita péléng i mémoipiloté im witu un ukuman wana a singkéla'. Ni aku én totoz paaz i mantik um pinantik kenu wo sumésama wia ni kamu, wo kamu uli-ulit mahtututu' i rumembe-rembet witu um pa'émanen u mémoiwéhé wia sé tou linenas ni Opo Empung.

Wahyu 13:10

Séi si tinotozo im buin, tantumo ni sia é maiuntep bui. Séi si tinotozo im wunu'en karia um pisou, ni sia é léwo'zéi' im wunu'en karia um pisou. Niitumo un totoz ipahpuu-puuna, sé tou ni Opo Empung é léwo'zéi' in ezen wo tia' mazéi' i ma'éman.