Yohanes 8:19 - Taaz Weru Witu u Nunuwu'en Tombulu

¹⁹ Ang kuan néra wia ni Sia, “Wisa wé si Ama'-Mu?” Si Yesus mingkotla, “Ni kamu én zéi'kan mata'u ni Aku wo si Ama'-Ku. Sa kamu mata'u ni Aku, ni kamu kangkasii é mata'u si Ama'-Ku.”

Yohanes 8:19 Iomraidhean Croise

Matius 11:25

In toro niitu si Yesus mengaléi, “Ni Aku kumuama u makasé wia ni Ko, Ama', Opo Empung u langit wo ung kaayahan, pahpaan niana é méiwuni ni Ama' im wia sé tou tulap wo lakez ang kata'uan. Taan niana é méipapailek ni Ama' wia sé tou kanaramen sé mahkii-kiit uman tanu sé koki'.

Yohanes 1:10

Taan un ulitna u sena' itii ém wiamo ung kaayahan kenu wo ung kaayahan kenu ém winangun mengiité ni Sia, taan péléng sé tou wia ung kaayahan kenu zéi'kan mata'u ni Sia.

Yohanes 1:18

Zéi'kan siapa si tou nimahile-ilekola si Opo Empung, akaz uman si Oki'-Na si esa uman si nimileko si Opo Empung. Si Oki'-Na sekezé é mengari-ngaria si Ama' wo ni Siamo si mahtuzu'mé wia ni kita séi si Opo Empung.

Yohanes 15:21

Taan péléng niitu ém wangunen néra wia ni kamu pahpaan ni kamu ma'éman ni Aku, pahpaan ni séra én zéi'kan mata'u ni Sia si nimatumé ni Aku.

Yohanes 16:3

Ni séra mahwangun an téntu wia ni kamu pahpaan ni séra én zéi'kampé' mata'u si Ama' wo ni Aku.

Yohanes 17:3

Ung kenumo ung katou-touan makaz ing kauré-uré, i sé tou mata'u si Ama', si Ama' é si Opo Empung si esa uman si ulit wo mata'u ni Aku, si Yesus Kristus si méiatumé ni Ama'.

Yohanes 7:28

I si Yesus mahtuzu' witi lésaz um Walé ni Opo Empung, ni Sia mahkérét, “Niitu én ulit i ni Aku éng kata'uan niou wo kata'uan niou wisa ni Aku a méyé. Ni Aku im wia'i én zéi'kan pahpaan um paaz-Ku in esa, taan si Opo Empung si nimatumé ni aku. Ni Sia si nimatumé ni Aku én ulit wo ni kamu én zéi'kan mata'u ni Sia.

1 Korintus 15:34

Niitumo in tarékan, pakagena-genangela lé'os wo tia' kamu memangu-mangunpé' a singkéla'. Pahpaan im wia ni kamu ém wéwéhampé' sé zéi'kan mata'u si Opo Empung. Niitu én ikuakuma wia ni kamu wo kamu maizang.

Galatia 4:9

In tarékan ni kamu é mata'umo si Opo Empung, lumouspé'mé niitu si Opo Empung é mata'umo ni kamu. Kaa kamu mawuri uman taré wana an tinotoz an zéi'kan enté' wo zéi'kan siapa apa in iwéhé wo nimayo kasii un tou niou im pahata-atan an tinotoz itii?

Efesus 1:17

Ni aku mahaléi wia si Opo Empung si Ama' ni Yesus Kristus Mahpiarata, si pahloozen wo pahsigi'en itii i méhémé wia ni kamu si Roh-Na, si nimangun ni kamu matulap wo si Roh si matumuzu' tumoro si Opo Empung, wo ni kamu karia in ulit mata'u tumoro ni Sia.

Kolose 1:10

Karia in téntu, ung katou-touan niou ém wangun im witu u sinaru ni Mahpiara wo ni kamu éng kapaaz-Na im wana am péléng wo mua'mé am wangun im wana péléng am pahpaayangen niou, wo kalousna i mata'u tumoro ang kapaaz ni Opo Empung.

Kolose 1:15

Si Yesus Kristus én tumuzu'mé si Opo Empung si zéi'kan kailekan, ni Sia si kataré-taré wo ipahpuu-puuna im wia péléng sé winangun ni Opo Empung.

Ibrani 1:3

Ni Siamo si mahsena'mé u sena' ni Opo Empung wo mengiité ni Sia kita toro milek si Opo Empung. Karia u Nuwu'-Na un totoz mahkawasa, si Yesus mahtéiz péléng am wia ung kaayahan. Kumawusa Sia i miloté sé tou im witu un ukuman wana a singkéla', ni Sia rimumez witu ung kakan ni Opo Empung si totoz wangko' witi tampa totoz rakék.

1 Yohanes 2:23

Pahpaan séi si mahkélong si Oki', ni sia kangkasii én zéi'kan makaanu si Ama'. Séi si makaulitla i ma'éman wia si Oki', ni sia kangkasii é makaanu si Ama'.

1 Yohanes 5:20

Kata'uanta kasii i si Oki' ni Opo Empung é niméyémo wo niméhémo ung katulapan wia ni kita. Karia in téntu, ni kita mata'u Si Ulit wo maesa karia Si Ulit pahpaan nimaesa karia si Oki'-Na, si Yesus Kristus. Ni Siamo si Opo Empung, si ulit wo si mahwéhémé ung katou-touan makaz ing kauré-uré.

2 Yohanes 1:9

Si tou zéi'kan mahkiit an tutuzu' ni Kristus ang kumiitla an tutuzu' walina, ni sia én zéi'kan makaanu si Opo Empung. Séi si mahkiit an tutuzu' ni Kristus, ni sia é makaanu si Ama' wo si Oki'.