Yohanes 2:19 - Taaz Weru Witu u Nunuwu'en Tombulu

¹⁹ Kuan ni Yesus wia ni séra, “Kemuna um Walé ni Opo Empung kenu wo wanguneng-Ku mokan sumaup witu un teluna endo.”

Yohanes 2:19 Iomraidhean Croise

Matius 12:40

Pahpaan tanu si nabi Yunus én teluna endo wo teluna wengi im witu um poot ni seza' tua'na, téntu kangkasii si Oki' ni Tou én teluna endo wo teluna wengi witu lalem un tana'.

Matius 16:21

Rengan in toro niitu, pahpakaulito ni Yesus wia sé pahtuzu'en-Na, i ni Sia é léwo'zéi' i mangé witi Yerusalem. Im wana ni Sia é mazéhan né pahtutu'an né tou Yahudi, né tonaas né walian wo né tou tulap un Torat. Ni Sia ém wunu'en, taan witu un endo katelu ni Sia én itou sumaup ni Opo Empung.

Matius 27:40

wo mahkua, “É ni Ko si kumemu um Walé ni Opo Empung wo rumendai niitu sumaup witu un teluna endo, sa Ko uli-ulit Oki' ni Opo Empung, tumumpamomé im witu u salip itii wo tulungela un tou-Mu!”

Matius 27:63

ang kuan néra, “Tuang, kinagenangan naila i si tantowo itii i menou-noupé' éng kimua, ‘Kumawusa un teluna endo ni Aku é matou sumaup.’

Markus 14:58

“Tinalinga nai si tou kenu kimuala in téntii, ‘Ni Aku éng kumemu um Walé ni Opo Empung wo witu un teluna endo ni Aku é rumendai um Walé ni Opo Empung walina, un zéi'kan winangun né tou.’ ”

Markus 15:29

Si Yesus ém pahséro'an né tou mahlangkoi witu. Ni séra é mahséro' wia ni Sia karia i mengusi-ngusingsing wo mahkua, “É Ko si kumemu um Walé ni Opo Empung, wo rumendai niitu sumaup witu un teluna endo.

Markus 8:31

A si Yesus rengan i mahtuzu' wia sé pahtuzu'en-Na i si Oki' ni Tou é léwo'zéi' i mazéha wo kasoo né pahtutu'an né tou Yahudi, né tonaas né walian wo né tou tulap un Torat, wo sé tou é munu' ni Sia, taan ni Sia é matou sumaup witu un endo katelu.

Yohanes 11:25

Ang kuan ni Yesus wia ni sia, “Ni Akumo si tumou sumaup sé nimatémo wo mahwéhé ung katou-touan. Séi uman si ma'éman wia ni Aku, ni sia é mamenou-nou zozo' ni sia nimatémo.

Yohanes 5:19

A si Yesus mingkotla wia ni séra, “Uli-ulit ikua-Kuma wia ni kamu, si Oki' ni Opo Empung én zéi'kan mata'u kumura sa zéi'kan nimilek um winangun ni Ama'. Pahpaan apa um pahpaayangen ni Ama' niitu kangkasii um pahpaayangen ni Oki'.

Kisah Rasul-rasul 2:24

Taan ni Sia é méitoumé sumaup ni Opo Empung wo nimiloté ni Sia im witu un zéha um patéan, pahpaan ni Sia én zéi'kan mamuali i memitu-mitu ung kawasa um patéan.

Kisah Rasul-rasul 2:32

Si Yesus kenumo si méitoumomé sumaup ni Opo Empung. Wo tumoro niitu, ni kai péléng sé nimilek u nimamuali itii.

Kisah Rasul-rasul 3:15

Ni Sia si mahwéhémé un uli-ulit katou-touan wia péléng sé tou ém winunu' niouola. Taan ni Sia é méitoumomé sumaup ni Opo Empung im wia sé nimatémo. Ni kaimo sé nimilek a nimamuali itii.

Kisah Rasul-rasul 3:26

Niitumo, si Opo Empung ing kataré-taré én timoumé sumaup si Ata-Na an iatu-Nama i mangé wia ni kamu, wo ni Sia kumamang ni kamu karia i nimangun ni kamu timula'ula péléng a singkéla' niou, a mawuri sumaup wia si Opo Empung.”

Kisah Rasul-rasul 6:14

Ni kai kasii én timalingamola ni sia i mahkua i si Yesus si tou Nazaret itii éng kumayas um Walé ni Opo Empung kenu, wo ang kinanaram a méipahtuzu'ma ni Musa wia ni kita ém pahwalina-Na.”

Roma 4:24

taan niitu kangkasii é méipantik wia ni kita pahpaan ni kita kangkasii é niéndo ulit ni Opo Empung. Ni kita é niéndo-Na ulit pahpaan ni kita ma'éman ni Sia, si timoumé sumaup si Yesus Mahpiarata im wia sé nimaté.

Roma 6:4

Karia in téntu, ni kita é méilewengo karia-Na pahpaan i sinarani, wo tanu si Kristus i méitou sumaup ni Ama' im wia sé nimaté pahpaan ung kawangko'an ni Opo Empung, ni kita kangkasii é menou-nou witu ung katou-touan weru.

Roma 8:11

Si Roh ni Opo Empung, si timou sumaup si Yesus im wia sé nimaté é nimaesamo karia niou. Ni Sia si timou sumaup si Kristus Yesus im wia sé nimaté é méhé ung katou-touan witu un awak niou u maléwo' itii mengiité si Roh-Na si nimaesaan karia niou.

1 Korintus 15:12

Méipahwoka' nai wia sé tou i si Kristus é nimatémo an itoumé sumaup ni Opo Empung im wia sé nimaté. Kura kahuman im wia ni kamu ém wéwéhan sé mahkua sa sé nimatémo én zéi'kan itou sumaup?

Kolose 2:12

Pahpaan i ni kamu sinarani, a singkéla' niou én tanu mémoileweng karia ni Kristus; wo karia i sinarani kangkasii ni kamu é mémoitoumé sumaup wo nimakailek ung katou-touan weru mahwali-wali karia ni Kristus, pahpaan ni kamu é ma'éman ung kawasa ni Opo Empung si timoumé sumaup si Kristus im wia sé nimaté.

1 Petrus 3:18

Pahpaan si Kristus kangkasii é nimaté makasa uman in ziméi' a singkéla'ta. Ni Sia si mahwangun an ulit é nimaté in timubus sé tou mahwangun an zéi'kan ulit, wo kita toro ipahwali-Na wia si Opo Empung. Ni Sia ém winunu' i ni Sia in tou uman, taan ni Sia é méitoumé sumaup ni Roh Lenas im wia sé nimaté.