Yohanes 2:18 - Taaz Weru Witu u Nunuwu'en Tombulu

¹⁸ Sé tonaas né tou Yahudi é mahsaru si Yesus, ni séra mahkua, “Apa u makakompo'en un toro ipapailek-Mumé wia ni kai i mapailek ni Ko ém wéwéhan kawasa i mangun péléng niia?”

Yohanes 2:18 Iomraidhean Croise

Matius 21:23

A si Yesus muntepa witi lésaz um Walé ni Opo Empung. Karegas Sia mahtuzu' im witu, a méyé sé tonaas né walian wo sé pahtutu'an né tou Yahudi. Ni séra meligau wia ni Sia, “Wisa a méyé ung kawasa wia ni Ko i mahwangun péléng niitu? Séi si niméhé ung kawasa itii wia ni Ko?”

Markus 8:11

Tumondong niitu, a méyé sé woopira tou im wia sé sana réwok tou Farisi a mahzéi'-zéi'an karia ni Yesus. Ni séra é niméyé i mélumigau wia si Yesus i mapahsasala' ni Sia. Ni séra é mahaléi wia ni Sia i mangun u makakompo'en um witi kasendukan a méyé, i mema'wa' ni Sia.

Lukas 11:29

I si Yesus kinaréwokan né tou lakez, ang kuan-Na, “Sé tou in tarékan én tahlouso léwo'. Ni séra é mahaléi ni Aku i mapailek u makakompo'en, taan ni séra én zéi'kan papailekang-Ku um pahaléien néra, akaz uman u makakompo'en u nimamuali wia si nabi Yunus.

Yohanes 1:19

Téntii u méiwingkot ni Yohanes Menanarani im wia sé woopira walian wo sé suzu ni Lewi, sé méiatumé né tonaas né tou Yahudi sé witi Yerusalem, i meligau, “Séi ndéén ko wé?”

Yohanes 1:25

Ni séra é meligau wia ni sia, “Sa téntu, kaa ko mahsarani sé tou, sa ko zéi'kan Mesias, zéi'kan Nabi Elia wo zéi'kan nabi si méyé?”

Yohanes 6:30

Niitumo ni séra mahkua wia ni Sia, “Apa u makakompo'en um wangunen-Nu un toro ileken nai, wo kai ma'éman wia ni Ko? Apa um paayangen-Nu?

Kisah Rasul-rasul 4:7

A si Petrus wo si Yohanes iwali néramé witu um paheruzan né Mahkama Agama im pahtata'un um winangun néra. Tumondong niitu a séra meligau in téntii, “Séi si niméhé ung kawasa wia ni kamu? Kaapa karia u ngaran ni séi kamu i mahwangun péléng niana?”

Kisah Rasul-rasul 5:28

Kuana, “Ni kamu én totoz sinéro' naimola i mahtuzu' karia u Ngaran itii. Taan sé tou wia péléng u Yerusalem én timalingamoma an tutuzu' niou. Wo ni kamu é mapahsasala' ni kai tumoro ung kinawalian ni Tou itii makaz i nimaté.”