Yohanes 18:28 - Taaz Weru Witu u Nunuwu'en Tombulu

²⁸ Tumondong niitu, ipahwali nérama si Yesus im witi walé ni Kayafas a mangé witi istana ni gubernur Romawi. In toro niitu ém woondopé' lé'os. Sé tou Yahudi én zéi'kan nimuntepa witi istana itii, pahpaan sa kiit ung kinanaram né tou Yahudi, un tou néra é makati'tiren sa mahkari-karia wo sé tou zéi'kan Yahudi wo zéi'mo mata'u kuman im Paskah. In toro niitu ni séra é mamokuman witu um pésta Paskah.

Yohanes 18:28 Iomraidhean Croise

Matius 27:27

Tumondong niitu, si Yesus méipahwalima né suraro ni Pilatus witi istana ni gubernur, an tawahen néramé péléng sé kasuraro néra i maréwoké witu u makaliklik ni Yesus.

Markus 15:16

Tumondong niitu, a si Yesus ipahwalima né suraro witi lésaz u istana ni gubernur Pilatus. An tawahené péléng sé kasuraro néra i maréwoké witu.

Lukas 22:66

I mawoondomomé a maréwoké sé pahtutu'an né tou Yahudi wo sé tonaas né walian wo sé tou tulap un Torat, a Sia ipahwali nérama witi Mahkamah Agama.

Yohanes 11:55

In toro niitu un endo Paskah né tou Yahudi zéi'mo uré wo lakez sé tou sé wana am wanua mangé witi Yerusalem i meresi un tou puunala un endo Paskah itii.

Yohanes 18:13

Ing kataré-taré, ni Sia é méipahwali nérama wia si Hanas si Walian Wangko' im puuna. Si Hanas é mahnuang ni Kayafas. Si Kayafas ém Walian Wangko' in ta'un itii.

Yohanes 18:15

Si Simon Petrus wo si pahtuzu'en walina éng kimiita si Yesus. Si pahtuzu'en itii é mata'u si Walian Wangko', niitumo ni sia é nimuntepa witi lésaz u istana karia ni Yesus,

Yohanes 18:33

Si Pilatus nimuntepa sumaup witi istanana, tawahenamé si Yesus a meligau wia ni Sia, “Apa ni Komo si Kolano né tou Yahudi?”

Yohanes 18:39

Taan im witu um pésta Paskah niou, wéwéhan ung kinanaramku i milot si esaané im wia sé binui. Paaz kamu in ipilotkuma si kolano né tou Yahudi kenu wia ni kamu?”

Yohanes 19:11

Si Yesus nimingkotla, “Ni ko én zéi'kan siapa kawasa zozo' in esa wia ni Aku, sa ung kawasa itii zéi'kan méiwéhémé ni Opo Empung. Pahpaano niitu, si tou nimayo ni Aku wia ni ko, u singkéla'na é lumouspé'mé u singkéla'mu.”

Yohanes 19:14

Un endo itii én endo mahsiwo-siwo i lumé'os um Paskah né tou Yahudi. In toro niitu ém woo jam mapulu' wo zua i lolambot. A si Pilatus kumuama wia sé tou Yahudi itii, “Ileknola si Kolano niou!”

Yohanes 19:9

A sia muntepa sumaup witi istanana. I si Yesus méipahwalimomé i nimuntepé, a si Pilatus kumuama wia ni Sia, “Wisa Ko a méyé wé?” Taan si Yesus zéi'kan nimingkotla.

Kisah Rasul-rasul 10:28

Ang kuan ni Petrus, “Kata'uan niouo, sé tou Yahudi én totoz sinéro' i mahkari-karia kaapa i mengangangé wana am walé né tou zéi'kan Yahudi. Taan si Opo Empung éng kimuamo wia ni aku, i ni aku én zéi'kan mata'u kumua sé tou zozo' in esa i makati'tiren kaapa zéi'kan mata'u pahkari-karian.

Kisah Rasul-rasul 10:32

Niitumo, ni ko matumoma tou mangé witi Yope i mangémé si Simon si pahkuan Petrus. Ni sia é mahento' witi walé ni Simon si mahpaayang mahweresi ang kulit né binatang, si witi tembir un tasik.’

Kisah Rasul-rasul 11:3

Kuan néra, “Kaa ko mahangé wana am walé né tou zéi'kan Yahudi sé zéi'kan sinunat wo mahkan karia néra?”

Kisah Rasul-rasul 3:13

Si Opo Empung si pa'émanen ni Abraham, ni Ishak wo ni Yakub wo kasii si pa'émanen né nimaopota, ni Sia é simigi' wo limoozola si Ata-Na, si Yesus si méikasoo nioula wo méiayo nioula wia si gubernur Pilatus, zozo' si Pilatus in esa timotozola i milot ni Sia.

Kisah Rasul-rasul 4:27

Pahpaan un ulitna wia um wanua tua'na kenu é nimaréwoko si Herodes, si Pontius Pilatus, wo sé tahsasana wanua karia né suzu né Israel i sumaru si Yesus, si Ata-Mu Lenas, si Pinéléng-Mu.