Yohanes 17:3 - Taaz Weru Witu u Nunuwu'en Tombulu

³ Ung kenumo ung katou-touan makaz ing kauré-uré, i sé tou mata'u si Ama', si Ama' é si Opo Empung si esa uman si ulit wo mata'u ni Aku, si Yesus Kristus si méiatumé ni Ama'.

Yohanes 17:3 Iomraidhean Croise

Markus 9:37

“Séi uman si simungkul si koki' tanu si kenu pahpaan ma'éman ni Aku, ni sia é simungkul ni Aku. Séi uman si simungkul ni Aku, zéi'kan ni Aku si sinungkulna taan ni Sia si nimatumé ni Aku.”

Lukas 9:48

ang kuan-Na wia sé pahtuzu'en-Na, “Séi uman si simungkul si koki' tanu si kenu pahpaan ma'éman wia ni Aku, ni sia é simungkul ni Aku. Wo séi uman si simungkul ni Aku, ni sia é simungkul si Opo Empung si nimatumé ni Aku. Séi si zéi'kan ipahréké-rékén im wia ni kamu, ni siamo si totoz ipahpuu-puuna.”

Yohanes 10:36

kaa ni kamu mahkua ni Aku mahséro' wia si Opo Empung pahpaan mahkua ni Aku én Oki' ni Opo Empung? Ni Aku ém pinéléng ni Ama' wo nimatumé ni Aku i méyé wia ung kaayahan.

Yohanes 11:42

Kata'uang-Ku ni Ko sekezé é mahtalinga ni Aku, taan pahpaan sé tou lakez sé rimendai makaliklik kenu, ni Aku éng kimua niitu, wo séra ma'éman i ni Komo si nimatumé ni Aku.”

Yohanes 14:26

Taan si Roh Lenas, si Menunulung, si iatumé ni Ama'-Ku mengiité u ngaran-Ku, ni Siamo si matumuzu' ni kamu péléng am péléng wo mapagenang wia ni kamu péléng a mémoikua-Ku wia ni kamu.

Yohanes 17:18

Tanu si Ama' nimatumé ni Aku i méyé wia ung kaayahan, téntu kangkasii ni Aku nimatu ni séra i mangé wia sé tou walina sé wia ung kaayahan.

Yohanes 17:21

Ni Aku mengaléi, wo ni séra péléng maesa, tanu si Ama' nimaesa karia-Ku wo ni Aku nimaesa karia ni Ama'. Wo ni séra kasii nimaesa karia ni Kita, wo sé tou walina wia ung kaayahan kenu ma'éman i si Ama' si nimatumé ni Aku.

Yohanes 17:23

Ni Aku nimaesa karia néra wo si Ama' nimaesa karia-Ku wo ni séra uli-ulit nimaesa. Wo sé tou walina wia ung kaayahan kenu mata'u i si Ama' si nimatumé ni Aku wo si Ama' rumaraaté ni séra, tanu si Ama' rumaraaté ni Aku.

Yohanes 17:25

O Ama' si zéi'kan mahsanaweka, sé tou wia ung kaayahan én zéi'kan mata'u si Ama', taan ni Aku é mata'u si Ama' wo sé pahtuzu'eng-Ku kenu é mata'u i si Ama' si nimatumé ni Aku.

Yohanes 17:8

Pahpaan péléng a méinuwu' ni Ama' wia ni Aku é méikua-Kumola wia ni séra wo ni séra én timalingamo wo ma'émano niitu. Ni séra é mata'umo i ni Aku én uli-ulit wia si Ama' a méyé wo ni séra é ma'éman i si Ama' si nimatumé ni Aku.

Yohanes 3:17

Pahpaan si Opo Empung nimatumé si Oki'-Na wia ung kaayahan kenu zéi'kan i mémukum sé tou wia ung kaayahan, taan i milot sé tou wia ung kaayahan kenu im witu un ukuman wana a singkéla'.

Yohanes 3:34

Séi si méiatumé ni Opo Empung, ni Siamo si mahwoka' u nuwu' ni Opo Empung, pahpaan si Opo Empung é niméhémé wia ni Sia si Roh-Na karia in zéi'kan siapa akazna.

Yohanes 5:44

Kura kamu toro ma'éman wia ni Aku, sa kamu paaz uman i sigi'en né tou, taan ni kamu soo menéro u sigi' ni Opo Empung si Esa uman?

Yohanes 6:57

Si Ama', si nimangun sé tou i menou-nou, nimatumé ni Aku wo ni Aku menou-nou pahpaan si Ama'. Téntu kangkasii, séi uman si kuman un awak-Ku, si tou itii é mamenou-nou pahpaan ni Aku.

Yohanes 7:29

Ni Aku é mata'u ni Sia pahpaan ni Aku ém wia ni Sia a méyé wo ni Siamo si nimatumé ni Aku.”

Yohanes 8:19

Ang kuan néra wia ni Sia, “Wisa wé si Ama'-Mu?” Si Yesus mingkotla, “Ni kamu én zéi'kan mata'u ni Aku wo si Ama'-Ku. Sa kamu mata'u ni Aku, ni kamu kangkasii é mata'u si Ama'-Ku.”

1 Korintus 15:34

Niitumo in tarékan, pakagena-genangela lé'os wo tia' kamu memangu-mangunpé' a singkéla'. Pahpaan im wia ni kamu ém wéwéhampé' sé zéi'kan mata'u si Opo Empung. Niitu én ikuakuma wia ni kamu wo kamu maizang.

1 Korintus 8:4

In tarékan ni aku é mingkot am peligauen né katuari in téntii, “Toro wé ing kuman a lé'ona mémoiragés wia sé opo-opo?” Tanu ung kata'uantamo, “Zéi'kan siapa sé opo-opo wia ung kaayahan, wo si Opo Empung én esa uman, zéi'kan siapa walina.”

2 Korintus 4:6

Im puuna si Opo Empung éng kimua in téntii, “Im witu u rimbengbeng a mondolé un ayah!” In tarékan ni Sia kangkasii si nimangun un ayah-Na mahsena' witu un atéta wo toro kata'uantala ung kawangko'an-Na. Ung kawangko'an ni Opo Empung én toro ilekenta witu ung gio ni Yesus Kristus.

Filipi 3:10

Un totoz kapaazku é mata'u si Yesus Kristus wo kasii totoz im paaz i mata'u ung kawasa un timou sumaup ni Sia im wia sé nimaté. Ni aku kangkasii é nimimeko un touku i mazézéha, tanu ni Sia i nimazézéha, wo nimimeko un touku i maté, tanu ni Sia i nimayo un touna i nimaté.

Filipi 3:8

Zéi'kan uman niitu, pahpaan in tarékan kata'uangkumo u lumouspé'mé ung kawangunan am walina i ni aku mata'umo si Kristus Yesus, si Mahpiaraku. Pahpaan ni aku mata'umo si Kristus, niitumo péléng am puuna pahgenangengkula ém wéwéhan torona wo mahalimé ung kauntungan wia ni aku witu u sinaru ni Opo Empung é méitula'ukumola. Péléng a mahalimé ung kauntungan wia ni aku im puuna ém pahgenangengkula i rimberek wo ni aku toro makailek si Kristus.

1 Tesalonika 1:9

Pahpaan ni sérakan sé simiritala kura kamu i simungkul ni kai wo kura kamu in timula'u sé opo-opo a menéro si Opo Empung si menou-nou wo ulit, i maayang wia ni Sia.

2 Tesalonika 1:8

Ni Sia kasii in timumpamé é mémukum sé tou soo mata'u si Opo Empung wo soo mahkiit u Nuwu' Lé'os tumoro si Yesus, si Mahpiarata.

Ibrani 3:1

Katuari-katuari sé linenas wo sé tinawahmo i maayang wia si Opo Empung. Wéhan nioula genang si Yesus si niéndo Aatu ni Opo Empung wo Walian Wangko', si pa'émanenta in ulit wo zéi'kan maindé' in ipahwoka'ta wia sé tou walina.

2 Petrus 1:2

Mengalé-ngaléi uman si Opo Empung én tumambéré ang kamang wo ung kaluasan un até un zéi'kan si akazna wia ni kamu, pahpaan ni kamu é mata'umo si Opo Empung wo si Yesus Kristus Mahpiarata.

2 Petrus 1:3

Pahpaan karia ung kawasa-Na, si Opo Empung én timambér wia ni kita péléng am pemandungen, wo kita toro menou-nou mahkiit am paaz-Na. Péléng niitu é méiwéhé-Na wia ni kita pahpaan ni kita é mata'umo ni Sia si timawah ni kita karia ung kawasa-Na un totoz wangko' wo ung kalé'osan-Na.

2 Petrus 1:8

Pahpaan sa kamu zéi'kan mazéi' mahwangun niana péléng, nianamo u sumawang ni kamu i makawawa mahtata'u wo lamata'u si Yesus Kristus Mahpiarata.

1 Yohanes 1:2

Ung katou-touan itii é méipapaileko wo niitu é niilek naimo wo in tarékan, ni kai é mahwoka' wia ni kamu a niilek wo tinalinga nai tumoro ung katou-touan makaz ing kauré-uré, u memali-mali karia ni Ama' wo u méipapaileko wia ni kai.

1 Yohanes 1:3

A niilek wo an tinalinga naimo itii én iwoka' nai kasiima wia ni kamu, wo kamu toro maesa karia nai. Wo um pahesa-esaanta ém pahesa-esaan karia ni Ama' wo karia ni Oki'-Na, si Yesus Kristus.

1 Yohanes 2:23

Pahpaan séi si mahkélong si Oki', ni sia kangkasii én zéi'kan makaanu si Ama'. Séi si makaulitla i ma'éman wia si Oki', ni sia kangkasii é makaanu si Ama'.

1 Yohanes 4:6

Ni kita ém wia si Opo Empung a méyé: Séi si mata'u si Opo Empung, ni sia é mahtalinga ni kita. Séi si zéi'kan wia si Opo Empung a méyé, ni sia én zéi'kan mahtalinga ni kita. Niitu un tumuzu'mé wisa si Roh kaulitan wo wisa si roh mahlululu uman si tou.

1 Yohanes 5:20

Kata'uanta kasii i si Oki' ni Opo Empung é niméyémo wo niméhémo ung katulapan wia ni kita. Karia in téntu, ni kita mata'u Si Ulit wo maesa karia Si Ulit pahpaan nimaesa karia si Oki'-Na, si Yesus Kristus. Ni Siamo si Opo Empung, si ulit wo si mahwéhémé ung katou-touan makaz ing kauré-uré.