Yohanes 15:16 - Taaz Weru Witu u Nunuwu'en Tombulu

¹⁶ Zéi'kan ni kamu sé niméléng ni Aku, taan ni Aku si niméléng ni kamu. Ni Aku nimatu ni kamu wo ni kamu mangé wo mangun lakez am paayangen lé'os wo am wua'na am paayangen niou é memia-mia makaz ing kauré-uré. Karia in téntu, apa uman um pahaléien niou wia si Ama' mengiité u ngaran-Ku, niitu én iwéhé-Na wia ni kamu.

Yohanes 15:16 Iomraidhean Croise

Matius 21:22

Apa uman am pahaléien niou witu um pengaléien karia in uli-ulit ma'éman, niitu é makailekan niou.”

Matius 7:7

Kuano kasii ni Yesus, “Mahaléila, ni kamu ém wéhan. Menérola, ni kamu é makailek. Tuméngkorla, ni kamu ém wukaan um pepenet.

Lukas 6:13

In endomo an tawahen-Namé sé mahkii-kiit ni Sia a méléng im wia ni séra sé mapulu' wo zua tou. Sé pinéléng-Na itii ém pahkuan-Na aatu-Na.

Yohanes 13:18

An ikua-Ku kenu én zéi'kan tumoro ni kamu péléng. Kata'uang-Ku séi sé pinéléng-Ku. Taan u méipantik witu um Pinantik Lenas é léwo'zéi' mamuali, ‘Si tou kiman u roti karia-Ku é maéndo kakoro'-Ku.’

Yohanes 15:19

Sa ni kamu masuat karia né tou wia ung kaayahan kenu sé zéi'kan ma'éman ni Aku, tantumo sé tou itii é rumaraaté ni kamu pahpaan ni kamu én anu néra. Taan pahpaan ni Aku é niméléngo ni kamu im wia sé tou wia ung kaayahan kenu, niitumo ni kamu én zéi'mo anu né tou wia ung kaayahan kenu. Pahpaano niitu sé tou wia ung kaayahan kenu nimazi'zisola ni kamu.

Yohanes 15:5

Ni Aku én tanu un tuuzna un anggor wo ni kamu én tanu am pangana un anggor. Séi uman si nimaesa karia-Ku wo ni Aku nimaesa kariana, um pahwua'namé é lakez, pahpaan sa zéi'kan nimaesa karia-Ku, zéi'kan siapa un toro wangunen niou.

Yohanes 6:70

Kuan ni Yesus wia ni séra, “Zéi'kankuaa ni Aku si niméléng ni kamu sé mapulu' wo zua? Taan, si esaané im wia ni kamu é sétang.”

Kisah Rasul-rasul 1:24

Tumondongla niitu a séra péléng mengaléi wo mahkua, “O Mahpiara, totoz kata'uan-Nu péléng an até né tou. Niitumo, ituzu'mé wia ni kai séi si péléngen-Nu im wia sé zua tou kenu.

Kisah Rasul-rasul 1:8

Taan si Roh Lenasokan si tumumpamé wia ni kamu wo ni kamu makailek ung kawasa. Tumondong niitu, ni kamu sé makumua um pina'ilek wo tinalinga niou tumoro ni Aku wo matumuzu' wia sé tou witi wanua tua'na Yerusalem, witi péléng an tana' Yudea wo Samaria makaz witi pondol ung kaayahan.”

Kisah Rasul-rasul 10:41

Taan zéi'kan péléng sé tou Yahudi toro nimilek ni Sia. Akaz uman sé pinéléngo ni Opo Empung rengan ing kataré-taré sé toro nimilek wo makumua am pina'ilek néra. Ni kaimo sé tou itii sé kimano wo nimelepo karia-Na, kumawusa Sia i méitoumé sumaup ni Opo Empung im wia sé nimaté.

Kisah Rasul-rasul 22:14

A sia kumuamé, ‘Si Opo Empung né nimaopota tou Israel é niméléngo ni ko i mata'u ung kapaaz-Na wo i milek si Yesus si Ulit, wo kasii tumalinga un ikua-Namé.

Kisah Rasul-rasul 9:15

Taan si Mahpiara nimuwu'ma wia ni sia, “Mangémo! Pahpaan si tou itii ém pinéléng-Kumo i maéndo tou mahpaayang wia ni Aku i mahwoka' u ngaran-Ku wia sé tahsasana wanua walina wo wia sé kolano wo kasii wia sé tou Israel.

Roma 1:13

Katuari-katuari, ung kapaazku éng kata'uan nioua i ni aku én urémo megena-genang i mangé wia ni kamu, taan makaz in tarékan én zéi'kampé' méikaangémé pahpaan sekezé ém wéwéhan a mahraung. Kapaazku am pinaayangku im wia ni kamu ém wéwéhan torona, tanu am pinaayangku am wéwéhan torona im wia sé tou zéi'kan Yahudi witi tampa walina.

Roma 1:5

Mengiité ni Sia, ni aku nimakailek ung kamang tatambér i maéndo aatu ni Opo Empung wo ni aku toro mahkit sé tahsasana wanua wo séra ma'éman wo mahtali-talinga si Yesus Kristus.

Roma 15:4

Péléng a mémoipantik witu um Pinantik Lenas ém pinantik in tumuzu' ni kita. Pahpaan an tutuzu' kinailekanta witu um Pinantik Lenas, nimangun ni kita in ezen wo enté' un até wo kita wéwéhan um pahéré'an wia si Opo Empung.

Roma 9:21

Si memamangun ung kuré' tana' é mangun ung kuré' tana' itii kiit um paazna. U sana réwok tana' pulut masuat én toro wangunen kuré' peperong wo kuré' pahpakén i mendo-endo.

1 Korintus 10:11

Péléng a nimamuali wia sé nimaopota itii, nimaéndo tanu ang kékéréan wia ni kita. Péléng niana é méipantik i mapagenang wia ni kita in tarékan, sé menou-nou wana an endo kaakazan ung kaayahan.

Galatia 1:15

Taan si Opo Empung é niméléngo ni aku rengané im pahawa-awakempé' ni ina'ku wo tinawah-Na ni aku pahpaan ung kamang méitambér-Na,

Efesus 2:10

Pahpaan ni kita ém winangun ni Opo Empung mengiité si Kristus Yesus, i maayang am wangun a niimeko ni Opo Empung im puuna, wo kita toro menou-nou karia i memangu-mangun a lé'os.

Kolose 1:23

Niitumo, ni kamu én tia'mo kumana' i ma'éman wo tia'mo mahzua-zua genang. Ni kamu én uli-ulit ma'émanla wo tia' ipahtutula'u um pahéré'an niou witu u Nuwu' Lé'os tumoro si Yesus, un tinalinga niouo itii. U Nuwu' Lé'os itii é méikawoka'mo wia ung kaayahan, wo ni aku, Paulus, si mahpaayang a méiatu ni Opo Empung i mapata'u u Nuwu' Lé'os tumoro si Yesus itii.

Kolose 1:6

u mémoiwoka' wia ni kamu. U Nuwu' Lé'os itii é mémoiwoka'ma wia sé tou lakez wia ung kaayahan, wo u Nuwu' itii kangkasii éng kimamang ung katou-touan né tou wia ung kaayahan, tanu ung katou-touan niou ing kinamang rengan ni kamu in timalinga wo uli-ulit mata'u ung kamang méitambér ni Opo Empung.

1 Timutius 2:7

Pahpaano niitu, ni aku tinotoz ni Opo Empung i maéndo aatu-Na i mahwoka' u Nuwu' Lé'os wo mahtuzu' wia sé tou zéi'kan Yahudi tumoro um pa'émanen wia si Yesus wo ung kaulitan. Peléng a méikuaku kenu én ulit! Ni aku én zéi'kan mahtowo.

2 Timutius 1:11

U Nuwu' Lé'os itiimo u nimangun ni aku tinotoz ni Opo Empung maéndo mahwoka', maéndo aatu wo méster.

2 Timutius 2:2

An tinalingamumo wia ni aku witu u saru-sarun né tou lakez, itarawésala wia sé tou toro tarawésaan niitu, sé siga' kangkasii i mahtuzu' sé tou walina.

Titus 1:5

Titus, ni ko é méitula'ukumé witi katanaan Kreta, wo ko toro mimekla an zéi'kampé' niimek, wo tumotoz sé penatua wana am wanua tua'na, mengiit a méikuakumo wia ni ko.

Ibrani 11:4

Pahpaan i ma'éman, si Habel niméhé u raragés wia si Opo Empung u lumouspé'mé ung kawangunan u méiragés ni Kain. Karia in téntu si Opo Empung kimua ni sia én ulit pahpaan u méiragésna én ikapaaz ni Opo Empung. Niitumo, zozo' nimatémoma taan ni sia én toro maéndo kékéréanta tumoro um pa'émanenna.

Yakobus 3:18

Ung kaulitan ém wua'na u mahlé'o-lé'osan u méikeroz né tou paaz u mahlé'o-lé'osan.

1 Petrus 3:15

Taan sigi'ela si Kristus im witu un até niou pahpaan ni Sia é Mahpiara. Tumégamla i mingkot sa wéwéhan si tou meligau tumoro um pahéré'an niou wia si Kristus. Taan ni kamu i mahwingkot é maheluz umanla wo karia i mahsigi',

1 Petrus 3:2

Ni séra é ma'éman sa mengile-ngilek an totoz wangun am pahwangunen niou wo mahkiit ung kapaaz ni Opo Empung.

1 Yohanes 4:10

Ung kenumo u raraaté itii: Zéi'kan ni kita sé rimaraatémo si Opo Empung, taan si Opo Empung si rimaraatémo ni kita wo nimatu si Oki'-Na in zuméi' a singkéla' pahlé'osenta.

1 Yohanes 4:19

Ni kita é rumaraaté, pahpaan si Opo Empung si puuna rimaraatémo ni kita.