Yohanes 14:9 - Taaz Weru Witu u Nunuwu'en Tombulu

⁹ Kuan ni Yesus wia ni sia, “Filipus, urémo ni Aku i memali-mali karia niou, kura kahuman ni ko zéi'kan mata'u ni Aku? Séi uman si nimileko ni Aku, ni sia é nimileko si Ama'. Kura kahuman ni ko mahkua, ituzu'mé si Ama' itii wia ni kai?

Yohanes 14:9 Iomraidhean Croise

Markus 9:19

Ang kuan ni Yesus wia ni séra, “É kamu sé tou zéi'kan ma'éman, makaz sawisa ni Aku léwo'zéi' i mento' mahwali-wali karia niou? Makaz sawisa ni Aku léwo'zéi' i mezen wia ni kamu? Ipahwalimé wia'i si koki' itii!”

Lukas 12:56

É kamu in tou mahgau-gau lé'os! A mahmuali wia ung kaayahan wo witi langit én toro kata'uan niou ung kalakoana. Kaa zéi'kan kata'uan niou ung kalakoan a mahmuali in tarékan am pahpaayangen ni Opo Empung?”

Yohanes 1:14

U Nuwu' ni Opo Empung itii é nimaéndomo tou wo menou-nou im wia ni kita wo ni kita é nimileko ung kawangko'an-Na. Ung kawangko'an-Na itii éng kinailekan-Na pahpaan ni Sia én Oki' esa uman ni Opo Empung. Wo ni Sia én tumuzu'mé i si Opo Empung én ulit wo ni Sia mahtambéré ung kamang wia ni kita.

Yohanes 10:30

Ni Aku wo si Ama'-Ku én esa.”

Yohanes 12:45

Wo séi uman si mahilek ni Aku, si tou itii é mahilek ni Sia si nimatumé ni Aku.

Yohanes 14:20

In endo itiimo ni kamu lamata'u i ni Aku é nimaesa karia ni Ama', ni kamu é nimaesa karia-Ku wo ni Aku é nimaesa karia niou.

Yohanes 14:7

Sa ni kamu mata'u ni Aku, tantumo ni kamu kasii é mata'u si Ama'-Ku. Rengan in tarékan ni kamu é mata'u ni Sia wo ni kamu é nimileko ni Sia.”

Yohanes 8:19

Ang kuan néra wia ni Sia, “Wisa wé si Ama'-Mu?” Si Yesus mingkotla, “Ni kamu én zéi'kan mata'u ni Aku wo si Ama'-Ku. Sa kamu mata'u ni Aku, ni kamu kangkasii é mata'u si Ama'-Ku.”

1 Korintus 15:12

Méipahwoka' nai wia sé tou i si Kristus é nimatémo an itoumé sumaup ni Opo Empung im wia sé nimaté. Kura kahuman im wia ni kamu ém wéwéhan sé mahkua sa sé nimatémo én zéi'kan itou sumaup?

Filipi 2:6

Ung katou-touan ni Yesus é masuat karia ung katou-touan ni Opo Empung, taan zozo' in téntu, zéi'kan pahgenangen-Nala ung katou-touan-Na un tanu niitu in anu-Na in esa u léwo'zéi' in tio-tionan-Na,

Kolose 1:15

Si Yesus Kristus én tumuzu'mé si Opo Empung si zéi'kan kailekan, ni Sia si kataré-taré wo ipahpuu-puuna im wia péléng sé winangun ni Opo Empung.

Ibrani 1:3

Ni Siamo si mahsena'mé u sena' ni Opo Empung wo mengiité ni Sia kita toro milek si Opo Empung. Karia u Nuwu'-Na un totoz mahkawasa, si Yesus mahtéiz péléng am wia ung kaayahan. Kumawusa Sia i miloté sé tou im witu un ukuman wana a singkéla', ni Sia rimumez witu ung kakan ni Opo Empung si totoz wangko' witi tampa totoz rakék.

1 Yohanes 5:20

Kata'uanta kasii i si Oki' ni Opo Empung é niméyémo wo niméhémo ung katulapan wia ni kita. Karia in téntu, ni kita mata'u Si Ulit wo maesa karia Si Ulit pahpaan nimaesa karia si Oki'-Na, si Yesus Kristus. Ni Siamo si Opo Empung, si ulit wo si mahwéhémé ung katou-touan makaz ing kauré-uré.