Yohanes 14:20 - Taaz Weru Witu u Nunuwu'en Tombulu

²⁰ In endo itiimo ni kamu lamata'u i ni Aku é nimaesa karia ni Ama', ni kamu é nimaesa karia-Ku wo ni Aku é nimaesa karia niou.

Yohanes 14:20 Iomraidhean Croise

Yohanes 10:38

Taan sa ni Aku nimangun niitu wo ni kamu soo ma'éman wia ni Aku, pa'émanenola am pinaayang-Ku itii, wo ni kamu toro mata'u wo makatulap i si Ama' é nimaesa karia-Ku wo ni Aku é nimaesa karia si Ama'.”

Yohanes 14:10

Zéi'kan pa'émanennu wé i ni Aku é nimaesa karia ni Ama' wo si Ama' é nimaesa karia-Ku? A méikua-Kuma wia ni ko én zéi'kan witu ung genang-Ku a mangé, taan wia si Ama' si nimaesa karia-Ku a mangé, ni Siamo si mahwangun péléng am pahpaayangen-Na.

Yohanes 14:11

Pa'émanela i ni Aku é nimaesa karia ni Ama' wo si Ama' é nimaesa karia-Ku. Sa ni kamu zéi'kan ma'éman ni Aku pahpaan am pahkua-Ku, pa'émanené ni Aku pahpaan am pinaayang-Ku kenu.

Yohanes 16:23

In endo itii zéi'kan siapa u ligauen niou wia ni Aku. Uli-ulit ikua-Kuma wia ni kamu, péléng am pahaléien niou wia si Ama' én iwéhé-Na wia ni kamu mengiité u ngaran-Ku.

Yohanes 16:26

In endo itii ni kamu é mengaléi wia si Ama' witu u ngaran-Ku. Wo ni Aku én zéi'kan kumuama i ni kamu én ipengaléi-Kupé' wia si Ama',

Yohanes 17:11

In tarékan ni Aku én zéi'mo mauréma mawurimo sumaup wia si Ama'. Ni Aku én tumula'u ung kaayahan, taan ni séra é memia-miapé' wia ung kaayahan. O Ama' Lenas, téizané séra karia u ngaran ni Ama', niitumo u ngaran méiwéhé ni Ama' wia ni Aku, wo séra maesa tanu ni Aku wo si Ama' nimaesa.

Yohanes 17:26

Séi si Ama' é mémoikua-Ku wia ni séra, wo niitu én zéi'kan ikana'-Ku im wanguneng-Ku, wo séra mahraa-raatéan tanu si Ama' rumaraaté ni Aku wo ni Aku maesa karia néra.”

Yohanes 17:7

In tarékan éng kinata'uan néramoma im péléng a méiwéhémé ni Ama' wia ni Aku ém wia si Ama' a méyé.

Yohanes 6:56

Séi uman si kuman un awak-Ku wo melep un zaha'-Ku, si tou itii é nimaesamo karia-Ku wo ni Aku é nimaesamo kariana.

Roma 16:7

U sigi'ku wia si Andronikus wo si Yunias sé kawanuaku, sé im puuna ém binui kariaku. Ni séra ém pahsigi-sigi'en im wia sé aatu ni Kristus. Ni séra sé puuna ma'éman si Kristus taan ni aku.

Roma 8:1

Niitumo, in tarékan én zéi'mo siapa un ukuman wia sé menou-nou nimaesamo karia ni Kristus Yesus.

1 Korintus 1:30

Si Opo Empung si nimangun ni kamu nimaesa karia ni Kristus Yesus wo si Kristus Yesus nimangun ni kita makailek ung katulapan ni Opo Empung. Ni kita nimaéndo ulit im witu u sinaru ni Opo Empung, nimaéndo tou linenas ni Opo Empung wo timubus ni kita.

2 Korintus 12:2

Kata'uangku wéwéhan si tou ma'éman wia si Kristus, mapulu' wo epatna ta'un limangkoila, si tou itii kumompo'mé ém winénétoma witi kasendukan katelu. In toro niitu, zéi'kan kata'uangku sia im winénéta ém winénéta karia un touna kaapa akaz uman si rohna si winénéta. Si Opo Empung uman si mata'u niitu.

2 Korintus 13:5

Amoké wa'wa'en nioula un tou niou, wo kata'uan nioula sa ni kamu én uli-ulit ma'éman wia si Kristus kaapa zéi'kan. Pahtata'ula un até niou, ni kamu én uli-ulit mata'u i si Kristus Yesus ém witu un até niou kaapa zéi'kan! Pahpaan sa kamu zéi'kan uli-ulit mahkiit si Kristus, um pa'émanen niou én zéi'kan malekep im pema'wa'en.

2 Korintus 5:17

Niitumo, séi uman si mahkiit si Kristus, ni sia ém winerumo. Ung katou-touanna én zéi'mo tanu im puuna in zéi'kampé' mahkiit si Kristus. Taan ung katou-touanna ém werumo, un uré é nimazéi'moma wo um weru ém wiamo.

2 Korintus 5:19

Ang kenu an ipahwoka' nai: Winangun ni Opo Empung sé tou wia ung kaayahan i mawurian sumaup karia-Na, mengiité si Kristus. Niana im winangun ni Opo Empung, zéi'mo kagenangan-Nala ang kasumalaan pinahwanguné né tou. Ni Sia kasii é niméhé wia ni kai um paayangen mahwoka' u Nuwu' Lé'os i sé tou én toro mawurian sumaup karia-Na.

Galatia 2:20

In tarékan, zéi'mo ni aku si menou-nou taan si Kristus si menou-nou wo mahkawasa witu ung katou-touangku. Witu ung katou-touangku wia ung kaayahan in tarékan kangkasii, ni aku é menou-nou witu um pa'émanengku wia si Oki' ni Opo Empung, si totoz rimaraatémo ni aku wo niméhémo un tou-Na in esa wia ni aku.

Efesus 2:10

Pahpaan ni kita ém winangun ni Opo Empung mengiité si Kristus Yesus, i maayang am wangun a niimeko ni Opo Empung im puuna, wo kita toro menou-nou karia i memangu-mangun a lé'os.

Kolose 1:19

Witu um paaz ni Opo Empung péléng a nimalekepo im wia ni Sia ém wiamo si Kristus.

Kolose 1:27

Im wia sé tou-Na, si Opo Empung ém paaz i mapata'u, in totoz wa'ilan wo wangko' a méikawunipé' itii im wia sé tou walina sé zéi'kan Yahudi. U méikawunipé' itii én téntii: Si Kristus ém witumo un até niou, ni Siamo si pahéré'an i makailek u sigi' wo looz ni Opo Empung.

Kolose 2:9

Pahpaan péléng am wia si Opo Empung ém wiamo si Kristus, i ni Sia nimaéndo tou uman.

1 Yohanes 4:12

Zéi'kampé' siapa zozo' in esa si tou nimileko si Opo Empung. Sa kita mahraa-raatéan, Si Opo Empung é nimaesa kariata wo u raraatéan-Na é lekep im wia ni kita.