Yohanes 1:16 - Taaz Weru Witu u Nunuwu'en Tombulu

¹⁶ Pahpaan u raraatéan-Na én zéi'kan ikana', wo im witu u raraatéan-Na ni kita mahkaileké ung kamang un zéi'kan ipahkana-kana'la im pahtambéré.

Yohanes 1:16 Iomraidhean Croise

Matius 13:12

Pahpaan séi si makatulapo, ni sia én awesampé' makaz i malake-lakez, taan séi si zéi'kan makatulap, péléng am wia ni sia ém pakaéndon.

Matius 3:11

Ni aku é mahsarani ni kamu karia un zano, un tumuzu'mé ni kamu én timula'umola a singkéla' niou. Taan ni Sia si tumondongé ni aku, ni Siapé' si mahkawasa taan ni aku. Maan i muka uman u sapatu-Na, ni aku én zéi'kan wangun. Ni Sia masumarani ni kamu karia si Roh Lenas wo un api.

Matius 3:14

Taan si Yohanes é soo i sumarani si Yesus, kuana, “Un ulitna, ni aku si léwo'zéi' i sarani-Nu, taan ni Ko é niméyé uman taré wia ni aku.”

Lukas 21:15

Pahpaan ni Aku in esa si mapata'u wia ni kamu a nunuwu'en mawuta-wuta karia ang katulapan in iwingkot niou, wo sé kakoro' niou zéi'kan makawingkot um pahkua niou kaapa sumaru ni kamu.

Yohanes 3:34

Séi si méiatumé ni Opo Empung, ni Siamo si mahwoka' u nuwu' ni Opo Empung, pahpaan si Opo Empung é niméhémé wia ni Sia si Roh-Na karia in zéi'kan siapa akazna.

Roma 5:17

Pahpaan si tou esa simingkéla'mo, um patéan éng kimawasamo wia péléng sé tou pahpaan si tou itii. U lumousé um winangun ni tou esa walina, si Yesus Kristus, ni Sia nimangun sé tou nimakailek u raraatéan ni Opo Empung u malake-lakez wo un tatambér-Na makaz ni séra niéndo-Na ulit. Ni séra é mamenou-nou wo mahkawasa makaz ing kauré-uré pahpaan si Yesus Kristus.

Roma 5:2

Ni kita sé ma'éman ém winéhan u lalan i mé'an ung kamang itambéré ni Opo Empung pahpaan si Yesus Kristus. Ung kamang kenu u nimangun ni kita menou-nou wo mahpaa-paaz pahpaan mahéré'la i makailek u sigi' wo looz ni Opo Empung.

Roma 5:20

Si Opo Empung niméhémé un ukum Torat wo kata'uala né tou ing kalakeznamo a singkéla' né tou. Taan zozo' ing kalakezna a singkéla', ung kamang méitambér-Na kangkasii éng kalakezna.

Roma 8:9

Taan ung katou-touan niou én zéi'kan mahkiit ung kapaaz un awak niou in esa taan mahkiit ung kapaaz ni Roh ni Opo Empung, pahpaan si Roh ni Opo Empung é nimaesamo karia niou. Si tou zéi'kan siapa Roh ni Kristus witu un aténa, ni sia én zéi'kan anu ni Kristus.

Efesus 1:23

Sé jamaat én awak ni Kristus. Si Kristus nimangun sé jamaat-Na nimalekep im wana péléng am péléng.

Efesus 3:19

Wo ni kamu kasii toro mendan u raraatéan itii u limangkoi péléng ang kata'uan né tou. Ni aku mengaléi, wo ni kamu malekep wana péléng am péléng tanu si Opo Empung.

Kolose 1:19

Witu um paaz ni Opo Empung péléng a nimalekepo im wia ni Sia ém wiamo si Kristus.

Kolose 2:3

Mengiité si Kristus ni kita én toro mata'umé péléng ang katulapan wo ang kata'uan ni Opo Empung un im puuna é méikawunipé'.

1 Petrus 1:11

A méipapata'u itiimo am pinahtata'uma né nabi, sawisa wo kura niitu i mamuali. Si Roh ni Kristus si wia sé nabi itii é nimapata'u i si Kristus é masungkul an zézéha. Mengiité an zézéha itii, si Kristus é makailek u sigi' wo looz.

1 Petrus 1:2

Si Opo Empung, Ama'ta é niméléngo ni kamu mengiité ung ginenang-Na rengané im puuna. Si Roh Lenas si limenas ni kamu wo kamu mahwangun ang kapaaz ni Yesus Kristus, wo kamu weresin im wana a siningkéla' niou karia im pinikpikan un zaha'-Na. Mengalé-ngaléi uman ung kamang tatambér ni Opo Empung wo ung kaluasan witu un até é menaté-natér ni kamu.