Yakobus 1:21 - Taaz Weru Witu u Nunuwu'en Tombulu

²¹ Niitumo, itia'la péléng a makazi'zisen wo a léwo' totoz lakez am pemangu-mangunen niou. Wo sungkulela u nuwu' ni Opo Empung u mémoiwéhé witu un até niou karia u roros até. Pahpaan u nuwu' itii ém wéwéhan kawasa i milot ni kamu im witu un ukuman wana a singkéla'.

Yakobus 1:21 Iomraidhean Croise

Matius 5:5

Mahpaa-paazola sé tou roros até, pahpaan ni séra sé lamakaanu ung kaayahan.

Yohanes 6:63

Si Roh ni Opo Empung si mahwéhémé ung katou-touan, ung kaenté'an ni tou én zéi'kan siapa torona. A nuwu' méikua-Kuma wia ni kamu é nuwu' ni Roh ni Opo Empung u mahwéhémé ung katou-touan.

Yohanes 6:68

Wingkotela ni Simon Petrus wia ni Sia, “Tuang, séipé' si angéan nai? U nuwu'-Mu é mahwéhémé ung katou-touan makaz ing kauré-uré;

Kisah Rasul-rasul 10:33

Niitumo ni aku rengan nimatuma tou i matumawah ni ko. Wo ni ko é niméyémo karia i mahpaa-paaz. In tarékan, ni kai péléng é nimaréwoko wia'i witu u sinaru ni Opo Empung in tumalinga u méiperénta ni Opo Empung wia ni ko in ikua wia ni kai péléng.”

Kisah Rasul-rasul 13:26

Katuari-katuariku suzu ni Abraham wo ni kamu kasii sé maindé' si Opo Empung. U Nuwu' i ni kita én ipilot im witu un ukuman wana a singkéla' é mémoikua ni Opo Empung wia ni kita.

Roma 1:16

Ni aku én zéi'kan maizang i mahwoka' u Nuwu' Lé'os tumoro si Yesus, pahpaan u Nuwu' Lé'os itii éng kawasa ni Opo Empung i milot péléng sé tou sé ma'éman im witu un ukuman wana a singkéla', kataré-taré é sé tou Yahudi wo kasii sé tou zéi'kan Yahudi.

Roma 11:17

Sé woopira im wia sé tou Yahudi én tanu am panga kai zaitun ni Opo Empung ang kinetoro. An iéndomé pangana ang kai zaitun wana an talun an ilaput witu ung kai zaitun ni Opo Empung. Ni kamu in tou zéi'kan Yahudi én tanu am panga kai zaitun wana an talun. In tarékan, ni kamu é nimakaileko ung katou-touan wo ung ketez witu un ahmut ung kai méitanem ni Opo Empung.

Roma 6:17

Ni aku é mapaayo u makasé wia si Opo Empung! Pahpaan im puuna ni kamu én ata a singkéla', taan in tarékan ni kamu én uli-ulit mahkiit an tutuzu' méiwéhémo wia ni kamu.

1 Korintus 15:2

Sa u Nuwu' Lé'os méipahwoka'ku itii én uli-ulit pa'émanen niou, ni kamu é méipiloté im witu un ukuman wana a singkéla'. Taan sa u Nuwu' Lé'os itii zéi'kan uli-ulit pa'émanen niou, um pa'émanen niou én zéi'kan siapa torona.

2 Korintus 7:1

Katuari-katuari ikararaatéku. Ni kita é nimakaileko a méitaaz ni Opo Empung. Niitumo, kumana'mola i memua-muali a singkéla', u mahwangun un tou wo si rohta makati'tiren. Ni kita é mahsigi'la wo maindé'la wia si Opo Empung wo péléng ung katou-touanta u linenas-Na é malekep.

Efesus 1:13

Téntu kangkasii ni kamu é nimaéndomo tou ni Opo Empung i ni kamu timalingamola u nuwu' kaulitan um wia si Opo Empung a méyé, niitumo u Nuwu' Lé'os u nimilot ni kamu im witu un ukuman wana a singkéla'. I ni kamu nima'émanola u Nuwu' Lé'os itii, si Opo Empung é niméhémé si Roh Lenas wia ni kamu un tumuzu'mé i ni kamu én tou-Na, mengiit u mémoitaaz-Na.

Efesus 4:22

Niitumo, tumoro ung katou-touan niou im puuna, ni kamu é léwo'zéi' in tumula'u ung katou-touan im puuna itii. Ung katou-touan itii é nimangun uman ni kamu méikaléwo' pahpaan méilulu u lelo léwo' un awak,

Efesus 4:25

Niitumo, tia'mo mahtowo taan mahkua umanla an ulit wia si esa wo si esa pahpaan ni kita péléng é masuat in esaané im witu un awak ni Kristus.

Efesus 5:4

Téntu kangkasii ang kukuan saparuni, an zéi'kan siapa torona kaapa an uuwaken zéi'kan mata'u un adat, pahpaan an téntu én zéi'kan wangun. Taan tawimo ni kamu kumuala u makasé wia si Opo Empung.

1 Tesalonika 1:5

Pahpaan u Nuwu' Lé'os tumoro si Yesus un ipahtuzu' nai wia ni kamu én zéi'kan uman karia u nunuwu'en, taan karia ung kawasa ni Roh Lenas wo karia ung kaulitan u Nuwu' Lé'os un totoz kata'uan nai. Kata'uan niouo kura ni kai mahpaayang i mahsawang ni kamu, i ni kai memali-mali karia niou.

1 Tesalonika 2:13

Wéwéhan kasii u nimangun ni kai zéi'kan kumana' i mahkua u makasé wia si Opo Empung, pahpaan i ni kai mahwoka'mé u Nuwu' ni Opo Empung wia ni kamu, ni kamu é simungkul u Nuwu' itii zéi'kan tanu u nuwu' um wia si tou a méyé, taan u Nuwu' um wia si Opo Empung a méyé. U Nuwu' itii én uli-ulit wia si Opo Empung a méyé, ung karegas i mahpaayang wia ni kamu in tou ma'éman.

Titus 2:11

Pahpaan si Opo Empung é nimapailekoma ung kamang méitambér-Na i nimilot péléng sé tou im witu un ukuman wana a singkéla'.

Ibrani 12:1

Katuari-katuari, péléng sé tou ma'éman sé menou-nou im puuna itii é limiklik ni kita tanu u ninahak. Karia ung katou-touan néra i ma'éman wia si Opo Empung u méipapailek néra wia ni kita, toro maéndo kékéréan wia ni kita i menté' um pa'émanenta. Niitumo, itula'umola péléng am mahwutez wo a singkéla' u mengapé-ngapé' ni kita, tanu i mahtututu' im wana am pahlolowaan u léwo'zéi' ing kiitenta.

Ibrani 2:3

kura kita in ikapilot sa kita zéi'kan mahwéhé genang witu un ipilot im witu un ukuman wana a singkéla' un totoz wangko' itii? Niitu ing kataré-taré é mémoipahwoka'ma ni Yesus Mahpiara, tumondong niitu, sé tou timalinga niitu in esa im wia si Yesus éng kimua wia ni kita i niitu én ulit.

Ibrani 4:2

Tanu ni kita ém pinapata'uan u nuwu' makapaazen, téntu kangkasii sé nimaopota ém pinapata'uano u nuwu' makapaazen, taan u nuwu' tinalinga néramo itii én zéi'kan siapa torona im wia ni séra, pahpaan ni séra én zéi'kan ma'éman u nuwu' itii.

Yakobus 4:8

Rumétéla wia si Opo Empung, ni Sia kangkasii é rumété wia ni kamu. Weresila u lengen niou, é kamu in tou mahsingkéla', wo weresila un até niou, é kamu sé mahzua-zua genang!

Yakobus 5:20

kata'uan nioula, séi si nimangunla si tou mahsingkéla' timula'umé u lalan simala' a mawurila sumaup witu u lalan kaulitan, si tou itii é nimilotola si roh ni tou itii im witu um patéan wo nimangun lakez a singkéla'na niampungan.

1 Petrus 1:22

Pahpaan ung katou-touan niou é linenas nioula wia si Opo Empung karia i mahtali-talinga an tutuzu' ulit, taka-takazan ni kamu én uli-ulit rimaraatémola sé katuari niou. Niitumo pahaléiengku wia ni kamu in totoz uli-ulit i mahraa-raatéan.

1 Petrus 1:9

Ni kamu é mahpaa-paazola pahpaan ni kamu é mémoipiloté im witu un ukuman wana a singkéla'. Niitumo um wua'na um pa'émanen niou wia si Yesus.

1 Petrus 2:1

Pahpaano niitu, ni kamu éng kumana'mola i memua-muali a léwo'an. Tia'mo mahtowo, tia'mo mahwangu-wangun i lumé'ospé'mé sé tou walina, tia'mo mahtéutéu wo kasii tia'mo mahtawuruk sé tou.

1 Petrus 2:11

Katuari-katuari ikararaatéku, ni kamu én tou sé siméngkot wana am wanua né tou walina wo sé limepuh umané wia ung kaayahan. Niitumo, isésakuma wia ni kamu i zumou'la im wana a lelo léwo' un awak, u makahkoro' wo a lelo un até niou wana am wangun.