Wahyu 9:4 - Taaz Weru Witu u Nunuwu'en Tombulu

⁴ Sé koropit itii ém pinerénta in tia' mahléwo' an zukut, an tinanem kaapa ang kai wia ung kaayahan. Sé toro uman i séhézen néra é sé tou zéi'kan winéhan un tanda ni Opo Empung witu un tungtung néra.

Wahyu 9:4 Iomraidhean Croise

Matius 24:24

Pahpaan sé zéi'kan uli-ulit Mesias wo sé zéi'kan uli-ulit nabi é méyé wo ni séra é mangun a makakompo'en zéi'mo kakuaan, wo sa toro, ni séra kasii é lumulu sé tou pinéléngo ni Opo Empung.

Efesus 4:30

Tia'mo mahwangun un até ni Roh ni Opo Empung i rumara pahpaan si Roh ni Opo Empung si tumuzu'mé i ni kamu én anu ni Opo Empung makaz witu un endo kaakazan ung kaayahan i si Opo Empung méhé ung katou-touan makaz ing kauré-uré.

Wahyu 14:1

An ilekengkuma si Anak ni Domba rimendai witi kentur Sion wo sé memali-mali karia-Na é sé sana atus epatna pulu' wo epatna riwu tou-Na. Im wana an tungtung né tou itii ém pinantikan u ngaran-Na wo u ngaran ni Ama'-Na.

Wahyu 6:6

An talingangkumé im witu un unez né epat tumou-tou éng kana' i mahkuamé, “Sa ung gandum sana liter um wawaérna én esa dinar. Un teluna liter jelai , um wawaérna kasii én esa dinar. Wo tia' mahléwo' ang kai zaitun am wua'na pahwangunen lana, téntu kangkasii an tinanem pahwangunen anggor pahelepen.”

Wahyu 7:1

Kumawusa niitu, ilekengkuma sé malaekat epat rimendai witu un epat zuhuna ung kaayahan. Ni séra é nimapé' witu u reges sendangan, u reges timuh, u reges talikuzan wo u reges amian, wo a reges itii zéi'kan mahtoromé ung katanaan kaapa un tasik kaapa ang kai.

Wahyu 8:7

A si malaekat kataré sumengoma um pontuangna, an tumumpamé un uzan éis wo un api sinembor un zaha'. Péléng niitu é méilombo'mé wia ung kaayahan. A mala'unga u sana pahtelu ung kaayahan, u sana pahtelu ang kai wo kasii péléng an zukut mata'pé'.