Wahyu 9:18 - Taaz Weru Witu u Nunuwu'en Tombulu

¹⁸ Karia un telu meléwo' kenu: an api, an teremuz wo am walélang pasu' a mahondolé wana a sumah né kawalo itii, sé sana pahtelu tou wia ung kaayahan ém winunu'.

Wahyu 9:18 Iomraidhean Croise

Wahyu 8:10

Si malaekat katelu sumengoma um pontuangna, a si tototi'en tua'na maragosé im witi langit. Si tototi'en itii é melaya-layas tanu u layasna un obor, nimaragosé witu u sana pahtelu a so'so'an wo wana ang kembu'an.

Wahyu 8:11

U ngaran ni tototi'en itii é Apsintus. U sana pahtelu un zano kinaragosané ni tototi'en itii é nimapa'it. Lakez sé tou nimaté pahpaan i nimelep un zano nimapa'ito itii.

Wahyu 8:12

Si malaekat kaepat sumengoma um pontuangna, an toroana u sana pahtelu ni endo, u sana pahtelu ni loloho'en, wo u sana pahtelu né tototi'en taka-takazan u sana pahtelu un endo én zéi'mo tahlous ayah, téntu kangkasii u sana pahtelu um wengi én totoz nimarimbengbenga.

Wahyu 8:7

A si malaekat kataré sumengoma um pontuangna, an tumumpamé un uzan éis wo un api sinembor un zaha'. Péléng niitu é méilombo'mé wia ung kaayahan. A mala'unga u sana pahtelu ung kaayahan, u sana pahtelu ang kai wo kasii péléng an zukut mata'pé'.

Wahyu 8:8

Si malaekat kazua sumengoma um pontuangna, am wéwéhan un tanu ang kentur tua'na melaya-layas méilombo'ma witi tasik. U sana pahtelu un tasik é nimaéndomoma zaha',

Wahyu 8:9

wo sé sana pahtelu im wia péléng sé menou-nou witu un tasik é nimaté. Téntu kangkasii u sana pahtelu im wana péléng a londéi tua'na wana an tasik é nimakemu.

Wahyu 9:15

A maipilotnamé sé epat malaekat méiapus itii witu un jam, un endo, u loloho'en wo un ta'un un tinotozo, i mamunu' sé sana pahtelu im wia sé tou wia ung kaayahan.

Wahyu 9:17

Witu um pina'ilekku, ni aku é nimilek sé kawalo wo sé suraro simaké wia sé kawalo itii, ni séra éng kimarai ang karai uaséi rangdang tanu an api, dongker tanu um watu safir, wo ririh tanu am walélang. Wo an ulu né kawalo itii én tanu an ulu né singa, wo im wana a sumah né kawalo itii é mahondolé api, teremuz wo walélang.

Wahyu 9:19

Pahpaan wana a sumah wo wana an ipus né kawalo itii ém wéwéhan ung kawasa. An ipus né kawalo itii én tanu sé ulé', an ulu né ulé' wana an ipus itii ém wéwéhan ung kawasa in zuméha sé tou.