Wahyu 8:7 - Taaz Weru Witu u Nunuwu'en Tombulu

⁷ A si malaekat kataré sumengoma um pontuangna, an tumumpamé un uzan éis wo un api sinembor un zaha'. Péléng niitu é méilombo'mé wia ung kaayahan. A mala'unga u sana pahtelu ung kaayahan, u sana pahtelu ang kai wo kasii péléng an zukut mata'pé'.

Wahyu 8:7 Iomraidhean Croise

Yakobus 1:11

Pahpaan i si endo sumena'mé karia u seritna un totoz pasu' nimangun an zukut itii maweles, makaz am wungana é nimagogo wo ung kawangunana é nimazéi'ma. Téntu kangkasii si tou wa'ilan, ni sia é maté karegas ni sia i mahlalakez an zoitna.

1 Petrus 1:24

Witu um Pinantik Lenas é méipantik in téntii, “Péléng sé tou én tanu uman un zukut, wo péléng ung kawangunana én tanu uman um wungana un zukut. Un zukut é mapera wo um wungana é maragos,

Wahyu 12:4

Wo un ipusna é mahkéhongé sana pahtelu né tototi'en witi langit, an ilombo'nama sé tototi'en itii witi kaayahan. Si naga tua'na itii é rimendai witu u sinaru ni wéwéné si mahento-ento'mokan in tumoumé si oki'na, i sumo'kep wo luma'meza si itoumé ni wéwéné itii.

Wahyu 16:2

Mangé si malaekat kataré, a mamuwu'mé wia ung kaayahan a méitahu' witu un eelepan um wia ni sia. Am péléng sé tou winéhan un tanda ni binatang itii wo sé mahongkot i mahsigi' si patong ni binatang itii touané ang kupes makaindé'en wo totoz rumara.

Wahyu 16:21

Un uzan éis é mahtumpamé im witi langit mahtoromé sé tou. Ung kawutez un éis esa ém woo limana pulu' kilo. A sé tou mahséro' wia si Opo Empung pahpaan un uzan éis an totoz meléwo' itii.

Wahyu 6:8

An ilekengkuma si kawalo kilo. Si kawalo itii é sinakéan ni tou makangaran Patéan, wo um pahwéha-wéhan né nimatémo é mahkiité witu murina. Wia ni séra ém winéhan ung kawasa i munu' sé sana pahepat né tou wia ung kaayahan karia um pisou, karia ung kaahreman, a saki melaput wo seza'en né meneza' tou.

Wahyu 7:1

Kumawusa niitu, ilekengkuma sé malaekat epat rimendai witu un epat zuhuna ung kaayahan. Ni séra é nimapé' witu u reges sendangan, u reges timuh, u reges talikuzan wo u reges amian, wo a reges itii zéi'kan mahtoromé ung katanaan kaapa un tasik kaapa ang kai.

Wahyu 9:15

A maipilotnamé sé epat malaekat méiapus itii witu un jam, un endo, u loloho'en wo un ta'un un tinotozo, i mamunu' sé sana pahtelu im wia sé tou wia ung kaayahan.

Wahyu 9:18

Karia un telu meléwo' kenu: an api, an teremuz wo am walélang pasu' a mahondolé wana a sumah né kawalo itii, sé sana pahtelu tou wia ung kaayahan ém winunu'.

Wahyu 9:4

Sé koropit itii ém pinerénta in tia' mahléwo' an zukut, an tinanem kaapa ang kai wia ung kaayahan. Sé toro uman i séhézen néra é sé tou zéi'kan winéhan un tanda ni Opo Empung witu un tungtung néra.