Wahyu 8:3 - Taaz Weru Witu u Nunuwu'en Tombulu

³ Méyé si malaekat walina, a sia rumendaila witu rété um pahtunuan a raragés, mahali-ali um pahtunuan ung kamania u mas am wangunen. Wia ni sia ém winéhan ang kamania lakez in iragés karia péléng am pengaléien né tou ni Opo Empung, witu um wawo um pahtunuan a raragés u mas am wangunen, witu sinaru u rurumezan ni Kolano itii.

Wahyu 8:3 Iomraidhean Croise

Lukas 1:10

In orasnamo in tumunu ung kamania a sia muntepa witi Tampa Lenas. Karegas sia i mahtunu ung kamania, péléng sé tou witi lésaz um walé ni Opo Empung é mahmengaléi.

Roma 8:34

Si Kristus Yesus si nimaté wo méitou sumaup im wia sé nimaté an irumez witu ung kakan ni Opo Empung, si Kristus itiimo si masumawang ni kita i mamengaléi wia si Opo Empung.

Ibrani 7:25

Niitumo ni Sia én uli-ulit makawawa i milot péléng sé tou im witu un ukuman wana a singkéla', sé méyé wia si Opo Empung mengiité ni Sia. Pahpaan ni Sia menou-nou makaz ing kauré-uré wo ni Sia zéi'kan mazéi' i mahmengaléi ni séra wia si Opo Empung.

Ibrani 9:4

Im witu ém wéwéhan um pahtunuan ang kamania u mas am wangunen wo un Tatahu'an liné'osan um pinataazan ni Opo Empung, un tatahu'an itii é sinaput karia u mas. Witu un tatahu'an itii é liné'osan um wotel mas am wangunen tinahu'an u manna, un teken ni Harun im puuna u simuzumo wo um watu zua malempaz pinantikan u mapulu' perénta ni Opo Empung.

Wahyu 10:1

An ilekengkuma si malaekat ketezen walina timumpamé im witi kasendukan, sinaput u ninahak, wo witu um wawo un uluna ém wéwéhan un zuni', ung giona é mahsena' tanu si endo, wo un a'éna én tanumokan un tombol melaya-layas.

Wahyu 14:18

Wo wéwéhan kasii si malaekat walina nimondolé witu um pahtunuan a raragés wia si Opo Empung. Ni sia é mahkawasa mahimek un api witu. A sia numuwu'mé karia i rimez wia si malaekat timion um pahagi' tewel itii, kuana, “Itayumoma um pahagi'mu tewel itii wo upu'enoma am wua'na an anggor wia ung kaayahan, pahpaan am wua'na an anggor itii én orasnamo in upu'en.”

Wahyu 5:8

I ni Sia niméndomé ung kitap ginulung itii, sé epat tumou-tou karia né zuana pulu' wo epat pahtutu'an é rengan ing kimuruzla karia i nimongkot witu u sinaru ni Anak ni Domba itii. Ni séra péléng én timion tata'saan ung kecapi wo un eelepan u mas am wangunen a mawuta-wuta ang kamania. Ang kamania itii ém pengaléien né tou ni Opo Empung.

Wahyu 6:9

I si Anak ni Domba itii mukama u segel kalima, ilekengkuma um witu um wawa' um pahtunuan a raragés wia si Opo Empung ém wéwéhan sé roh né tou winunu'mo, pahpaan u Nuwu' ni Opo Empung wo pahpaan ang kata'uan néra tumoro a niilek wo tinalinga néra.

Wahyu 7:2

An ilekengkuma si esa malaekat walina nimondolé witi pahondolané ni endo. Si malaekat itii é mahali-ali un ipahtanda anu ni Opo Empung si menou-nou. A si malaekat itii kuméréta wia sé malaekat epat sé winéhano ung kawasa i luméwo' un tana' wo un tasik,

Wahyu 8:4

An teremuz ang kamania wo am pengaléien né tou ni Opo Empung itii ém witu u lengen ni malaekat a lumintooza mangé witu u sinaru ni Opo Empung.

Wahyu 8:5

Tumondong niitu si malaekat itii méndomé um pahtunuan ang kamania, tutungannala karia un api niéndonamé witu um pahtunuan a raragés, a niitu ilombo'namé wia ung kaayahan. A zumanimé un erut nimahwalimé karia un tila'pong wo un éhzo'.

Wahyu 9:13

A si malaekat kaenem sumengoma um pontuangna. Talingangkumé u nuwu' nimondolé wana a sungé, am witu un epat zuhuna um pahtunuan a raragés u mas am wangunen, um witu u sinaru ni Opo Empung.