Wahyu 7:17 - Taaz Weru Witu u Nunuwu'en Tombulu

¹⁷ Pahpaan si Anak ni Domba si rimumez witu un unez u rurumezan ni Kolano itii é mamiara ni séra wo mahwali ni séra i mamelep witi kembu'an u mahwéhémé ung katou-touan. Wo si Opo Empung é misu' péléng a lué' néra.”

Wahyu 7:17 Iomraidhean Croise

Matius 2:6

‘Wo ni kamu in tou Betlehem witi tana' Yehuda, um wanua tua'na niou én zéi'kan ung kumori-kori' im wana am wanua tua'na witi Yehuda, pahpaan im wia ni kamu é méyé si maéndo tonaas, si matuméiz sé tou-Ku Israel.’ ”

Matius 5:4

Mahpaa-paazola sé tou mahpengasi', pahpaan un até néra é maenté'en.

Yohanes 10:11

Ni Akumo si memimiara sé domba si lé'os uman. Si memimiara domba lé'os é mayo ung katou-touanna pahpaan sé dombana.

Yohanes 10:14

Ni Akumo si memimiara sé domba si lé'os uman wo kata'uang-Ku sé domba-Ku wo sé domba-Ku é mata'u ni Aku,

Yohanes 4:10

Si Yesus nimingkotla, “Sa ko mata'u tumoro an tatambér ni Opo Empung wo séi si mahnuwu'ma wia ni ko im ‘Wéhanpé'mé zano elepen Aku’, tantumo ni ko é nimahaléiola wia ni Sia wo ni Sia é niméhémola wia ni ko un zano katou-touan.”

Yohanes 4:11

Kuan ni wéwéné itii wia ni Sia, “Tuang, ni Ko én zéi'kan siapa sasahap wo um parigi kenu én totoz rarem, wisa ung kailekan-Numé un zano katou-touan itii?

Yohanes 4:14

taan séi uman si melep un zano iwéhé-Ku, ni sia én zéi'mo maré'o makaz ing kauré-uré. Pahpaan un zano iwéhé-Ku é maéndo tanu ung kembu'an witu un touna u mengembu-ngembu' uman wo mahwéhé ung katou-touan makaz ing kauré-uré wia ni sia.”

Kisah Rasul-rasul 20:28

Niitumo, mile-ilek wo pahilekela péléng sé jamaat. Pahpaan ni kamumo sé tinotoz ni Roh Lenas in tumatér sé jamaat ni Opo Empung i miara ni séra. Ni séra nimaéndo jamaat-Na pahpaan ni séra ém winaér-Namo karia un zaha' ni Oki'-Na.

1 Petrus 5:2

Piarala sé domba ni Opo Empung sé wia ni kamu. Tia' karia in totoz pahlusun, taan karia u mahpaa-paaz tanu ung kapaaz ni Opo Empung. Tia' menéro-néro uman ang kauntungan, taan iwéhéla un tou niou in uli-ulit mahsawang.

Wahyu 14:4

Ni séra én tanumokan si tuama zéi'kampé' nimahteke-tekela karia ni wéwéné pahpaan kapaaz néra ung katou-touan néra ém weresi. Ni séra é sé mahkii-kiit si Anak ni Domba wisa uman un angéan-Na. Ni séramo sé tinubus im wia sé tou i maéndo tanu raragés kataré-taré wia si Opo Empung wo si Anak ni Domba.

Wahyu 21:22

Ni aku én zéi'kan nimileké um Walé ni Opo Empung witu um wanua tua'na itii. Pahpaan um Walé ni Opo Empung itiimo si Opo Empung, Si Totoz Mahkawasa, wo téntu kasii si Anak ni Domba itii.

Wahyu 21:23

Um wanua tua'na itii én zéi'kan memandung u sena' ni endo wo u sena' ni loloho'en i sumena' witu, pahpaan u sena' ni Opo Empung é mahsena'ma witu um wanua tua'na itii wo u solo um wanua tua'na itii é si Anak ni Domba.

Wahyu 21:4

Péléng a lué' néra é maisu'en-Na im wana am weren néra. Zéi'mo siapa si maté, zéi'mo siapa si mahpengasi', kaapa mahamé' karia i mahkérét, kaapa mendan u rumara un até. Pahpaan péléng an urémo itii é limangkoioma.”

Wahyu 21:6

Kuan-Na kasii wia ni aku, “Niana péléng é nimamualimoma. Ni Akumo Si Alfa wo Si Omega, Si Kataré-taré wo Si Kamurian. Séi si maré'o, ni sia én tambérang-Ku un zano elepen, u mahondolé witu ung kembu'an u mahwéhémé ung katou-touan.

Wahyu 22:1

An ipapailek kasiimé ni malaekat itii wia ni aku u so'so'an un zanona é mahwéhé ung katou-touan. Un zanona én totoz léno tanumokan ung kaléno ung kristal. Wo un zano itii é mahso'so' mahondolé witu um wawa' u rurumezan ni Opo Empung ing Kolano wo ni Anak ni Domba.

Wahyu 4:11

“O Mahpiara wo Opo Empung nai. Ni Ko uman si wangun i makailek u lolooz wo sisigi'an wo ung kawasa. Pahpaan péléng am péléng ém winangun-Mu, wo pahpaan ing kapaaz-Mu, niana péléng ém winangun wo wia.”

Wahyu 5:6

An ilekengkuma si Anak ni Domba si tanu ing kinerizo, rimendai witu un unez u rurumezan ni Kolano wo né epat tumou-tou, wo sé zuana pulu' wo epat pahtutu'an limiklik ni Sia. Ni Sia ém wéwéhan am pitu sungé wo am pitu weren: niitu é sé pitu Roh ni Opo Empung, sé méiatu-Na i méyé wia péléng ung kaayahan.