Wahyu 4:8 - Taaz Weru Witu u Nunuwu'en Tombulu

⁸ An tétéwél né epat tumou-tou itii én taheenem. Wana makaliklik wo lalem an tétéwél néra é mawuta-wuta am weren. Endo wo wengi sé tumou-tou itii én zéi'kan kumana' i mahlooz si Opo Empung. Kuan néra, “Lenas, lenas, lenasela si Opo Empung, si Totoz Mahkawasa. Si Opo Empung si wia rengané im puuna, in tarékan, wo in tumondong.”

Wahyu 4:8 Iomraidhean Croise

Kisah Rasul-rasul 20:31

Niitumo ni kamu é léwo'zéi' in tuméga-tégam. Gena-genangen, teluna ta'un ung kauréna endo wo wengi ni aku zéi'kan mazéi' i mahsésa wia ni kamu si esa wo si esa karia im pahlué'an.

2 Korintus 6:18

Wo ni Aku é maéndo Ama' niou, ni kamu é maéndo koki'-Ku tuama wo koki'-Ku wéwéné. Niitu u Nuwu' ni Mahpiara, ni Sia si kimawasa péléng am péléng.”

1 Tesalonika 2:9

Katuari-katuari, kagenangan nioupé'la kura kai in totoz mahtututu' wo ma'ulit i mahpaayang. Endo wo wengi ni kai mahpaayang i mahwuwutul am pemandungen nai. Karia in téntu, ni kai én zéi'kan maéndo pengalin niou i mahtuzu' u Nuwu' Lé'os ni Opo Empung wia ni kamu.

1 Timutius 4:16

Ime-imeken ung katou-touannu wo an tutuzu'mu. Tia' ko mazéi' i mahwangun niana péléng, pahpaan karia in téntu ni ko toro tumulung un toumu wo péléng sé tou mahtalinga an tutuzu'mu, im witu un ukuman ni Opo Empung.

2 Timutius 4:2

Ipahwoka'la u Nuwu' ni Opo Empung, zozo' in endo wangun kaapa endo léwo', ni ko é mimekla i mangé mahwoka' u Nuwu' ni Opo Empung. Ipapata'ula ang kasumalaan, pahséro'ela wo pahsésaala sé tou karia péléng ung kaezenan wo an tutuzu' ulit.

Ibrani 13:8

Si Yesus Kristus én zéi'kan nimahwali-walinala, rengané im puuna, in tarékan makaz ing kauré-uré.

Wahyu 1:4

Um pinantik kenu ém wia ni aku Yohanes a mangé, iwéhé wia ni kamu sé pitu jamaat witi Asia. Mengalé-ngaléi uman ung kamang tatambér wo ung kaluasan witu un até é menaté-natér ni kamu. Ung kamang tatambér wo ung kaluasan witu un até ém wia si Opo Empung, si wiamo rengan im puuna, in tarékan wo in tumondong, wo um wia sé pitu roh sé makasaru u rurumezan-Na ing Kolano,

Wahyu 1:8

Si Opo Empung kimua, “Ni Aku én Alfa wo Omega, ung kalakoana é si Kataré-taré wo si Kamurian. Ni Aku ém wiamo rengané im puuna, in tarékan wo in tumondong. Ni Aku én Totoz Mahkawasa.”

Wahyu 11:17

Ni séra é mahkua, “Ni kai éng kumuama u makasé wia ni Ko, o Opo Empung, si Totoz Mahkawasa, si wia wo wiamo, pahpaan ni Ko én timiono ung kawasa totoz wangko' wo mahkawasamo ing Kolano.

Wahyu 14:11

Un teremuzna un api mahzézéha ni séra é mahlintooza makaz ing kauré-uré, wo endo wengi ni séra én zéi'kan mazéi' im pahzézéhan. Ni séra é sé mahongkot wo mahsigi' si binatang makaindé'en itii karia ni patongna, wo kasii sé nimakaileko tanda u ngaranna.”

Wahyu 14:3

Ni séra é mahkantar ung kakantaren weru witu u sinaru u rurumezan ni Kolano wo witu u sinaru né epat tumou-tou wo né pahtutu'an itii. Zéi'kan siapa zozo' in esa si toro mahtata'u ung kakantaren itii, akaz uman sé sana atus epatna pulu' wo epatna riwu tou sé tinubus im wia ung kaayahan sé toro mahtata'u niitu.

Wahyu 15:3

Wo ni séra é mahkantar ung kakantaren ni Musa, si ata ni Opo Empung wo kasii ung kakantaren ni Anak ni Domba, u mahkuamé in téntii, “Wangko' wo zéi'kan kakuaan péléng am pinaayang-Mu, o Mahpiara, Opo Empung, Si Totoz Mahkawasa! Péléng am winangun-Mu én zéi'kan mahsanaweka wo ulit, o Kolano péléng né tahsasana wanua!

Wahyu 15:7

A si esa im wia sé epat tumou-tou itii méhéma wia sé pitu malaekat itii am pitu eelepan a mas am wangunen a mawuta-wuta un upi' ni Opo Empung, si menou-nou makaz ing kauré-uré.

Wahyu 16:14

Sé roh né sétang itiimo sé nimahwanguné a makakompo'en wo ni séra kasii sé manimenéro sé kolano wia péléng ung kaayahan i maesaan ing kumoro' witu un endo wangko' ni Opo Empung Si Totoz Mahkawasa si kumala sé kakoro'-Na.

Wahyu 16:7

An talingangkumé im witu um pahtunuan a raragés wia si Opo Empung, mahkuamé, “O Mahpiara, Opo Empung, Si Totoz Mahkawasa, ni Ko i mahtotoz ulit kaapa zéi'kan am pahwangunen né tou én ulit wo zéi'kan mahsanaweka.”

Wahyu 19:15

Im witu u sumah-Na é nimondolé um pisou tewel ung kumala péléng sé tahsasana wanua, wo ni Sia é merénta ni séra karia ung ketez totoz wangko', tanumokan i merénta karia un teken uaséi, wo ni Sia é mapailek un upi' ni Opo Empung, si Totoz Mahkawasa wia sé kakoro'-Na, tanumokan i mahlééka am wua'na an anggor witi pahpesutan an anggor.

Wahyu 19:4

Ang kumuruzla sé zuana pulu' wo epat pahtutu'an wo sé epat tumou-tou itii wo mahsigi' si Opo Empung si rimumez witu u rurumezan-Na ing Kolano. Ang kuan néra, “Amin! Haleluya!”

Wahyu 21:22

Ni aku én zéi'kan nimileké um Walé ni Opo Empung witu um wanua tua'na itii. Pahpaan um Walé ni Opo Empung itiimo si Opo Empung, Si Totoz Mahkawasa, wo téntu kasii si Anak ni Domba itii.

Wahyu 3:7

Ang kuan kasii ni Oki' ni Tou, “Ipantikmula wo iwéhéma wia si malaekat si wia sé jamaat witi Filadelfia in téntii: ‘Kenumo a Nuwu' wia Si Lenas, Si Ulit, si timion ung kusi' ni Daud a méyé. Sa Sia si nimukama um pepenet, zéi'kan siapa si toro menet niitu. Wo sa Sia si nimeneta um pepenet, zéi'kan siapa si toro muka niitu.

Wahyu 4:4

Wo witu u makaliklik u rurumezan ni Kolano itii kasii ém wéwéhan an zuana pulu' wo epat rurumezan né kolano walina a rinumezan né zuana pulu' wo epat pahtutu'an, sé kimarai ang karai kulo' wo nimorong am poporongen né kolano u mas am wangunen.

Wahyu 4:6

Wo witu sinaru u rurumezan itii ém wéwéhan un tasik kaca, ung kalénona é masuat wo ung kristal. Wo wana a liklik u rurumezan um witu un unez itii ém wéwéhan sé tumou-tou epat. Witu um puuna wo u muri un awak néra é mawuta-wuta am weren.

Wahyu 4:9

Sekez sé epat tumou-tou itii i mahkua a lolooz wo a sisigi'an wo u makasé wia ni Sia si rimumez witu u rurumezan ni Kolano wo si menou-nou akaz ing kauré-uré,

Wahyu 5:6

An ilekengkuma si Anak ni Domba si tanu ing kinerizo, rimendai witu un unez u rurumezan ni Kolano wo né epat tumou-tou, wo sé zuana pulu' wo epat pahtutu'an limiklik ni Sia. Ni Sia ém wéwéhan am pitu sungé wo am pitu weren: niitu é sé pitu Roh ni Opo Empung, sé méiatu-Na i méyé wia péléng ung kaayahan.

Wahyu 6:1

Tumondongla niitu, ilekengkuma si Anak ni Domba itii nimukama u segel kataré wana am pitu segel itii. An talingangkumé si esaané im wia sé epat tumou-tou itii é mahkérété, ung karimezna én tanumokan un zanina un erut in téntii, “Méyémo!”

Wahyu 6:6

An talingangkumé im witu un unez né epat tumou-tou éng kana' i mahkuamé, “Sa ung gandum sana liter um wawaérna én esa dinar. Un teluna liter jelai , um wawaérna kasii én esa dinar. Wo tia' mahléwo' ang kai zaitun am wua'na pahwangunen lana, téntu kangkasii an tinanem pahwangunen anggor pahelepen.”

Wahyu 7:11

In toro niitu, péléng sé malaekat é rimendai limiklik u rurumezan ni Kolano, sé pahtutu'an wo sé epat tumou-tou. Ni séra péléng éng kimuruz karia i nimongkot witu u sinaru u rurumezan ni Kolano itii a mahsigi' si Opo Empung,

Wahyu 7:15

Niitumo, ni séra é rimendai makasaru u rurumezan ni Opo Empung ing Kolano wo mahpaayang wia ni Sia endo wo wengi witi Walé-Na. Ni Sia si rimumez witu u rurumezan-Na ing Kolano én tuméiz ni séra.