Wahyu 4:6 - Taaz Weru Witu u Nunuwu'en Tombulu

⁶ Wo witu sinaru u rurumezan itii ém wéwéhan un tasik kaca, ung kalénona é masuat wo ung kristal. Wo wana a liklik u rurumezan um witu un unez itii ém wéwéhan sé tumou-tou epat. Witu um puuna wo u muri un awak néra é mawuta-wuta am weren.

Wahyu 4:6 Iomraidhean Croise

Wahyu 14:3

Ni séra é mahkantar ung kakantaren weru witu u sinaru u rurumezan ni Kolano wo witu u sinaru né epat tumou-tou wo né pahtutu'an itii. Zéi'kan siapa zozo' in esa si toro mahtata'u ung kakantaren itii, akaz uman sé sana atus epatna pulu' wo epatna riwu tou sé tinubus im wia ung kaayahan sé toro mahtata'u niitu.

Wahyu 15:2

Tumondong niitu, an ilekengkuma wéwéhan un tanu un tasik kaca nimasembor wo un api. Wo witu un tembir un tanu un tasik kaca itii ém wéwéhan sé tou rimendai. Ni séramo sé kimalamoma si binatang makaindé'en itii wo si patongna wo kasii u rérékénan u ngaranna. Wia sé tou itii ém wéwéhan ung kecapi ni Opo Empung.

Wahyu 15:7

A si esa im wia sé epat tumou-tou itii méhéma wia sé pitu malaekat itii am pitu eelepan a mas am wangunen a mawuta-wuta un upi' ni Opo Empung, si menou-nou makaz ing kauré-uré.

Wahyu 19:4

Ang kumuruzla sé zuana pulu' wo epat pahtutu'an wo sé epat tumou-tou itii wo mahsigi' si Opo Empung si rimumez witu u rurumezan-Na ing Kolano. Ang kuan néra, “Amin! Haleluya!”

Wahyu 21:11

Um wanua tua'na itii é mahsena'mé u sena' ni Opo Empung. U sena'na um wanua tua'na itii én tanumokan u sena'na um watu totoz wangun wo mahal, tanumokan um watu yaspis wo ung kalénona én tanumokan ung kaléno ung kristal.

Wahyu 21:18

U ri'riz itii ém watu totoz wangun wo mahal yaspis am wangunen wo um wanua tua'na itii é mas nahas am wangunen, wo léno tanumokan kaléno ung kaca.

Wahyu 21:21

U mapulu' wo zua pepenet tua'na itii é mapulu' wo zua mutiara am wangunen, un esa wo un esa é mutiara esa am wangunen wo a lalan witu um wanua tua'na itii é mas nahas am wangunen, léno tanumokan kaléno ung kaca.

Wahyu 22:1

An ipapailek kasiimé ni malaekat itii wia ni aku u so'so'an un zanona é mahwéhé ung katou-touan. Un zanona én totoz léno tanumokan ung kaléno ung kristal. Wo un zano itii é mahso'so' mahondolé witu um wawa' u rurumezan ni Opo Empung ing Kolano wo ni Anak ni Domba.

Wahyu 4:4

Wo witu u makaliklik u rurumezan ni Kolano itii kasii ém wéwéhan an zuana pulu' wo epat rurumezan né kolano walina a rinumezan né zuana pulu' wo epat pahtutu'an, sé kimarai ang karai kulo' wo nimorong am poporongen né kolano u mas am wangunen.

Wahyu 5:11

An ilekengkuma wo talingangkumé u nuwu' né malaekat totoz lakez sé limiklik u rurumezan ni Kolano itii, karia né epat tumou-tou wo sé pahtutu'an. Ung kalakez né malaekat itii én zéi'kan karékénan.

Wahyu 5:14

A sé epat tumou-tou itii kumuama, “Amin!” A sé pahtutu'an itii rengan ing kimuruza karia i nimongkot wo mahsigi'.

Wahyu 5:6

An ilekengkuma si Anak ni Domba si tanu ing kinerizo, rimendai witu un unez u rurumezan ni Kolano wo né epat tumou-tou, wo sé zuana pulu' wo epat pahtutu'an limiklik ni Sia. Ni Sia ém wéwéhan am pitu sungé wo am pitu weren: niitu é sé pitu Roh ni Opo Empung, sé méiatu-Na i méyé wia péléng ung kaayahan.

Wahyu 5:8

I ni Sia niméndomé ung kitap ginulung itii, sé epat tumou-tou karia né zuana pulu' wo epat pahtutu'an é rengan ing kimuruzla karia i nimongkot witu u sinaru ni Anak ni Domba itii. Ni séra péléng én timion tata'saan ung kecapi wo un eelepan u mas am wangunen a mawuta-wuta ang kamania. Ang kamania itii ém pengaléien né tou ni Opo Empung.

Wahyu 6:1

Tumondongla niitu, ilekengkuma si Anak ni Domba itii nimukama u segel kataré wana am pitu segel itii. An talingangkumé si esaané im wia sé epat tumou-tou itii é mahkérété, ung karimezna én tanumokan un zanina un erut in téntii, “Méyémo!”

Wahyu 6:6

An talingangkumé im witu un unez né epat tumou-tou éng kana' i mahkuamé, “Sa ung gandum sana liter um wawaérna én esa dinar. Un teluna liter jelai , um wawaérna kasii én esa dinar. Wo tia' mahléwo' ang kai zaitun am wua'na pahwangunen lana, téntu kangkasii an tinanem pahwangunen anggor pahelepen.”

Wahyu 7:11

In toro niitu, péléng sé malaekat é rimendai limiklik u rurumezan ni Kolano, sé pahtutu'an wo sé epat tumou-tou. Ni séra péléng éng kimuruz karia i nimongkot witu u sinaru u rurumezan ni Kolano itii a mahsigi' si Opo Empung,

Wahyu 7:17

Pahpaan si Anak ni Domba si rimumez witu un unez u rurumezan ni Kolano itii é mamiara ni séra wo mahwali ni séra i mamelep witi kembu'an u mahwéhémé ung katou-touan. Wo si Opo Empung é misu' péléng a lué' néra.”