Wahyu 4:11 - Taaz Weru Witu u Nunuwu'en Tombulu

¹¹ “O Mahpiara wo Opo Empung nai. Ni Ko uman si wangun i makailek u lolooz wo sisigi'an wo ung kawasa. Pahpaan péléng am péléng ém winangun-Mu, wo pahpaan ing kapaaz-Mu, niana péléng ém winangun wo wia.”

Wahyu 4:11 Iomraidhean Croise

Kisah Rasul-rasul 14:15

“É kamu péléng, kaa kamu mahwangun an téntu? Ni kai én tou uman masuat wo ni kamu. Ni kai i niméyé wia'i é mémahwoka' u Nuwu' Lé'os tumoro si Yesus wia ni kamu, wo kamu tumula'ula am pahwangunen niou an zéi'kan siapa torona kenu, wo méyé wia si Opo Empung si menou-nou. Ni Sia si nimangun u langit wo ung kaayahan, un tasik wo péléng am witu.

Kisah Rasul-rasul 17:24

Si Opo Empung itiimo si nimangun ung kaayahan wo péléng am witu. Ni Siamo si mahkawasa witi langit wo wia ung kaayahan. Ni Sia én zéi'kan mahento' wana am peraragésan am winangun né tou.

Roma 11:36

Pahpaan péléng am péléng ém winangun-Na, wo wia ni Sia a méyé, wo wia ni Sia uman. U looz wo sigi' ém wia ni Sia uman makaz ing kauré-uré. Amin.

Efesus 3:9

Ni aku kasii én tinambéran ung kamang i mapata'u wia péléng sé tou ung ginenang ni Opo Empung u méikawunipé' itii. Pahpaan ung ginenang itii é méiwuni ni Opo Empung rengan ung kaayahan im winangun-Na, si nimangun péléng am péléng.

Ibrani 1:10

Si Opo Empung kangkasii éng kimua tumoro si Oki'-Na, “Puunala péléng am péléng im winangun, ni Ko Mahpiara, ni Ko é zimeta'moma un to'tolan ung kaayahan, wo u langit ém winangun u lengen-Mu.

Ibrani 1:2

Taan in tarékan, im wana an endo kaakazan ung kaayahan kenu, ni Sia é nimuwu' wia ni kita mengiité si Oki'-Na, si tinotozo i maéndo makaanu péléng am péléng. Mengiité si Oki'-Na, si Opo Empung nimangun péléng am péléng.

Wahyu 1:6

wo nimangun ni kita i maéndo tou-Na witi Kakolanoan-Na, wo kasii maéndo walian mahpaayang wia si Opo Empung, si Ama'-Na. Wia ni Sia u lolooz wo u sisigi'an wo ung kawasa makaz ing kauré-uré. Amin.

Wahyu 10:6

a sia mahtiwa' witu u ngaran-Na si menou-nou makaz ing kauré-uré, si nimangun u langit wo péléng am witu, ung katanaan wo péléng am witu, wo un tasik wo péléng am witu, kuana, “Un oras si Opo Empung i mangun ang ginenang-Na én zéi'mo isoro'!

Wahyu 14:7

Si malaekat itii é nimuwu'mé totoz rimez, “Ikaindé'la si Opo Empung, pahsigi'ela wo pahloozela Sia, pahpaan un oras-Na in tumotoz in ulit kaapa zéi'kan am pahlé'osen né tou é méikaayomola. Mahongkotla wo mahsigi'la wia ni Sia si nimanguno u langit, ung kaayahan, un tasik wo péléng ang kembu'an.”

Wahyu 19:1

Kumawusa niitu, an talingangkumé u nuwu' totoz rimez tanu u nuwu' né tou totoz lakez witi kasendukan, mahkuamé, “Haleluya! Si Opo Empungta uman si milot sé tou im witu un ukuman wana a singkéla', si pahsigi'en wo pahloozen, wo si mahkawasa.

Wahyu 5:12

Ni séra é mahkantar totoz rimez, kuan néra, “Si Anak ni Domba si kinerizo itii, si wangun i makailek ang kawasa, ang kawa'ilanan, ang katulapan, ang kaenté'an, a sisigi'an, ang kawangko'an wo a lolooz!”

Wahyu 5:2

An ilekengku kasiima si malaekat ketezen. Ni sia é meligau karia i mahkérét, “Séi si wangun i muka am pitu segel wo muka ung kitap ginulung itii?”

Wahyu 5:9

A sé epat tumou-tou wo sé zuana pulu' wo epat pahtutu'an kumantaré ung kakantaren weru. Kuan néra, “Ni Ko si wangun i makailek ung kitap ginulung itii, wo muka a segelna; pahpaan ni Ko si Anak ni Domba éng kinerizo, wo karia un zaha'-Mu sé tou wia ung kaayahan ém winaér-Mumo im wia sé tahsasana suzu, sé tahsasana nunuwu'en, sé tahsasana réwok mahtuari wo wia sé tahsasana wanua i maéndo anu ni Opo Empung.