Wahyu 21:2 - Taaz Weru Witu u Nunuwu'en Tombulu

² Ni Aku kangkasii nimileka um wanua tua'na lenas, u Yerusalem weru, um wia si Opo Empung witi kasendukan an itumpamé. Um wanua tua'na itii é niimek tanumokan si wéwéné kawéngen, niimek i mahilekan karia ni tuama kumawéng ni sia.

Wahyu 21:2 Iomraidhean Croise

Yohanes 3:29

Si makaanu si broit é si brédégom, taan si kakaria ni brédégom si rimendai witu u réténa wo mahtalinga ni sia én totoz mahpaa-paaz in timalingamé u nuwu' ni brédégom itii. Téntu kangkasii ni aku, in tarékan u mahpaa-paazku ém wutulo.

2 Korintus 11:2

Um pa'émanen niou wia si Kristus én totoz pahtéizangku wo ikaupi'ku sa wéwéhan sé mahlululu um pa'émanen niou, tanu si Opo Empung én timéiz ni kamu. Pahpaan ni aku si totoz puuna nimapata'u wia ni kamu tumoro si Yesus Kristus makaz ni kamu ma'éman wia ni Sia. Niitu é masuat wo si ama' mahkakawéng si rarahana karia ni tuama maéndo mahayona. Ni kamumo sé tanu si raraha itii wo si tuama itii é si Kristus.

Ibrani 11:10

Pahpaan si Abraham uli-ulit ma'éman i ni sia é milek um wanua tua'na u makato'tolan enté', u niimeko wo winangun ni Opo Empung, niitumo ni sia é ma'ento' karia in zéi'kan mahzua-zua genang i makailek um wanua tua'na itii.

Ibrani 11:16

Taan in tarékan, ni séra é lumelo un tana' u lumouspé'mé ung kawangunanna, niitu un tana' witi kasendukan. Niitumo si Opo Empung én zéi'kan maizang im pahkuan néra in Opo Empung néra, pahpaan si Opo Empung é nimimeko um wanua tua'na esa wia ni séra.

Ibrani 12:22

Taan ni kamu é niméyémo wia ung kentur Sion, witi wanua tua'na ni Opo Empung si menou-nou, niitumo u Yerusalem witi kasendukan wo mahilekan karia né mariwu-riwu malaekat sé nimaréwok i mahpaa-paaz.

Ibrani 13:14

Pahpaan im wia ung kaayahan kenu ni kita én zéi'kan siapa um wanua tua'na um pahento'an makaz ing kauré-uré, taan ni kita é mahpenéro um wanua tua'na ento'anta in tumondong witi kasendukan.

Wahyu 1:1

A méipantik witu um pinantik kenu én tumoro a méipapailek ni Yesus Kristus, a méiwéhé ni Opo Empung wia ni Sia in ipapata'u wia sé ata-Na wo séra toro mata'u an totoz i mamuali. Si Yesus Kristus é nimapaileko niana péléng wia si Yohanes ata-Na, mengiité si malaekat méiatu-Na.

Wahyu 1:4

Um pinantik kenu ém wia ni aku Yohanes a mangé, iwéhé wia ni kamu sé pitu jamaat witi Asia. Mengalé-ngaléi uman ung kamang tatambér wo ung kaluasan witu un até é menaté-natér ni kamu. Ung kamang tatambér wo ung kaluasan witu un até ém wia si Opo Empung, si wiamo rengan im puuna, in tarékan wo in tumondong, wo um wia sé pitu roh sé makasaru u rurumezan-Na ing Kolano,

Wahyu 1:9

Ni aku, Yohanes, katuari niou esa pa'émanen. Ni kita é nimendanomé an zézéha pahpaan i mahkiit si Yesus, méikauntep witi Kakolanoan ni Opo Empung wo ezen ma'ento' si Yesus i mawurimé sumaup. Ni aku é méitia' witi katanaan makangaran Patmos pahpaan mahkua u Nuwu' ni Opo Empung wo a mémoipapata'u ni Yesus.

Wahyu 11:2

Taan u lésaz witi ondol um Walé ni Opo Empung én tia'mo pahuukurennu. Pahpaan, niitu é mémoiwéhé wia sé tahsasana wanua walina sé zéi'kan mata'u si Opo Empung. U Yerusalem um wanua tua'na lenas é maipeléé-léék néra, epatna pulu' wo zuana loloho'en ung kauréna.

Wahyu 21:10

A ni aku kawasanla ni Roh ni Opo Empung, an iwalima ni malaekat itii witi wawona ung kentur tua'na wo rakék. Im witu an ipapaileknamé wia ni aku um wanua tua'na lenas, u Yerusalem, um wia si Opo Empung witi kasendukan an itumpamé.

Wahyu 21:9

Tumondong niitu, méyé si esa im wia sé pitu malaekat sé timion am pitu eelepan mawuta-wuta am pitu meléwo' kamurian. A si malaekat itii kumuamé wia ni aku, “Méyémo wia'i, ipapailekku wia ni ko si wéwéné kawéngen ni Anak ni Domba.”

Wahyu 22:17

A si Roh ni Opo Empung wo si wéwéné kawéngen itii kumuamé, “Méyémo!” Wo séi uman si tumalingama niitu, iwayamola sia ing kumuala “Méyémo!” Wo séi si maré'o, iwayamola sia i méyé, wo séi si paaz melep, iwayamola sia i maméndomé un zano mahwéhémé ung katou-touan u méitambér umané.

Wahyu 22:19

Wo sa wéwéhan si tou mina'la apa uman wana a nuwu' ni Opo Empung a méipantik witu ung kitap kenu, si tou itii én éndoan ni Opo Empung um wéténgna im wana am wua'na ung kai u mahwéhémé ung katou-touan wo um wéténgna im witu um wanua tua'na lenas, tanu u méipantik witu ung kitap kenu.”

Wahyu 3:12

Séi si nimuntung, ni sia én éndong-Ku tombol witi Walé ni Opo Empung-Ku wo ni sia é mento'mo witu makaz ing kauré-uré. Wia si tou itii kasii ém pantikang-Ku u ngaran ni Opo Empung-Ku, u ngaran um wanua tua'na ni Opo Empung-Ku, u Yerusalem weru. Um wanua tua'na itii ém witi kasendukan, wia si Opo Empung-Ku an itumpamé. U ngaran-Ku weru kasii én ipantik-Ku wia si tou itii.