Wahyu 20:6 - Taaz Weru Witu u Nunuwu'en Tombulu

⁶ Mahpaa-paazola sé kataré-taré méitoumé sumaup ni Opo Empung. Ni séramo sé linenas-Na. Ni séra én zéi'mo mendan um patéan kazua taan ni séra é maéndo walian ni Opo Empung wo ni Kristus, wo ni séra é merénta ing kolano karia-Na witu u sana riwu ta'un.

Wahyu 20:6 Iomraidhean Croise

Lukas 14:15

Kaitalingamé u méikuamé ni Yesus, si esaané wia sé tou mahkan witu kumuama wia si Yesus, “Totoz mahpaa-paaz si tou makuman karia ni Opo Empung witi Kakolanoan-Na.”

Roma 12:1

Niitumo, katuari-katuari, pahpaan ung karipu'an ni Opo Empung wia ni kita, ni aku sumésama wia ni kamu, iragésla un tou niou wia si Opo Empung tanu u raragés menou-nou linenas wo ung kapaaz-Na. Niitumo un uli-ulit raragésmu wia si Opo Empung.

Roma 8:17

Sa ni kita én oki'-Na, ni kita kangkasii é maéndo tou makasangkum a méitaaz ni Opo Empung. Ni kita é makailek a sangkum itii karia ni Kristus. Niitu éng kailekanta sa ni kita mazéha karia-Na, wo ni kita kangkasii é loozen wo sigi'en karia-Na.

2 Timutius 2:12

Sa kita ezen im wana an zézéha, ni kita é mamerénta karia-Na. Taan sa kita mahkélong ni Sia, ni Sia kangkasii éng kumélong ni kita.

1 Petrus 2:5

Ni kamu é masuat wo um watu menou-nou u niéndo ni Opo Empung im wangunen Walé-Na Lenas. Karia in téntu ni kamu é nimaéndo walian linenas ni Opo Empung i mahali ung katou-touan in iragés wia si Opo Empung. Si Opo Empung ém paaz méndo a raragés niou pahpaan am winanguno ni Yesus Kristus wia ni kita.

1 Petrus 2:9

Taan ni kamumo sé pinéléng ni Opo Empung, walian i mahpaayang wia si Opo Empung si Kolano, tahsasana wanua linenas, nimaéndo tou méisanapa' wia ni Sia, wo ni kamu mahwoka' am pahwangunen ni Opo Empung an totoz wangko'. Si Opo Empung si timawahmomé ni kamu mondolé im witu ung karimbengbengan a muntep witu un ayah-Na un totoz makakompo'en.

Wahyu 1:6

wo nimangun ni kita i maéndo tou-Na witi Kakolanoan-Na, wo kasii maéndo walian mahpaayang wia si Opo Empung, si Ama'-Na. Wia ni Sia u lolooz wo u sisigi'an wo ung kawasa makaz ing kauré-uré. Amin.

Wahyu 14:13

An talingangkumé u nuwu' witi kasendukan ung kimuamé wia ni aku, “Ipantikla ang kenu: Rengan in tarékan, mahpaa-paazola sé tou nimaté pahpaan nimaesa karia ni Mahpiara!” A si Roh ni Opo Empung kumuamé, “Éné, ulito itu, wo séra toro kumana'la im wana am paayangen néra, pahpaan péléng am pinaayang néramé é mengari-ngaria ni séra.”

Wahyu 2:11

Séi si wéwéhan lunteng é mahtalingama lé'os an ipahkua ni Roh ni Opo Empung wia sé jamaat: Si tou nimuntung én zéi'kan mahpenda-pendanla an zézéha witu um patéan kazua.’ ”

Wahyu 20:14

Kumawusa niitu, um patéan wo um pahwéha-wéhan né tou nimatémo é méiwerita witu un tasik api melaya-layas. Un tasik api itiimo um patéan kazua.

Wahyu 21:8

Taan sé tou talo, sé zéi'kan ma'éman, sé mahwangun a makati'tiren, sé memumunu' tou, sé tou samek, sé meriara, sé mahongkot wo mahsigi' wia sé opo-opo wo péléng sé tantowo, ni séra péléng én ukumen iwerit witu un tasik api wo walélang melaya-layas. Ung kenumo um patéan kazua.”

Wahyu 22:5

Im witu um wanua tua'na itii én zéi'mo siapa wengi wo péléng am witu én zéi'mo memandung sena' u solo wo u sena' ni endo, pahpaan si Opo Empung si nimaéndo sena' i mahsena'ma wia ni séra. Wo ni séra é merénta ing kolano makaz ing kauré-uré.

Wahyu 22:7

Ang kuan ni Yesus, “Un ulitna ni Aku zéi'mo uré é méyémo. Mahpaa-paazla sé tou mahkiit a nuwu' ni Opo Empung a méipantik witu ung kitap kenu!”

Wahyu 3:21

Séi si nimuntung, énéang-Ku i marumumez karia-Ku witu u rurumezang-Ku ing Kolano, tanu ni Aku i nimuntungo wo rimumez mahwali-wali karia ni Ama'-Ku witu u rurumezan-Na ing Kolano.

Wahyu 5:10

Ni Ko nimanguno ni séra nimaéndo esa kakolanoan, wo kasii nimaéndo walian wia si Opo Empungta, wo ni séra sé mamerénta ing kolano wia ung kaayahan.”