Wahyu 20:4 - Taaz Weru Witu u Nunuwu'en Tombulu

⁴ An ilekengkuma a rurumezan né kolano wo sé tou rimumez witu ém winéhanna ung kawasa in tumotoz ulit kaapa zéi'kan am pinahlé'osé né tou. Ilekengku kasiima sé roh né tou sé im puuna éng kinetoran an ulu pahpaan i mahkua a niilek wo an tinalinga néra tumoro si Yesus wo kasii pahpaan i mahkua u Nuwu' ni Opo Empung, sé zéi'kan mahongkot wo mahsigi' wia si binatang wo wia si patong ni binatang itii wo sé zéi'kan tinandaan an tungtung wo a lengen néra. Ni séra é méitou sumaup ni Opo Empung, a merénta ing kolano karia ni Kristus sana riwuna ta'un ung kauréna.

Wahyu 20:4 Iomraidhean Croise

Matius 19:28

Kuan ni Yesus wia ni séra, “Uli-ulit ikua-Kuma wia ni kamu, im péléng am péléng pinakawerumoma ni Opo Empung, i si Oki' ni Tou rumumez witu u rurumezan-Na ing Kolano um pahsigi'en wo pahloozen, ni kamu i mahkii-kiit ni Aku é marumumez kangkasii witu u mapulu' wo zua rurumezan né kolano in tumotoz ulit kaapa zéi'kan am winanguné né mapulu' wo zua suzu ni Israel.

Matius 24:10

Wo lakez sé tou ma'éman wia si Opo Empung én tumamburi im wia ni Sia. Ni séra é mayo sé tou walina wo sé tou walina é mayo ni séra wia sé mahkawasa wo mahzi'zi-zi'zisan.

Markus 6:16

Si Herodes in timalingamé niitu, ang kuana, “Zéi'kan, ni siamo si Yohanes Menanarani si pinokolangkumo un ulu, si nimatoumomé sumaup.”

Markus 6:27

A rengan iatunama si touna i mamokol un ulu ni Yohanes. A si tou itii rengan i mamokolé un ulu ni Yohanes si witi untep um bui.

Markus 9:11

A séra lumigau wia ni Sia, “Kaa sé tou tulap un Torat é mahkua i si Elia é léwo'zéi' mapuunamé i méyé taan si Oki' ni Tou?”

Lukas 1:17

Si Opo Empung é nimatumé ni sia i mapuunamé wia si Mahpiara wo ni sia ém wéwéhan ung kaenté'an wo ung kawasa tanu si nabi Elia. Ni sia é mangun sé ama' mahlé'o-lé'osan karia né oki' néra, wo sé tou mahsaru si Opo Empung én iwurina witu u lalan kaulitan. Karia in téntu, ni sia é mimek sé tou wo séra wangun i sumungkul si Opo Empung.”

Lukas 14:14

Sa téntu um wangunennula, ni ko éng kamangen, pahpaan sé tou téntu én zéi'kan mata'u maér wia ni ko tanu um winangunmuma wia ni séra. Pahpaan ni ko ém waérannokan ni Opo Empung, im witu un endo i sé tou ulit in itou-Na sumaup.”

Lukas 22:30

Karia in téntu ni kamu én toro mahkan wo mahelep mahwali-wali karia-Ku witi Kakolanoang-Ku. Ni kamu kasii é marumumez witu u rurumezan né kolano in tumotoz ulit kaapa zéi'kan am winanguné né mapulu' wo zua suzu ni Israel.”

Yohanes 14:19

Zéi'mo mauréma sé tou wia ung kaayahan kenu én zéi'mo milek ni Aku. Taan ni kamu é mamilek ni Aku, pahpaan ni Aku é menou-nou wo ni kamu kangkasii é mamenou-nou.

Roma 11:15

Pahpaan sa si Opo Empung soo sumungkul sé tou Yahudi, niia é maéndo lalan wangun né tou walina sé wia ung kaayahan i mawurian sumaup karia-Na. Woopé' kasii sa sé tou Yahudi sé sungkulela ni Opo Empung. Niitu én tanumokan sé tou nimatémo an itoumé sumaup ni Opo Empung im wia sé nimaté.

Roma 8:17

Sa ni kita én oki'-Na, ni kita kangkasii é maéndo tou makasangkum a méitaaz ni Opo Empung. Ni kita é makailek a sangkum itii karia ni Kristus. Niitu éng kailekanta sa ni kita mazéha karia-Na, wo ni kita kangkasii é loozen wo sigi'en karia-Na.

2 Timutius 2:12

Sa kita ezen im wana an zézéha, ni kita é mamerénta karia-Na. Taan sa kita mahkélong ni Sia, ni Sia kangkasii éng kumélong ni kita.

Wahyu 1:2

Si Yohanes é mahkua péléng a niilek wo an tinalingana tumoro a Nuwu' ni Opo Empung wo péléng a mémoipapailek ni Yesus Kristus, a niileknamo.

Wahyu 1:9

Ni aku, Yohanes, katuari niou esa pa'émanen. Ni kita é nimendanomé an zézéha pahpaan i mahkiit si Yesus, méikauntep witi Kakolanoan ni Opo Empung wo ezen ma'ento' si Yesus i mawurimé sumaup. Ni aku é méitia' witi katanaan makangaran Patmos pahpaan mahkua u Nuwu' ni Opo Empung wo a mémoipapata'u ni Yesus.

Wahyu 11:11

Lumangkoia un telu wo sana pahzuana endo, si Opo Empung é niméhéma un asengan wia sé tou zua itii a séra rumendaié wo péléng sé tou nimileka sé tou zua itii én totoz maindé'.

Wahyu 11:15

A si malaekat kapitu sumengoma um pontuangna, an talingangkumé a nuwu' totoz rimez witi kasendukan a mahkuamé, “Ung kawasa i mahperénta wia ung kaayahan én anu uman ni Opo Empungta wo ni Kristus si méitaaz-Na, wo ni Sia éng kumawasa ing Kolano makaz ing kauré-uré.”

Wahyu 11:3

Ni Aku é matu sé zua tou sé nimilek wo timalinga a méikua-Ku, i makumua a méi'kua-Ku itii, karia ing kimarai ung karai zemdem, ung kauréna é sana riwu zuana atus wo enemna pulu' endo.”

Wahyu 11:7

Sa séra nimakakuamoma an tinalinga wo am pina'ilek néra, wéwéhan si meneza' tou mondolé witu um woso um patéan, mékumoro' karia néra zua wo kumala ni séra wo munu' ni séra.

Wahyu 12:11

Sé katuari esa pa'émanen itii kasii éng kimalamoma si tonaas né sétang karia un zaha' ni Anak ni Domba, wo karia un tinalinga wo niilek néra tumoro si Anak ni Domba, un ipahkua néra wia sé tou. Ni séra én zéi'mo pandung ung katou-touan néra in esa makaz séra i maté.

Wahyu 14:11

Un teremuzna un api mahzézéha ni séra é mahlintooza makaz ing kauré-uré, wo endo wengi ni séra én zéi'kan mazéi' im pahzézéhan. Ni séra é sé mahongkot wo mahsigi' si binatang makaindé'en itii karia ni patongna, wo kasii sé nimakaileko tanda u ngaranna.”

Wahyu 15:2

Tumondong niitu, an ilekengkuma wéwéhan un tanu un tasik kaca nimasembor wo un api. Wo witu un tembir un tanu un tasik kaca itii ém wéwéhan sé tou rimendai. Ni séramo sé kimalamoma si binatang makaindé'en itii wo si patongna wo kasii u rérékénan u ngaranna. Wia sé tou itii ém wéwéhan ung kecapi ni Opo Empung.

Wahyu 17:8

Si binatang makaindé'en niilekmuma ing kataré, im puuna ni sia ém wiamo, taan in tarékan én zéi'mo wia. Ni sia é mondolé im witu um woso um patéan i maléwo'en. Sé tou mahento' wia ung kaayahan, sé zéi'kan méipantik witu ung kitap katou-touan rengané ung kaayahan kenu im winangun é mengusi-ngusingsing i nimileka si binatang, si im puuna ém wiamo taan in tarékan én zéi'mo wia wo mawia sumaup.

Wahyu 2:26

Séi si nimuntung wo mahwangun ang kapaaz-Ku makaz ni Aku i mawurimé sumaup ém wéhang-Ku ung kawasa i merénta péléng sé tahsasana wanua.

Wahyu 20:6

Mahpaa-paazola sé kataré-taré méitoumé sumaup ni Opo Empung. Ni séramo sé linenas-Na. Ni séra én zéi'mo mendan um patéan kazua taan ni séra é maéndo walian ni Opo Empung wo ni Kristus, wo ni séra é merénta ing kolano karia-Na witu u sana riwu ta'un.

Wahyu 22:5

Im witu um wanua tua'na itii én zéi'mo siapa wengi wo péléng am witu én zéi'mo memandung sena' u solo wo u sena' ni endo, pahpaan si Opo Empung si nimaéndo sena' i mahsena'ma wia ni séra. Wo ni séra é merénta ing kolano makaz ing kauré-uré.

Wahyu 3:21

Séi si nimuntung, énéang-Ku i marumumez karia-Ku witu u rurumezang-Ku ing Kolano, tanu ni Aku i nimuntungo wo rimumez mahwali-wali karia ni Ama'-Ku witu u rurumezan-Na ing Kolano.

Wahyu 4:4

Wo witu u makaliklik u rurumezan ni Kolano itii kasii ém wéwéhan an zuana pulu' wo epat rurumezan né kolano walina a rinumezan né zuana pulu' wo epat pahtutu'an, sé kimarai ang karai kulo' wo nimorong am poporongen né kolano u mas am wangunen.

Wahyu 6:9

I si Anak ni Domba itii mukama u segel kalima, ilekengkuma um witu um wawa' um pahtunuan a raragés wia si Opo Empung ém wéwéhan sé roh né tou winunu'mo, pahpaan u Nuwu' ni Opo Empung wo pahpaan ang kata'uan néra tumoro a niilek wo tinalinga néra.

Wahyu 7:3

kuana, “Tia'pé' pahléléwo'en niou un tana' kaapa un tasik kaapa ang kai, sa zéi'kampé' tinandaan naima an tungtung né ata ni Opo Empungta.”