Wahyu 2:23 - Taaz Weru Witu u Nunuwu'en Tombulu

²³ Péléng sé mahkii-kiit si wéwéné itii ém wunu'eng-Ku, wo toro kata'uala né jamaat i ni Aku é mata'u am pegena-genangen ni tou wo am witu un aténa. Ni Aku é maér wia sé tou mengiité am pinahwanguné ni esa wo ni esa.

Wahyu 2:23 Iomraidhean Croise

Matius 16:27

Pahpaan si Oki' ni Tou é méyé sumaup karia né malaekat-Na wo karia ung kawasa ni Ama'-Na. In toro niitu, ni Sia é maér wia si tou mengiit am pinahlé'osa ni esa wo ni esa.

Lukas 16:15

Ang kuan ni Yesus wia ni séra, “Ni kamu é mapailek wia sé tou i ni kamu én ulit, taan kata'uan ni Opo Empung am witu un até niou. Pahpaan am pahgenangela né tou in totoz wangun im wia ung kaayahan, niitu én ikazi'zis ni Opo Empung.

Yohanes 21:17

Kuan ni Yesus wia ni sia ing katelu, “Simon oki' ni Yohanes, apa ni ko rumaraaté ni Aku?” Pahpaan si Yesus kimua, “Apa ni ko rumaraaté ni Aku?” ing katelumo, niitumo un até ni Petrus é rumara. A sia kumuala wia si Yesus, “Tuang, ni Ko é mata'u péléng am péléng, kata'uan-Nu i ni aku é rumaraaté ni Ko.” A si Yesus kumuala wia ni sia, “Piarala sé domba-Ku.

Yohanes 4:16

Kuan ni Yesus wia ni sia, “Mangémo, tawahené si mahayomu wo mawurimé wia'i.”

Kisah Rasul-rasul 1:24

Tumondongla niitu a séra péléng mengaléi wo mahkua, “O Mahpiara, totoz kata'uan-Nu péléng an até né tou. Niitumo, ituzu'mé wia ni kai séi si péléngen-Nu im wia sé zua tou kenu.

Roma 14:12

Niitumo, ni kita péléng si esa wo si esa é mamingkot am peligauen ni Opo Empung tumoro am pinahwanguntamé.

Roma 8:27

Si Opo Empung si mata'u am witu un até né tou, mata'u ung kapaaz ni Roh Lenas pahpaan si Roh Lenas itii si mahpengaléi sé tou linenas ni Opo Empung mengiit ung kapaaz-Na.

2 Korintus 5:10

Pahpaan ni kita péléng é léwo'zéi' i maisaru witu u rurumezan ni Kristus ing Kolano i matotozen ulit kaapa zéi'kan, wo sé tou si esa wo si esa é makailek um wawaér mengiit am winangunna, niitu im wangun kaapa léwo'.

Galatia 6:5

Pahpaan si esa wo si esa é mengali am wua'na wana am winangunna in esa.

Ibrani 4:13

Zozo' in esa én zéi'kan siapa sé winangun-Na sé méikawuni im witu u sinaru-Na. Pahpaan péléng am péléng éng kaile-ilekan-Na, niitumo ni kita péléng é léwo'zéi' makaulit wo mengali am wua'na am pemuali-mualinta witu u sinaru-Na.

1 Petrus 1:17

Pahtawahen niou si Opo Empung in Ama', ni Sia si zéi'kan mahtémbo-témbo i mahtotoz ulit kaapa zéi'kan mengiit am pinahwanguné né tou. Niitumo, ni kamu sé limepuh umané wia ung kaayahan kenu é léwo'zéi' mahsigi' ni Sia.

Wahyu 2:11

Séi si wéwéhan lunteng é mahtalingama lé'os an ipahkua ni Roh ni Opo Empung wia sé jamaat: Si tou nimuntung én zéi'kan mahpenda-pendanla an zézéha witu um patéan kazua.’ ”

Wahyu 2:7

Séi si wéwéhan lunteng é mahtalingama lé'os an ipahkua ni Roh ni Opo Empung wia sé jamaat: Si tou nimuntung, ni sia én énéang-Ku ing kuman um wua'na ung kai u mahwéhémé ung katou-touan, um witu un Uma ni Opo Empung.’ ”

Wahyu 20:12

Ilekengkuma sé tou nimatémo, ni séra é sé tou pahsigi-sigi'en wo sé tou kanaramen, rimendai witu u sinaru u rurumezan ni Kolano itii. In toro niitu, péléng ang kitap ém winukama, am pinantikan péléng am pinahwanguné né tou. Am wukan kasiima ung kitap walina, ung kitap katou-touan. Sé tou nimatémo ém pahtotozen ulit kaapa zéi'kan am pinahlé'os néramé mengiit a mémoipantik wana ang kitap itii.

Wahyu 20:13

Un tasik nimayoma sé tou nimaté witu, um patéan wo um pahwéha-wéhan né tou nimaté é nimayoma sé tou nimaté witu, wo si esa wo si esa én totozen mengiit am pinahlé'os néramé.

Wahyu 22:12

Ang kuan ni Yesus, “Ni Aku én uli-ulit zéi'mo uré é méyémo wo ni Aku i méyé é mahalimé um wawaér in iwaér wia si esa wo si esa, mengiité am pinahlé'osnamé.

Wahyu 6:8

An ilekengkuma si kawalo kilo. Si kawalo itii é sinakéan ni tou makangaran Patéan, wo um pahwéha-wéhan né nimatémo é mahkiité witu murina. Wia ni séra ém winéhan ung kawasa i munu' sé sana pahepat né tou wia ung kaayahan karia um pisou, karia ung kaahreman, a saki melaput wo seza'en né meneza' tou.