Wahyu 13:12 - Taaz Weru Witu u Nunuwu'en Tombulu

¹² Witu u sinaru ni binatang kataré, si binatang kazua kenu mahwangun am péléng karia ung kawasa ni binatang kataré. Péléng ung kaayahan wo péléng sé mahento' witu ém winangun ni binatang kazua itii i mahongkot wo mahsigi' wia si binatang kataré, si pélaan um woanokan nimangun ni sia i maté taan u lé'oso.

Wahyu 13:12 Iomraidhean Croise

2 Tesalonika 2:4

Ni sia é masumaru si Opo Empung wo mahlooz un touna rumakékpé'mé sé pahsigi-sigi'en kaapa sé pahongko-ongkotan né tou in Opo Empung néra. Lumousé niitu, ni sia é marumumez witi untep um Walé ni Opo Empung wo mapakua witu u saru-sarun né tou i ni sia én Opo Empung.

Wahyu 13:2

Si binatang niilekku itii, un touna é masuat wo si macan tutul, un a'éna é masuat wo un a'é ni beruang wo u sumahna é masuat wo u sumah ni singa. Si binatang itii ém winéhanla ni naga ung ketezna, u rurumezanna ing kolano wo ung kawasana um wangko'.

Wahyu 13:8

Si binatang itii ém pahongkotan wo pahsigi'en péléng né tou mahento' wia ung kaayahan, sé rengané ung kaayahan kenu im winangun, a ngaran néra én zéi'kan méipantik witu ung Kitap Katou-touan un anu ni Anak ni Domba, si kinerizo.

Wahyu 14:11

Un teremuzna un api mahzézéha ni séra é mahlintooza makaz ing kauré-uré, wo endo wengi ni séra én zéi'kan mazéi' im pahzézéhan. Ni séra é sé mahongkot wo mahsigi' si binatang makaindé'en itii karia ni patongna, wo kasii sé nimakaileko tanda u ngaranna.”

Wahyu 14:9

Wo wéwéhan kasii si malaekat katelu timondongé sé malaekat zua itii a rumimeza ing kimuama, “Séi uman si mahongkot wo mahsigi' si binatang makaindé'en wo si patongna, wo séi uman sé nimakailek un tanda ni binatang itii witu un tungtung kaapa witu u lengenna

Wahyu 16:2

Mangé si malaekat kataré, a mamuwu'mé wia ung kaayahan a méitahu' witu un eelepan um wia ni sia. Am péléng sé tou winéhan un tanda ni binatang itii wo sé mahongkot i mahsigi' si patong ni binatang itii touané ang kupes makaindé'en wo totoz rumara.

Wahyu 17:8

Si binatang makaindé'en niilekmuma ing kataré, im puuna ni sia ém wiamo, taan in tarékan én zéi'mo wia. Ni sia é mondolé im witu um woso um patéan i maléwo'en. Sé tou mahento' wia ung kaayahan, sé zéi'kan méipantik witu ung kitap katou-touan rengané ung kaayahan kenu im winangun é mengusi-ngusingsing i nimileka si binatang, si im puuna ém wiamo taan in tarékan én zéi'mo wia wo mawia sumaup.

Wahyu 19:20

A si binatang makaindé'en karia si nabi towo itii kationala. Si nabi towo itii é si nimahwangunola a makakompo'en witu u sinaru ni binatang itii karia ung kawasa méiwéhénamé. Karia a makakompo'en itii, méipahlulunamé sé tou nimakaileko un tanda ni binatang itii wo nimahongkot wo nimahsigi'mola si patongna. Si binatang makaindé'en wo si nabi towo itii é menou-noupé' an ilombo'ma witu un tasik api wo walélang melaya-layas.

Wahyu 20:4

An ilekengkuma a rurumezan né kolano wo sé tou rimumez witu ém winéhanna ung kawasa in tumotoz ulit kaapa zéi'kan am pinahlé'osé né tou. Ilekengku kasiima sé roh né tou sé im puuna éng kinetoran an ulu pahpaan i mahkua a niilek wo an tinalinga néra tumoro si Yesus wo kasii pahpaan i mahkua u Nuwu' ni Opo Empung, sé zéi'kan mahongkot wo mahsigi' wia si binatang wo wia si patong ni binatang itii wo sé zéi'kan tinandaan an tungtung wo a lengen néra. Ni séra é méitou sumaup ni Opo Empung, a merénta ing kolano karia ni Kristus sana riwuna ta'un ung kauréna.