Wahyu 12:9 - Taaz Weru Witu u Nunuwu'en Tombulu

⁹ Si naga tua'na itii é si ulé' tu'a, si pahkuan kangkasii in tonaas né sétang kaapa si sétang mahlulu sé tou. Ni siamo si limulu péléng sé tou wia ung kaayahan wo ni sia kasii méilombo'mé wia ung kaayahan karia né malaekatna.

Wahyu 12:9 Iomraidhean Croise

Matius 13:39

Si kakoro' si kimeroza am watuna an tatanemen tanu ang gandum é si tonaas né sétang. Un oras i mupu' én endo ka- akazan ung kaayahan. Wo sé tou mengungupu' itii é sé malaekat.

Matius 24:24

Pahpaan sé zéi'kan uli-ulit Mesias wo sé zéi'kan uli-ulit nabi é méyé wo ni séra é mangun a makakompo'en zéi'mo kakuaan, wo sa toro, ni séra kasii é lumulu sé tou pinéléngo ni Opo Empung.

Matius 25:41

Ang kuan-Na wia sé tou witu ung kawihi-Na, ‘Tumingkasa im witu u sinaru-Ku, é kamu sé tou tinoro un epa'! Muntepoma witu un api zéi'kan mahpaté u niimek in iwéhé wia si tonaas né sétang wo sé malaekatna.

Matius 4:1

A si Yesus ipahwalima ni Roh ni Opo Empung witi kapelasan i mawa'wa'en ni tonaas né sétang.

Matius 4:10

Taan kuan ni Yesus wia si tonaas né sétang, “É tonaas né sétang, mangémo ko im wia'i! Pahpaan wéwéhan u méipantik, ‘Ni ko é léwo'zéi' i mahongkot wo mahsigi' si Mahpiara, si Opo Empungmu wo ni Sia uman si pahragésannu.’ ”

Matius 4:5

A Sia ipahwalima ni tonaas né sétang witi Yerusalem um wanua tua'na lenas. Im witu ni Sia é méipekirendaila ni tonaas né sétang witu um wawona um Walé ni Opo Empung.

Matius 4:8

A si Yesus ipahwali kasiima ni tonaas né sétang witi wawona ung kentur totoz rakék, an ipapaileknala wia ni Sia péléng ang kakolanoan wia ung kaayahan karia ang kawa'ilanan néra.

Lukas 10:18

Ang kuan ni Yesus wia ni séra, “Niilek-Ku si tonaas né sétang nimagogomé im witi langit tanu an tila'pong.

Lukas 13:16

Si wéwéné kenu é suzu ni Abraham, ni sia é mapulu' wo waluna ta'uno i saki pahpaan sinelazan ni tonaas né sétang. Niitumo, in tarékan witu un endo Sabat kenu ni sia é léwo'zéi' ipilot-Ku im witu ung kawasa ni tonaas né sétang.”

Lukas 22:3

A si tonaas né sétang nimuntepa wia si Yudas, si pahkuan Iskariot, si esaané wia sé mapulu' wo zua pahtuzu'en ni Yesus.

Lukas 22:31

Ang kuan ni Yesus wia si Simon Petrus, “Simon, Simon, amoké talinganuma ung kenu! Si tonaas né sétang é nimenutu'momé i mema'wa' ni kamu wo ni kamu én tanumokan ang gandum im pahgéigéien wo ikatampasé witu un itingna.

Lukas 8:12

Am watuna tatanemen méikagogo witu tembir u lalan, ung kalakoana é sé tou akazo in timalingama u Nuwu' ni Opo Empung, a méyé si tonaas né sétang an éndonama u Nuwu' ni Opo Empung im witu un até néra. Karia in téntu, ni séra én zéi'kan ma'éman makaz ni séra kangkasii én zéi'kan ipilot im witu un ukuman wana a singkéla'.

Yohanes 12:31

In tarékan én orasnamo si Opo Empung in tumotoz ulit kaapa zéi'kan am pahwangunen né tou wia ung kaayahan kenu, in tarékan kasii si Tonaas né sétang si mahkawasa wia ung kaayahan kenu éng kalan.

Yohanes 14:30

Zéi'mo lakez un ikua-Kuma wia ni kamu pahpaan si tonaas né sétang si mahkawasa wia ung kaayahan kenu é mahéyémo. Taan ni sia én zéi'kan siapa kawasa i merénta ni Aku.

Yohanes 16:11

Wo ni Sia kasii mapata'u i si Opo Empung én timotozo ulit kaapa zéi'kan am pahwangunen né tou, pahpaan si tonaas né sétang si mahkawasa wia ung kaayahan kenu é niukumo.

Yohanes 8:44

Si ama' niou é si tonaas né sétang wo ni kamu ém paaz mahwangun ang kapaaz ni ama' niou. Rengané im puuna ni sia é mahwunu' sé tou wo ni sia én zéi'kan kawisa mahwangun an ulit. Pahpaan, ni sia zéi'kan kawisa kumuala an ulit. I ni sia mahtowo, un ipahkuana ém witu un aténa a méyé, pahpaan ni sia én tantowo wo ama' péléng né tantowo.

Kisah Rasul-rasul 26:18

i mangun am weren néra mawula', wo ni séra zéi'mo menou-nou witu ung karimbengbengan taan menou-nou witu un ayah. Wo menou-nou zéi'mo kinawasa ni tonaas né sétang taan mahkiito um paaz ni Opo Empung. Wo pahpaan um pa'émanen néra wia ni Aku, ni séra é makailek un ampungan wana a singkéla' néra. Wo ni séra kasii é makailek um wéwéténgan im wana an tinotozo in iwéhé ni Opo Empung wia sé tou sé linenas-Na.’

Kisah Rasul-rasul 5:3

Taan si Petrus éng kimuala, “Ananias, kaa si tonaas né sétang é méiwayamu ing kimawasa un atému, taka-takazan si Roh Lenas én tinowoannu wo wéwéhan an zoit um winangkéran un tana' itii é méilé'osmu?

Roma 16:18

Pahpaan sé tou téntu én zéi'kan mahpaayang wia si Kristus, si Mahpiarata, taan ni séra é mahpaayang i mahwuwutul uman am pemandungen néra. Karia an eenou wo a nunuwu'en tariis im pahtalingan, ni séra é mahtowo wia sé tou sé zéi'kan siapa kata'uan.

Roma 16:20

Si Opo Empung si mahwéhémé ung kaluasan witu un até é rengan ing kumemuma si tonaas né sétang wo mangun ni sia ing kawasaan niou. Mengalé-ngaléi uman, ung kamang tatambér ni Yesus, si Mahpiarata é menaté-natér ni kamu!

2 Korintus 11:14

An téntu én tia' ikakompo' niou, pahpaan si tonaas né sétang kangkasii é mahasa-asar sé malaekat nimahalimé un ayah.

2 Korintus 11:3

Taan ikaindé'ku én taa ung genang niou é méilulu makaz kamu zéi'mo uli-ulit mahkiit si Kristus, tanu si Hawa im puuna i méilulula ni ulé' karia ung kasigaanna i mahtowo.

2 Korintus 12:7

Taan wo ni aku zéi'kan maloozan pahpaan an zéi'kan kakuaan a méipapata'u ni Opo Empung wia ni aku, ni aku é nimakailek u saki. U saki itii nimangun ni aku in totoz zézéha, niitu én tanu u susulah witu un touku méiwéhémé ni tonaas né sétang wia ni aku wo ni aku zéi'kan maloozan.

2 Korintus 2:11

Winangunku téntu, wo kita zéi'kan towoan ni tonaas né sétang, pahpaan kata'uanta ung ginenangna.

2 Korintus 4:4

Sé tou itii zéi'kan ma'éman pahpaan ung genang néra éng kinawasapé' ni tonaas né sétang si kimawasa wia ung kaayahan kenu. Niitumo, zéi'kan kailekan néra u sena' u Nuwu' Lé'os tumoro ung kawangko'an ni Kristus si totoz masuat wo si Opo Empung.

Efesus 4:14

Karia in téntu ni kita én zéi'mo tanu sé koki' sé mahkii-kiit uman an tutuzu' nimahwali-walinaan né menunuzu' towo. Niitu én tanumokan u sempa' pemolé-moléi u reges. Ni séra mahlululu uman karia an towo néra.

2 Tesalonika 2:3

Zozo' ing kura, tia' kamu towoan umanla né tou! Pahpaan puunala un endo i si Yesus méyé sumaup, ang kenu a léwo'zéi' i mamualipé'la: Lakez sé tou tumamburi im wia si Opo Empung wo si tou totoz léwo' é mapailek un touna wo ni sia én tinotozo i léwo'en.

1 Timutius 2:14

Wo kasii, zéi'kan si Adam si tinowoan ni tonaas né sétang, taan si Hawa si tinowoanna a mangun a sinéro' ni Opo Empung.

2 Timutius 3:13

taan sé tou léwo' wo tantowo kahuman éng kalousna i mahwangun a léwo'an, ni séra mahlulu sé tou wo ilulu né tou walina.

Ibrani 2:14

Sé koki' sé méiwéhémé ni Opo Empung itii é sé tou uman sé winangun karia u lé'ona wo un zaha'. Niitumo, si Yesus nimaéndo tou uman si winangun karia u lé'ona wo un zaha' tanu sé tou uman sé toro maté. Karia Sia i nimaté, ni Sia éng kimalamoma si tonaas né sétang si kimawasa witu um patéan.

1 Petrus 5:8

Ni kamu é léwo'zéi' i mile-ilek wo tuméga-tégam! Pahpaan si tonaas né sétang si kakoro' niou itii é melili-liklik menéro tou ing kalan, masuat wo si singa melili-liklik i menéro tou in tongko'en.

1 Yohanes 5:19

Kata'uanta i ni kita ém wia si Opo Empung a méyé wo ung kaayahan kenu éng kinawasa ni tonaas né sétang.

Yudas 1:9

Si Mikhael si tonaas né malaekat i mahzéi-zéi'an karia ni tonaas né sétang, soo tumotoz karia a séséro' wia si tonaas né sétang tumoro séi si makailek un awak ni Musa. Si Mikhael éng kimua uman, “Mengalé-ngaléi si Opo Empung é rumekaké ni ko!”

Wahyu 12:12

Niitumo, o kasendukan, mahpaa-paazola, wo ni kamu péléng sé mahento' witu. Taan ikaléwo'la kamu sé wia um wawo un tana' wo sé witi tasik! Pahpaan karia in totoz maupi' si tonaas né sétang én timumpamoma wia ni kamu. Pahpaan un orasna i mahwangun a léwo' én zéi'mo mauréma.”

Wahyu 12:3

An ileken kasiima un tanda walina witi langit. Pahilekena im wéwéhan si naga tua'na totoz rangdang. An ulu ni naga tua'na itii ém pitu, a sungéna é mapulu' wo wana am wawo an uluna itii ém péléng wéwéhan am poporongen né kolano.

Wahyu 12:7

Tumondong niitu, a mamualima um pahkoro'an witi kasendukan. Si Mikhael wo sé malaekatna é mahkoro' mahsaru si naga si pahsawangan né malaekat ni naga itii.

Wahyu 12:8

Taan si naga itii wo sé malaekatna én zéi'kan nimakawawama, a séra iwohomé im witi kasendukan.

Wahyu 13:14

Si binatang kazua itii é mahlulu sé tou mahento' wia ung kaayahan karia a makakompo'en, a méiwéhémo wia ni sia im pahwangunen witu u sinaru ni binatang kataré. Méiatu ni binatang kazua itii sé tou mahento' wia ung kaayahan i mangun um patong ni binatang kataré, si pélaan im winira' taan menou-noupé', im pahsigi'en.

Wahyu 16:14

Sé roh né sétang itiimo sé nimahwanguné a makakompo'en wo ni séra kasii sé manimenéro sé kolano wia péléng ung kaayahan i maesaan ing kumoro' witu un endo wangko' ni Opo Empung Si Totoz Mahkawasa si kumala sé kakoro'-Na.

Wahyu 18:2

Ni sia é mahkérét totoz rimez, kuana, “Kemumo, um Babel itii éng kemumo. Um wanua tua'na itii é nimaéndomola pahwéha-wéhan né sétang, wo wuwunian péléng né roh léwo' wo wuwunian péléng né tumétéwél makati'tiren wo ikazi'zis né tou.

Wahyu 18:23

U sena'na u solo én zéi'mo sumena'mé im witi wanua tua'na itii, wo sé mezazani witi tampa pahkawéngan én zéi'mo talingané im witi wanua tua'na itii. Pahpaan sé tou witi wanua tua'na itii sé mahwangké-wangkér é sé tou totoz ipahkua-kua im wia ung kaayahan, wo pahpaan a riaramu, péléng sé tahsasana wanua é méilulumu.”

Wahyu 19:20

A si binatang makaindé'en karia si nabi towo itii kationala. Si nabi towo itii é si nimahwangunola a makakompo'en witu u sinaru ni binatang itii karia ung kawasa méiwéhénamé. Karia a makakompo'en itii, méipahlulunamé sé tou nimakaileko un tanda ni binatang itii wo nimahongkot wo nimahsigi'mola si patongna. Si binatang makaindé'en wo si nabi towo itii é menou-noupé' an ilombo'ma witu un tasik api wo walélang melaya-layas.

Wahyu 2:13

Kata'uang-Ku um pahwéha-wéhan niou. Ni kamu é mahento' witu un tampa kinawasaan ni tonaas né sétang. Taan zozo' in téntu, ni kamu én zéi'kan mazéi' i ma'éman wia ni Aku, wo ni kamu kangkasii én zéi'kan mahkélong i ma'éman ni Aku. Téntu kangkasii, ni kamu én zéi'kan mazéi' i ma'éman, im witu un endo si Antipas si mengungua a niilek wo tinalingana tumoro ni Aku, si totoz ma'éman ni Aku, im winunu' witu u saru-sarun niou witu un tampa kinawasaan ni tonaas né sétang.

Wahyu 2:24

Taan wia ni kamu sé tou walina witi Tiatira, sé zéi'kan mahkiit an tutuzu' ni Izebel wo soo mahtata'u an tutuzu' ni tonaas né sétang, ni Aku éng kumuama: Wia ni kamu én zéi'mo awesang-Ku am pengalin walina.

Wahyu 2:9

Kata'uang-Ku ni kamu én zézéha wo zéi'kan siapa apa, taan ni kamu ém wa'ilan im witu u sinaru ni Opo Empung. Kata'uang-Ku kasii an tumoro sé mahtawuruk ni kamu. Ni séra é mahkua i ni séra én tou Yahudi sé pinéléng ni Opo Empung, taan un ulitna én zéi'kan. Un ulitna ni séra én jamaat ni tonaas né sétang.

Wahyu 20:10

Si tonaas né sétang si limulu sé tou itii é méiwerita witu un tasik api wo walélang melaya-layas, um wineritan kasii si binatang makaindé'en wo si nabi towo. Im witu ni séra péléng ém pahzézéhan endo wo wengi makaz ing kauré-uré.

Wahyu 20:8

Si tonaas né sétang itii é malumulu sé tahsasana wanua witi epat zuhuna ung kaayahan. Sé tahsasana wanua itii ém pahkuan ‘Gog’ wo ‘Magog’, wo ni séra é réwoken ni tonaas né sétang itii i makumoro'. Wo ung kalakez néra én tanumokan an eris witi tasik.

Wahyu 3:9

Genang-genangen! Sé woopira im wia sé jamaat ni tonaas né sétang, sé tantowo, sé mahkua-kua in tou Yahudi taan un ulitna én zéi'kan, iayo-Ku wia ni kamu. Ni séra én uli-ulit wanguneng-Ku i mékumuruz witu u sinaru niou, wo ni séra mata'u i ni Aku é rumaraaté ni kamu.

Wahyu 9:1

A si malaekat kalima sumengoma um pontuangna, ilekengkuma si tototi'en nimaragosé witi langit timoromé ung kaayahan. Wia si tototi'en itii ém winéhan ung kusi' um woso um patéan.

Wahyu 9:20

Taan sé tou walina sé zéi'kan nimaté pahpaan an zézéha itii é soopé' tumula'u am pahwangunen néra. Ni séra én zéi'kan mazéi' i mahongkot wia sé sétang, sé patong né opo-opo sé mas, péra', perunggu, watu, wo kai am wangunen; sé zéi'kan makailek kaapa zéi'kan makatalinga kaapa zéi'kan mata'u lumampang.