Wahyu 12:17 - Taaz Weru Witu u Nunuwu'en Tombulu

¹⁷ Niitumo si naga itii én totoz maupi' wia si wéwéné itii, a si naga itii mangé i zuméha sé suzu walina ni wéwéné itii, sé mahkiit um perénta ni Opo Empung wo kasii mahkua un tinalinga wo niilek néra tumoro si Yesus.

Wahyu 12:17 Iomraidhean Croise

Matius 28:20

wo tuzu'ela séra i mahwangun péléng a mémoiperénta-Ku wia ni kamu. Kata'uan nioula, ni Aku é menaté-natér ni kamu makaz ung kaakazan ung kaayahan.”

Yohanes 8:44

Si ama' niou é si tonaas né sétang wo ni kamu ém paaz mahwangun ang kapaaz ni ama' niou. Rengané im puuna ni sia é mahwunu' sé tou wo ni sia én zéi'kan kawisa mahwangun an ulit. Pahpaan, ni sia zéi'kan kawisa kumuala an ulit. I ni sia mahtowo, un ipahkuana ém witu un aténa a méyé, pahpaan ni sia én tantowo wo ama' péléng né tantowo.

1 Korintus 2:1

Katuari-katuari. I ni aku nimangémé wia ni kamu a mahwoka' un zéi'kampé' kata'uan niou tumoro si Opo Empung, ni aku én zéi'kan mahnuwu' wia ni kamu karia a nuwu' tariis pahtalingan kaapa karia ung katulapan né tou.

1 Petrus 5:8

Ni kamu é léwo'zéi' i mile-ilek wo tuméga-tégam! Pahpaan si tonaas né sétang si kakoro' niou itii é melili-liklik menéro tou ing kalan, masuat wo si singa melili-liklik i menéro tou in tongko'en.

1 Yohanes 2:3

Sa kita mahkiit am perénta ni Opo Empung, niitu én tumuzu'mé i ni kita é mata'u ni Sia.

1 Yohanes 5:10

Séi si ma'éman wia si Oki' ni Opo Empung, witu un aténa ém wéwéhano un ipahkua ni Opo Empung tumoro si Oki'-Na itii. Séi si zéi'kan ma'éman wia si Opo Empung, winangunna si Opo Empung in tantowo, pahpaan zéi'kan pa'émanenna un ipahkua ni Opo Empung tumoro si Oki'-Na.

1 Yohanes 5:2

Karia ung kenu ni kita toro mata'u i ni kita rumaraaté sé oki' ni Opo Empung: Ni kita rumaraaté si Opo Empung wo mahwangun a méiperénta-Na.

Wahyu 1:2

Si Yohanes é mahkua péléng a niilek wo an tinalingana tumoro a Nuwu' ni Opo Empung wo péléng a mémoipapailek ni Yesus Kristus, a niileknamo.

Wahyu 1:9

Ni aku, Yohanes, katuari niou esa pa'émanen. Ni kita é nimendanomé an zézéha pahpaan i mahkiit si Yesus, méikauntep witi Kakolanoan ni Opo Empung wo ezen ma'ento' si Yesus i mawurimé sumaup. Ni aku é méitia' witi katanaan makangaran Patmos pahpaan mahkua u Nuwu' ni Opo Empung wo a mémoipapata'u ni Yesus.

Wahyu 11:7

Sa séra nimakakuamoma an tinalinga wo am pina'ilek néra, wéwéhan si meneza' tou mondolé witu um woso um patéan, mékumoro' karia néra zua wo kumala ni séra wo munu' ni séra.

Wahyu 12:16

Taan un tana' é métimulung si wéwéné itii. Un tana' é nimawekama tanu u sumah i nimawukama a numo'nota an zano mahondolé witu u sumah ni naga itii.

Wahyu 13:7

Ni sia kasii é niénéan ing kumoro' wo kumala sé tou ni Opo Empung wo winéhan ung kawasa i merénta wia péléng sé tahsasana suzu wo sé tahsasana réwok mahtuari wo sé tahsasana nunuwu'en wo sé tahsasana wanua.

Wahyu 14:12

Un ipahpuu-puuna im wia'i éng kaezenan né tou ni Opo Empung, sé mahkiit am perénta-Na wo ma'éman wia si Yesus.

Wahyu 17:14

Ni séra éng kumoro' sumaru si Anak ni Domba. Taan si Anak ni Domba éng kumala ni séra, pahpaan si Anak ni Domba itii én Tuang péléng né tuang, wo kasii Kolano péléng né kolano. Wo sé tou sé memali-mali karia ni Anak ni Domba itii kasii éng kumala ni séra. Sé tou itii é sé tinawah, sé pinéléng wo kasii sé zéi'kan mazéi' i ma'éman wia si Opo Empung.”

Wahyu 17:6

Ilekengkuma si wéwéné itii én teweleno pahpaan nimelep an zaha' né tou ni Opo Empung wo an zaha' né tou sé mahkua a niilek wo tinalinga néra tumoro si Yesus. Ni aku i nimileka si wéwéné itii én totoz mengusi-ngusingsing.

Wahyu 18:20

Mahpaa-paazola é kamu sé witi kasendukan, ni kamu sé tou ni Opo Empung, sé aatu wo sé nabi, pahpaan am winangun néra wia ni kamu, sé tou witu um wanua tua'na itii é niukummoma ni Opo Empung!

Wahyu 19:10

A ni aku kumuruzla witu u sinaru un a'é ni malaekat itii i mongkot wo sumigi' ni sia, taan kuana wia ni aku, “Tia'mo mahasar téntu! Ni aku én ata, masuat wo ni ko karia né katuarimu esa pa'émanen sé mahkua a niilek wo an tinalinga néra tumoro si Yesus. Pahongkotala wo pahsigi'ela si Opo Empung! Pahpaan sé tou mahkua a niilek wo an tinalinga néra tumoro si Yesus ém wéwéhan roh i mahkua a méikuamé ni Opo Empung.”

Wahyu 19:19

An ilekengkuma si binatang makaindé'en itii wo sé kolano wia ung kaayahan karia né suraro néra é nimaréwoko ing kumoro' sumaru si Simaké wia si kawalo kulo' itii wo sé suraro-Na.

Wahyu 20:4

An ilekengkuma a rurumezan né kolano wo sé tou rimumez witu ém winéhanna ung kawasa in tumotoz ulit kaapa zéi'kan am pinahlé'osé né tou. Ilekengku kasiima sé roh né tou sé im puuna éng kinetoran an ulu pahpaan i mahkua a niilek wo an tinalinga néra tumoro si Yesus wo kasii pahpaan i mahkua u Nuwu' ni Opo Empung, sé zéi'kan mahongkot wo mahsigi' wia si binatang wo wia si patong ni binatang itii wo sé zéi'kan tinandaan an tungtung wo a lengen néra. Ni séra é méitou sumaup ni Opo Empung, a merénta ing kolano karia ni Kristus sana riwuna ta'un ung kauréna.

Wahyu 22:14

Mahpaa-paazola sé tou mahkemes ang karai tonton néra akaz i maweresi. Pahpaan ni séra én toro kuman am wua'na ang kai u mahwéhémé ung katou-touan wo toro muntep witu um wanua tua'na itii lumangkoia wana am pepenet tua'na.

Wahyu 6:9

I si Anak ni Domba itii mukama u segel kalima, ilekengkuma um witu um wawa' um pahtunuan a raragés wia si Opo Empung ém wéwéhan sé roh né tou winunu'mo, pahpaan u Nuwu' ni Opo Empung wo pahpaan ang kata'uan néra tumoro a niilek wo tinalinga néra.