Wahyu 11:9 - Taaz Weru Witu u Nunuwu'en Tombulu

⁹ Sé tou wia péléng sé tahsasana wanua, sé tahsasana suzu, sé tahsasana nunuwu'en wo sé tahsasana réwok mahtuari é mengile-ngilek sé zua nimatémo itii, ung kauréna én telu wo sana pahzuana endo. Zéi'kan iwéhé né tou itii sé zua nimatémo itii i maileweng.

Wahyu 11:9 Iomraidhean Croise

Matius 7:2

Pahpaan kuramo ni kamu i mahtotoz a liné'os né tou walina, téntumo si Opo Empung in tumotoz a liné'os niou. Wo kuramo um pakahilek niou wia sé tou walina, téntu kangkasii um pakahilek ni Opo Empung wia ni kamu.

Wahyu 10:11

Ang kuana wia ni aku, “Totoz i maikuamu kasiila a méikuamé ni Opo Empung tumoro a mawangunen-Na wia sé tahsasana wanua, sé tahsasana réwok mahtuari, sé tahsasana nunuwu'en wo wia sé kolano.”

Wahyu 11:11

Lumangkoia un telu wo sana pahzuana endo, si Opo Empung é niméhéma un asengan wia sé tou zua itii a séra rumendaié wo péléng sé tou nimileka sé tou zua itii én totoz maindé'.

Wahyu 13:7

Ni sia kasii é niénéan ing kumoro' wo kumala sé tou ni Opo Empung wo winéhan ung kawasa i merénta wia péléng sé tahsasana suzu wo sé tahsasana réwok mahtuari wo sé tahsasana nunuwu'en wo sé tahsasana wanua.

Wahyu 17:15

Ang kuano kasii ni malaekat itii wia ni aku, “Péléng an zano niilekmumo, u rinumezan ni wéwéné sangaya itii, niitu ém péléng sé tahsasana wanua, péléng sé tahsasana suzu, péléng sé tahsasana réwok mahtuari, wo péléng sé tahsasana nunuwu'en.

Wahyu 5:8

I ni Sia niméndomé ung kitap ginulung itii, sé epat tumou-tou karia né zuana pulu' wo epat pahtutu'an é rengan ing kimuruzla karia i nimongkot witu u sinaru ni Anak ni Domba itii. Ni séra péléng én timion tata'saan ung kecapi wo un eelepan u mas am wangunen a mawuta-wuta ang kamania. Ang kamania itii ém pengaléien né tou ni Opo Empung.

Wahyu 5:9

A sé epat tumou-tou wo sé zuana pulu' wo epat pahtutu'an kumantaré ung kakantaren weru. Kuan néra, “Ni Ko si wangun i makailek ung kitap ginulung itii, wo muka a segelna; pahpaan ni Ko si Anak ni Domba éng kinerizo, wo karia un zaha'-Mu sé tou wia ung kaayahan ém winaér-Mumo im wia sé tahsasana suzu, sé tahsasana nunuwu'en, sé tahsasana réwok mahtuari wo wia sé tahsasana wanua i maéndo anu ni Opo Empung.