Wahyu 11:18 - Taaz Weru Witu u Nunuwu'en Tombulu

¹⁸ Péléng sé tahsasana wanua é maupi'mo, taan méikaayomola un oras-Mu i mapailek un upi'-Mu, wo oras-Mu in tumotoz ulit kaapa zéi'kan am pahwangunen né tou nimatémo wo méhé um wawaér wia sé ata-Mu, wia sé nabi-Mu, wo wia sé tou linenas-Mu, wo wia sé tou maindé' u ngaran-Mu, wo wia sé tou kanaramen wo sé tou pahsigi-sigi'en, wo i luméwo' séi uman sé mahléléwo' ung kaayahan.”

Wahyu 11:18 Iomraidhean Croise

Matius 5:12

Mahkonta-konta'la ni kamu i mahpaa-paaz pahpaan um wawaér makailekan niou witi kasendukan én totoz wangko'. Pahpaan sé nabi puunala ni kamu kangkasii ém pinahzézéhamola tanu niitu.”

Lukas 1:50

U raraatéan-Na wia péléng sé tou sé maindé' wo mahsigi' ni Sia é makaz im pinuyunan.

Ibrani 9:27

Niitu é masuat wo si Opo Empung timotozo si tou i makasa uman maté. Tumondong niitu, si Opo Empung én tumotoz am pahwangunen ni tou ulit kaapa zéi'kan.

Wahyu 10:7

Taan si malaekat kapitu i sumengoma um pontuangna, in toro niitumokan an tinotoz tumoro an ipahwuni-wuni ni Opo Empung é malekep, tanu a méipahwoka'-Namo wia sé ata-Na, ni séramo sé nabi.”

Wahyu 11:2

Taan u lésaz witi ondol um Walé ni Opo Empung én tia'mo pahuukurennu. Pahpaan, niitu é mémoiwéhé wia sé tahsasana wanua walina sé zéi'kan mata'u si Opo Empung. U Yerusalem um wanua tua'na lenas é maipeléé-léék néra, epatna pulu' wo zuana loloho'en ung kauréna.

Wahyu 13:10

Séi si tinotozo im buin, tantumo ni sia é maiuntep bui. Séi si tinotozo im wunu'en karia um pisou, ni sia é léwo'zéi' im wunu'en karia um pisou. Niitumo un totoz ipahpuu-puuna, sé tou ni Opo Empung é léwo'zéi' in ezen wo tia' mazéi' i ma'éman.

Wahyu 13:16

Si binatang kazua itii kangkasii é nimatu péléng sé tou, séra in tou kanaramen kaapa in tou pahsigi-sigi'en, tou wa'ilan kaapa tou zéi'kan siapa apa, ata kaapa zéi'mo ata, im wéhan un tanda witu u lengen kakan kaapa wana an tungtung néra.

Wahyu 14:10

én toron un upi' ni Opo Empung. Ni sia én zézéhan karia un api wo um walélang witu saru-sarun né malaekat lenas wo witu u saru-sarun ni Anak ni Domba, tanumokan ni séra nimelep un anggor pa'it zéi'kan sinembor u méitahu' in esa ni Opo Empung witu un eelepan.

Wahyu 15:1

An ilekengku kasiima un tanda walina un zéi'kan kakuaan wo makakompo'en witi kasendukan. Un tanda itii é sé pitu malaekat sé wéwéhan ung kawasa i mangun am pitu meléwo' kamurian wia ung kaayahan. Pahpaan sa nimamualimoma am pitu meléwo' itii, un upi' ni Opo Empung é nimakazola.

Wahyu 15:7

A si esa im wia sé epat tumou-tou itii méhéma wia sé pitu malaekat itii am pitu eelepan a mas am wangunen a mawuta-wuta un upi' ni Opo Empung, si menou-nou makaz ing kauré-uré.

Wahyu 18:6

Kuramo u nimamualimé wia ni kamu im witi wanua tua'na itii, téntumo kangkasii u muali nioula witu um wanua tua'na itii, lumouspé'mé niitu, u muali nioula é makazuamé a nimamualimé witu, tahu'an niouola um pengengelepanna karia un eelepen u makazuamé ung kapa'it un eelepen méiwéhénamé wia ni kamu.

Wahyu 19:15

Im witu u sumah-Na é nimondolé um pisou tewel ung kumala péléng sé tahsasana wanua, wo ni Sia é merénta ni séra karia ung ketez totoz wangko', tanumokan i merénta karia un teken uaséi, wo ni Sia é mapailek un upi' ni Opo Empung, si Totoz Mahkawasa wia sé kakoro'-Na, tanumokan i mahlééka am wua'na an anggor witi pahpesutan an anggor.

Wahyu 19:18

wo ni kamu sumeza' a lé'ona né kolano, né tonaas né suraro, né suraro totoz ketezen, né kawalo wo né simaké wia sé kawalo itii. Wo kasii seza'en niouola a lé'ona péléng né tou: séra in ata kaapa zéi'mo ata, sé tou kanaramen wo sé tou pahsigi-sigi'en.”

Wahyu 19:5

An talingangkumé u nuwu' witi rurumezan ni Kolano itii mahkuamé, “Loozenola si Opo Empungta, é kamu péléng in ata-Na, ni kamu sé maindé' ni Sia, ni kamu in tou kanaramen kaapa in tou pahsigi-sigi'en!”

Wahyu 20:12

Ilekengkuma sé tou nimatémo, ni séra é sé tou pahsigi-sigi'en wo sé tou kanaramen, rimendai witu u sinaru u rurumezan ni Kolano itii. In toro niitu, péléng ang kitap ém winukama, am pinantikan péléng am pinahwanguné né tou. Am wukan kasiima ung kitap walina, ung kitap katou-touan. Sé tou nimatémo ém pahtotozen ulit kaapa zéi'kan am pinahlé'os néramé mengiit a mémoipantik wana ang kitap itii.

Wahyu 20:15

Peléng sé tou sé makangaran un zéi'kan méikapantik witu ung kitap katou-touan itii, méiwerit witu un tasik api melaya-layas itii.

Wahyu 22:12

Ang kuan ni Yesus, “Ni Aku én uli-ulit zéi'mo uré é méyémo wo ni Aku i méyé é mahalimé um wawaér in iwaér wia si esa wo si esa, mengiité am pinahlé'osnamé.