Wahyu 1:5 - Taaz Weru Witu u Nunuwu'en Tombulu

⁵ wo um wia si Yesus Kristus si toro pa'émanen i mahkua ang kata'uan-Na tumoro si Opo Empung. Ni Sia si kataré-taré méitoumé sumaup im wia sé nimaté. Wo ni Sia kasii si mahkawasa im wia sé kolano wia ung kaayahan kenu. Ni Sia é rumaraaté ni kita wo nimilot ni kita im wana a singkéla'ta karia un zaha'-Na,

Wahyu 1:5 Iomraidhean Croise

Matius 20:28

Téntu kangkasii si Oki' ni Tou i méyé én zéi'kan i selewiren, taan i mésumelewir wo i mayo ung katou-touan-Na in tumubus a singkéla' né tou lakez.”

Matius 28:18

A si Yesus rumétéla ni séra ang kumuama, “Péléng ang kawasa witi kasendukan wo wia ung kaayahan é mémoiwéhé wia ni Aku.

Yohanes 13:1

In endo mahsiwo-siwo i lumé'os un endo Paskah né tou Yahudi, si Yesus é mata'umo in oras-Namo tumula'u ung kaayahan kenu wo mangé wia si Ama'-Na. Ni Sia é rumaraaté sé tou sé nimaéndo anu-Na sé wia ung kaayahan kenu wo ni Sia é rumaraaté ni séra makaz ni Sia ing kalekepan.

Yohanes 13:34

Ni Aku é méhéma um perénta weru wia ni kamu: Mahraa-raatéanla si esa wo si esa, tanu ni Aku i rumaraaté ni kamu téntu kangkasii ni kamu é léwo'zéi' i mahraa-raatéan.

Yohanes 15:9

A si Yesus kumua kasiima wia sé pahtuzu'en-Na, “Tanu si Ama' rumaraaté ni Aku, téntu kangkasii ni Aku rumaraaté ni kamu. Menou-noula in tou sé karaaté-Ku.

Yohanes 18:37

Ang kuan ni Pilatus wia ni Sia, “Sa téntu, ni Ko ndéén éng Kolano?” A si Yesus mingkotla, “Ni ko si kimua i ni Aku éng Kolano. Pahpaano niitu a ni Aku itoumé wo niméyé wia ung kaayahan kenu, wo ni Aku toro kumua a niilek wo tinalinga-Ku tumoro ung kaulitan. Sé tou paaz ung kaulitan itii é mahtalinga ni Aku.”

Yohanes 3:11

Uli-ulit ikua-Kuma wia ni ko, ni kai é mahnuwu'ma tumoro ang kata'uan nai wo ni kai é mahkua tumoro a niilek nai, taan ni kamu soo ma'éman an ipahkua nai.

Yohanes 3:16

Pahpaan si Opo Empung totoz rumaraaté péléng sé tou wia ung kaayahan kenu, niitumo ni Sia timambéré si Oki'-Na si esa uman, wo péléng sé tou ma'éman ni Sia zéi'kan maté, taan makailek ung katou-touan makaz ing kauré-uré.

Yohanes 3:32

Ni Sia é mahkua tumoro a niilek-Na wo an tinalinga-Na. Taan zozo' in esa, zéi'kan siapa si tou ma'éman an ipahkua-Na.

Kisah Rasul-rasul 20:28

Niitumo, mile-ilek wo pahilekela péléng sé jamaat. Pahpaan ni kamumo sé tinotoz ni Roh Lenas in tumatér sé jamaat ni Opo Empung i miara ni séra. Ni séra nimaéndo jamaat-Na pahpaan ni séra ém winaér-Namo karia un zaha' ni Oki'-Na.

Kisah Rasul-rasul 26:23

Ni séra mahwoka' i si Mesias é léwo'zéi' mazézéha, wo ni Siamo si kataré-taré méitoumé sumaup ni Opo Empung im wia sé nimaté. Wo ni Sia si makumua wia sé tou Yahudi wo sé tou zéi'kan Yahudi tumoro u Nuwu' Lé'os un tanumokan sena' wia ni séra.”

Roma 3:25

Si Kristus Yesus én tinotozo ni Opo Empung i muka u lalan wo sé tou mawurian sumaup karia ni Opo Empung pahpaan ma'éman un zaha'-Na u méikasaroi i sinalip. Niia un tumuzu'mé i si Opo Empung én zéi'kan mahsanaweka. Ni Sia im puuna én ezen im wana a singkéla' né tou taka-takazan ni Sia zéi'kan nimukum ni séra.

Roma 8:37

Taan wana péléng am péléng, ni kita é lumouspé'mé sé tou nimuntung, pahpaan si Kristus é rumaraaté ni kita.

1 Korintus 6:11

Sé woopira im wia ni kamu im puuna é mahlé'os an téntu. Taan in tarékan ni kamu wineresimo im wana a singkéla' niou, ni kamu é linenas ni Opo Empung wo winangun-Na ni kamu ulit witu u sinaru-Na. Niana péléng ém winangun-Na pahpaan ni kamu nimaesamo karia ni Yesus Kristus si Mahpiara wo karia ung kawasa ni Roh ni Opo Empungta.

Galatia 2:20

In tarékan, zéi'mo ni aku si menou-nou taan si Kristus si menou-nou wo mahkawasa witu ung katou-touangku. Witu ung katou-touangku wia ung kaayahan in tarékan kangkasii, ni aku é menou-nou witu um pa'émanengku wia si Oki' ni Opo Empung, si totoz rimaraatémo ni aku wo niméhémo un tou-Na in esa wia ni aku.

Efesus 2:4

Taan si Opo Empung én totoz lé'os uman taka-takazan niitu é méipapailek-Na karia in totoz rumaraaté ni kita.

Efesus 5:2

wo menou-noula karia i mahraa-raatéan tanu si Kristus Yesus rimaraatémo ni kamu. Ni Sia nimayomo un tou-Na wia ni kita, nimaté witu u salip i maéndo tanu u raragés wo sé tatamun kineriz in ipahragés a mahwou tariis, u nimangun un até ni Opo Empung mahpaa-paaz.

Kolose 1:18

Ni Sia én ulu wo sé jamaat én awak. Ni Sia si kataré-taré wo ni Sia si puuna méitoumé ni Opo Empung im wia sé nimaté, niitumo ni Sia si ipahpuu-puuna im wana péléng am péléng.

1 Timutius 6:13

In tarékan witu u saru-sarun ni Opo Empung si mahwéhémé ung katou-touan wia péléng sé menou-nou wo witu u saru-sarun ni Kristus Yesus, si nimakaulitola ang kata'uan-Na tumoro ang kaulitan witu u sinaru ni Pontius Pilatus, pahaléiengku wia ni ko:

1 Timutius 6:15

witu un endo totozen ni Opo Empung. Ni Sia uman si Mahkawasa wo mawuta-wuta ung kamang, Kolano péléng né kolano wo Tuang péléng né tuang.

Ibrani 10:29

Tantumo lumouspé'mé ung kawutezna un ukuman wia si tou mahséro' wia si Oki' ni Opo Empung wo mahgenangla un zaha' ni Yesus Kristus u lumenas sé tou én zéi'kan siapa torona wo mahséro' wia si Roh si mahtambéré ang kamang.

Ibrani 9:14

apapé' kasii un zaha' ni Kristus mengiité ung kawasa ni Roh Lenas si makaz ing kauré-uré é méiwéhé-Na in esa wia si Opo Empung i maéndo raragés zéi'kan siapa pahséro'an. Un zaha' ni Kristus itii u mangun un atéta weresi im wana am pemangu-mangunen an zéi'kan siapa torona, wo kita toro lumooz wo maayang wia si Opo Empung si menou-nou.

1 Petrus 1:19

taan ni kamu én tinubuso karia un zaha' ni Kristus un totoz mahal. Si Kristus é masuat wo si anak ni domba si totoz wangun wo zéi'kan siapa um pahséro'an si kerizen in iragés.

1 Yohanes 1:7

Taan sa kita menou-nou witu un ayah tanu ni Sia ém witu un ayah, ni kita é nimaesa karia né tou walina, wo un zaha' ni Yesus, si Oki'-Na itii é meresi ni kita im wana a singkéla'ta.

1 Yohanes 4:10

Ung kenumo u raraaté itii: Zéi'kan ni kita sé rimaraatémo si Opo Empung, taan si Opo Empung si rimaraatémo ni kita wo nimatu si Oki'-Na in zuméi' a singkéla' pahlé'osenta.

Wahyu 11:15

A si malaekat kapitu sumengoma um pontuangna, an talingangkumé a nuwu' totoz rimez witi kasendukan a mahkuamé, “Ung kawasa i mahperénta wia ung kaayahan én anu uman ni Opo Empungta wo ni Kristus si méitaaz-Na, wo ni Sia éng kumawasa ing Kolano makaz ing kauré-uré.”

Wahyu 11:3

Ni Aku é matu sé zua tou sé nimilek wo timalinga a méikua-Ku, i makumua a méi'kua-Ku itii, karia ing kimarai ung karai zemdem, ung kauréna é sana riwu zuana atus wo enemna pulu' endo.”

Wahyu 17:14

Ni séra éng kumoro' sumaru si Anak ni Domba. Taan si Anak ni Domba éng kumala ni séra, pahpaan si Anak ni Domba itii én Tuang péléng né tuang, wo kasii Kolano péléng né kolano. Wo sé tou sé memali-mali karia ni Anak ni Domba itii kasii éng kumala ni séra. Sé tou itii é sé tinawah, sé pinéléng wo kasii sé zéi'kan mazéi' i ma'éman wia si Opo Empung.”

Wahyu 19:11

An ilekengkuma ung kasendukan é nimawukama, im witu ém wéwéhan si kawalo kulo' sinakéan ni makangaran, ‘Si Toro Pa'émanen wo Si Ulit’. Ni Sia én zéi'kan mahsanaweka i mahtotoz ulit kaapa zéi'kan am pinahwanguné né tou wo i mahkoro'.

Wahyu 19:16

Witu ung karai tonton-Na wo witu um paa-Na ém pinantikan u ngaran, “Kolano péléng né kolano wo Tuang péléng né tuang.”

Wahyu 2:13

Kata'uang-Ku um pahwéha-wéhan niou. Ni kamu é mahento' witu un tampa kinawasaan ni tonaas né sétang. Taan zozo' in téntu, ni kamu én zéi'kan mazéi' i ma'éman wia ni Aku, wo ni kamu kangkasii én zéi'kan mahkélong i ma'éman ni Aku. Téntu kangkasii, ni kamu én zéi'kan mazéi' i ma'éman, im witu un endo si Antipas si mengungua a niilek wo tinalingana tumoro ni Aku, si totoz ma'éman ni Aku, im winunu' witu u saru-sarun niou witu un tampa kinawasaan ni tonaas né sétang.

Wahyu 3:14

Ang kuan kasii ni Oki' ni Tou, “Ipantikmula wo iwéhéma wia si malaekat si wia sé jamaat witi Laodikia in téntii: ‘Kenumo a Nuwu' am wia Si Amin, Si toro pa'émanen wo ulit i mahkua ang kata'uan-Na tumoro u Nuwu' ni Opo Empung, wo péléng am winangun ni Opo Empung ém wia ni Sia a méyé.

Wahyu 7:14

Am wingkotengkula, “Zéi'kan ndo'tuu kata'uangku tuang, ni ko in esa si mata'u ni séra.” Ang kuana wia ni aku, “Ni séramo sé limangkoiomé wana an zézéha zéi'mo kakuaan. Wo karia un zaha' ni Anak ni Domba, ni séra kimemesoma ung karai tonton néra makaz nimakulo'.